ဝဝ်၊ နဝ်ဝေမ်ဗာ ၈
ဟိုတ်နူလွဟ်ဇၞော်ဒတုံဗ္တိုဟ်ထ္ကးစှ်ေ ပ္ဍဲကဵုကွာန်တနဝ်ကျောန် ပွိုၚ်ဍုၚ်ဝဝ် ရးဒေသဇၞော်ဗဂေါဂှ်တုဲ ကောန်အရာပ် ၄ တၠ ချိုတ်တုဲ ၇ တၠ ကလိဂွံလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တ္ၚဲဏံ ပ္ဍဲဂိတုနဝ်ဝေမ်ဗာ ၇ လဒေါဝ်တ္ၚဲ ၜိုတ် ၂ နာဍဳဂှ် နူကဵုဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကုန်မိုဝ်ကျိုဝ် လ္ပာ်ဒဒန်သက်တိုၚ်တြေံဂှ် ပန်ပှော်စုတ်လဝ်လွဟ်ဇၞော်တုဲ ဒတုံဗ္တိုဟ်ထ္ကးအာလဝ် ပ္ဍဲကဵုကွာန်တနဝ်ကျောန်ရ။
လ္ဂောံကဵုဂလာန်ညးဒေသတံဂှ်မ္ဂး စပ်ကဵုကိစ္စဂကောံဇြဟတ်ပၠန်ဂတးတံ ဗ္တိုက်လဝ် ရုၚ်အုပ်ဓုပ်ကာနာနာဍုၚ်ဒုၚ်ဇြယိတ် နကဵုဒရုၚ်ဂှ်တုဲ လ္ပာ်ကံၚ်ဇြဳပၞာန်တံ ဟိုတ်နူကလေၚ်ပန်ပှော်လဝ်လွဟ်ဇၞော်ဂှ်ရ ဒတုံဗ္တိုဟ်ထ္ကးအာလဝ် ပ္ဍဲကွာန်တနဝ်ကျောန်ရ။
ဟိုတ်နူလွဟ်ဇၞော်ဒတုံဗ္တိုဟ်ထ္ကးအာလဝ်ဂှ်ရ သီုကဵုက္ဍိုပ်သ္ၚိကၠံ ကံၚ်ဇြဳပၞာန်မခါန်ကၞက်လဝ် ဥူကျဝ်မျေတ်ဂှ်ကီု ညးဒေသဂမၠိုၚ် ကိုဝ်အံၚ်ကိုဝ်၊ ကိုဝ်အံၚ်သာန်ဥူ ကေုာံ ကိုဝ်ကျဝ်လေန်ထောန်တံ ၄ တၠ ဒးမကမ်ချိုတ်အာလဝ်ရ။
သ္အာၚ်နူဂှ်ပၠန် ကိုဝ်အံၚ်တူ၊ ကိုဝ်နေလေန်ထောန်၊ ကိုဝ်ဟာန်ထောန်အံၚ်၊ ကိုဝ်ဖိုဝ်ဇြုၚ် မဒှ်ညးဒေသဂမၠိုၚ် ၇ တၠဂှ်လေဝ် ဒးကဝေက်မာၚ် ကလိဂွံလဝ်ဝပ်ရောၚ် သ္ဂးရ။
ဟိုတ်နူလွဟ်ဇၞော်တုဲ ညးဒေသ မဇီုကပိုက်ချိုတ်အာတံဂှ် ပလံၚ်ဗစိုပ်ကဵုလဝ် ရုၚ်ဂဥုဲပွိုၚ်တိုက်မျေတ်ကျိုဝ်ကဵု ရုၚ်ဂဥုဲညးဍုၚ်ကွာန်ပွိုၚ်ဍုၚ်ဗဂေါတံရောၚ်ဂှ် ဂွံတီကေတ် ဇရေၚ်ညးဒေသတံရ။
ပ္ဍဲကဵုပရေၚ်ဗ္တိုက် ရုၚ်သ္ကိုပ်အုပ်ဓုပ်ကာနာနာ ဍုၚ်ဒုၚ်ဇယိတ်ဂှ် သၞာဲဒဴကံၚ်ဇြဳပၞာန် ၂ တၠ ချိုတ်အာတုဲ ၄ တၠ ဟွံအောန် ကလိဂွံလဝ်ဝပ်ရောၚ် လ္ပာ်ဂကောံဇြဟတ်ပၠန်ဂတးတံ ဟီုဂးဒၟံၚ်တံ နွံဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာ ဟွံမာန်ဏီရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai