ဒပ်ပၠန်ဂတးတအ် ထပ်သီဂွံလဝ် ဍုၚ်ခါမ်ပါတ်

သေတ်ဂါၚ်၊ နဝ်ဝေမ်ဗာ (၈)

ရးဒေသသေတ်ဂါၚ်၊ ပွိုၚ်ဍုၚ်တမူ၊ ဍုၚ်ခါမ်ပါတ်ဂှ် ဒပ်ပၠန်ဂတးတအ် ဗတိုက်သီဂွံလဝ် ပ္ဍဲတ္ၚဲဏံ အခိၚ်နူဂယးရဂှ် အလဵုအသဳညဳသၟဟ်ကောန်ဂကူ NUG လလောၚ်တြးပ္တိတ်လဝ် ပရိုၚ်ရ။

ဗဒိုပ်ကုန်ခါမ်ပါတ် ဒပ်ကံၚ်ဇြဳပၞာန် မၞုံပွိုၚ်ဍုၚ်ခါမ်ပါတ်တအ် ဖျေံလဝ်ဗဒိုပ် လကြဴအိုတ်ဂှ် ကြဴနူဒပ်ပၠန်ဂတးတအ် သီဂွံလဝ်တုဲဂှ် သီဂွံလဝ် သီုအလုမ်ဍုၚ်ခါမ်ပါတ်မွဲ သီုဖအိုတ်ရ။

ဍုၚ်ခါမ်ပါတ် မၞုံလ္တူဂၠံၚ်အာယှဓရိပ်တရဴဇမ္ၚောဲ ကလေဝ်-တမူဂှ် စတမ်ဗတိုက်လဝ် နူကဵုဂိတုနဝ်ဝေမ်ဗာ စၟတ်တ္ၚဲ (၃) တုဲကၠုၚ်တေံဂှ် အခိၚ်နူဂယးတ္ၚဲဏံဂှ် ဗစိုပ်ဒတုဲ သီကေတ်မာန်လဝ်ရဂှ် လလောၚ်တြးလဝ်ရ။

ပရေၚ်ချဳဒရာၚ်ပၞာန်ဏံဂှ် တံဒပ် (၂) ခရိုၚ်တမူ၊ တံဒပ်တၟေၚ် ဒေသပၞာန်(၂)၊ ဂကောံလွဟ်ဇၞော် ဒေသပၞာန် စၟတ် ၁ ၊ ဂကောံကောပ်ကာဲမုက်ပၞာန်၊ CNDF၊ TDA၊ RCDF ကေုာံ KNA-BURMA တအ် ပံၚ်တောဲဗတိုက်လဝ်ရ။

ကောန်ဒပ်ကံၚ်ဇြဳပၞာန် မၞုံဍုၚ်ခါမ်ပါတအ်ဂှ် ဒပ်စဵုဒၞာညးဍုၚ်ကွာန်တအ် စဗတိုက်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၃) တုဲကၠုၚ်တေံ အခိၚ်နူဂယး ၜိုတ် (၄) နာဍဳိဂှ် တ္ၚဲဏံ ဂိတုနဝ်ဝေမ်ဗာ စၟတ်တ္ၚဲ (၇) အခိၚ်နူဂယးဂှ် သီကေတ်မာန်လဝ်ရ။

သ္ပတံနူဂိတုနဝ်ဝေမ်ဗာ စၟတ်တ္ၚဲ (၃) တုဲ ဂကောံဇြဟတ်ပၠန်ဂတးတအ် လုပ်ဒၟံၚ်ပေါဲဗတိုက်သီဍုၚ်တုဲ ပ္ဍဲတ္ၚဲတုဲကၠုၚ်တေံလေဝ် ပ္ဍဲကဵုပွိုၚ်ဍုၚ်ကဝ်လေန် ဒေသပၞာန်စၟတ် (၁) ၊ နကဵုအစဳဇန်ပရေၚ်ကောပ်ကာဲခရိုၚ်ကဝ်လေန် ဒပ်ပၞာန်စဵုဒၞာညးဍုၚ် PDF ၊ ဂကောံမဟာမိတ်ပံၚ်ကောံတအ် ဗတိုက်သီကေတ်မာန်လဝ်ရ။

ပရိုၚ် – သြၚ်လောန်တိုၚ်မ်

ဗီု – NUG