သီဂွံဍုၚ်ကဝ်လေန်ဂှ် ဒှ်အပြံၚ်အလှာဲဇၞော်ဇၞော်မွဲရောၚ် ညးခါတ်အကာဲတံ ဟီု

ကဝ်လေန်၊ နဝ်ဝေမ်ဗာ ၈

ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ သီဂွံလဝ် ဍုၚ်ကအ်လေန် ကဆံၚ်ခရိုၚ် ရးသက်ကိုၚ်ဂှ်ဝွံ သွက်ပၠန်ဂတးက္ညၚ်ဏံဂှ် ဒှ်အပြံၚ်အလှာဲဇၞော်ဇၞော်မွဲရောၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒပ်ပၞာန်ဗၠးၜးကချေၚ် KIA ကဵု ဂကောံဒပ်ပံၚ်ကောံစဵုဒၞါညးဍုၚ်ကွာန်တံ စဗ္တိုက်လဝ် ဒၞါဲဒပ်ကံၚ်ဇြဳပၞာန်တံ ဖျေံလဝ်ဒပ် ပ္ဍဲကဵုဗွိုၚ်ဘာ အထက (၁) ကဵု ရုၚ်သ္ကိုပ်ဌာနက္ဍိုက်ပ်ပရေၚ်အုပ်ဓုပ်ကာနာနာ၊ ဗ္ဒိုပ်ဗၠာဲသၟိၚ်ၝောံဍုၚ် ကံၚ်ဇြဳပၞာန် လ္တူဍုၚ်ကအ်လေန် ပ္ဍဲဂိတုနဝ်ဝေမ်ဗာ ၃ တုဲကၠုၚ်တေံဂှ်ရ။

ကြဴနူဗ္တိုက်လဝ် ဒပ်ကံၚ်ဇြဳပၞာန် မၞုံဍုၚ်ကအ်လေန် လအ်ဂွံပိတ္ၚဲတုဲဂှ် သီဂွံလဝ် ဍုၚ်မၞုံကဆံၚ်ခရိုၚ်မွဲဍုၚ် အလန်ကၠာအိုတ်ဂှ် ဌာနဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG လလောၚ်ပ္တိတ်လဝ် ပ္ဍဲဂိတုနဝ်ဝေမ်ဗာ ၆ တေံရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်၊ ပရေၚ်ပၞာန် ဥူတာန်သဵုနာၚ်ဂှ် ထ္မံက်လဝ်ပေါဲဗ္တိုက်သီဍုၚ်ကအ်လေန်မာန်ဂှ်ဝွံ သွက်ပၠန်ဂတးက္ညၚ်ဂှ် ဒှ်ဇြဟတ်ဂရိုဟ်မွဲတုဲ နကဵုဗ္ၜတ်အလုံဍုၚ်မွဲဂှ် ပ္တဝ်ကၠုၚ်က္ဍိုပ် ပေါဲဗ္တိုက်မဟာဗျူဟာတံမာန်ရောၚ် ဟီုရ။

“ထ္မံက်ထောံပေါဲဗ္တိုက်သီဍုၚ်ကအ်လေန်မာန်ဂှ် ဂကောံသ္ကုတ်သၟဝ်ကျာတံကဵု ပၠန်ဂတးက္ညၚ်ဏံ စတုဲဆက်စၠောံအာညးသ္ကအ်ယျဂှ် ပိုယ်တံ ခယျကေတ်ရ။ ဣဏံဝွံ ကဵုဇြဟတ်ဂရိုဟ် ကုပၠန်ဂတးက္ညၚ် မကၠောန်ဗဒှ်ဒၟံၚ် အလုံကၟိန်ဍုၚ်ဗၟာဏံဂှ်ရ။ ပ္တဝ်အာက္ဍိုပ် ကုပရေၚ်ဒက်ပ္တန်မဟာဗျူဟာ စပ်ကဵုအလုံဍုၚ် မသၠဲလးဂှ်ဏောၚ်ဂှ် ရန်တၟံလဝ်ရ“ သာ်ဝွံ သ္ဂးရ။

သီဂွံလဝ်ဍုၚ်ကအ်လေန်မာန်ဂှ်ဝွံ အပ္ဍဲကာလပၠန်ဂတးက္ညၚ်ဏံ စဂွံအပ္ဍဲပွိုၚ်ၜါသၞာံပြၚ်ဂှ် နဒဒှ်အလန်ကိုပ်ကၠာအိုတ် အလဵုအသဳညဳသၟဟ်ဂကူ NUG စထ္မံက်လဝ်ပေါဲဗ္တိုက်သီဍုၚ်ရ။

ဥူမာၚ်ၚ်ဇြိုဲ ဒုဝန်အပ္ဍဲ ဌာနဝန်ဇၞော်ကာစဵုဒၞါ NUG ဂှ်လေဝ် အကြာတၚ်သၞောတ်ဗ္ၜတ် လွဟ်လက်နက်မကမ်တံ နွံဂှ် သီဂွံလဝ် ဍုၚ်ကအ်လေန်ဂှ်ဝွံ ဒှ်ပရေၚ်အံၚ်ဇၞး စပ်ကဵုစိုတ်ဓာတ် ကေုာံ ပရေၚ်ပၞာန်တံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“သွက်ဂကောံဇြဟတ်ပၠန်ဂတးမဟာမိတ်တံ ဂကောံဇြဟတ်ပၠန်ဂတးမဟာမိတ် မဒးဗ္တိုက်ဒၟံၚ် ပ္ဍဲသ္ကုတ်လဒေါဝ်တေံဂှ် လွဟ်လက်နက်မကမ်ဟီုဂှ် နွံမံၚ်ကဵုသၞောတ်ဗ္ၜတ်ဏောၚ်။ နူကဵုအကြာအခက်အခုဲနွံဒၟံၚ်ဂှ် ဗ္တိုက်ကၠေံ ကံၚ်ဇြဳပၞာန် ဇြဟတ်လွဟ် သာတုဲမဂၠိုၚ်ဒၟံၚ်ဂှ် ဗွဲမအံၚ်ဇၞးတုဲ သီဂွံဍုၚ်ခရိုၚ်မွဲဍုၚ်ဟီုဂှ် လ္ဂောံကဵုအစောံစရာဲပရေၚ်ပၞာန်ကီု၊ ပရေၚ်စိုတ်ဓာတ်ကီုဂှ် ဂၠိုၚ်လောန်ဒၟံၚ်ကွေံကွေံရ။ ပ္ဍဲကဵုပရေၚ်စိုတ်ဓာတ် ဒှ်ဒၟံၚ်သၠုၚ်အိုတ်ဂှ်ရ သီကၠေံသာ်ဏံမာန်ရောၚ် မဒှ်ရ” သာ်ဝွံ ဟီုဂးလဝ်ရ။

အပ္ဍဲပေါဲဗ္တိုက်သီဍုၚ်ဂှ် ဟိုတ်နူပရေၚ်ဗ္တိုက်တရဴကျာ ကေုာံ လွဟ်ဇၞော် ကံၚ်ဇြဳပၞာန်တံတုဲ ကောန်အရာပ် ၁၀ တၠဟွံအောန် ချိုတ်အာ နွံဒၟံၚ်တုဲ ညးဒေသ အောန်အိုတ် ၁၅၀၀ ပြၚ် ကၟာတ်ဒးမံၚ်အပ္ဍဲဍုၚ်ဂှ်ရောၚ်ဂှ် ဂကောံဒပ်ပၠန်ဂတးကအ်လေန်တံ လလောၚ်ပ္တိတ်လဝ်ရ။

ဒပ်ပံၚ်ကောံစဵုဒၞါညးဍုၚ်ကွာန်တံဂှ် ပ္ဍဲဂိတုနဝ်ဝေမ်ဗာ ၇ ဂှ် ရီုပ္တိတ်လဝ် ညးဍုၚ်ကွာန်ဒေသမကၟာတ်ဒးဒၟံၚ်တံဂှ်တုဲ ကၠောန်သ္ပဒၟံၚ် ပရေၚ်ၚးတးတိဍာ်တံရောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ဗိုလ်ဇၞော် CDM ကံၚ်တူဝေန်ဂှ် ကံၚ်ဇြဳပၞာန် မဒးဆောံလေၚ်လဝ် အတိုၚ်ဍုၚ်မွဲဂှ်ဝွံ ဟိုတ်နူဗဒှ်ကၠုၚ် ပရေၚ်ဗ္တိုက်တရဴကျာတံ ဇၞော်ကဵုဇြဟတ်မာန်ဂှ်ရ စွံသတိဗွဲတၟေၚ်တုဲ သွက်ဂွံရေၚ်တၠုၚ်အိုတ်ဂှ် ကဵုလဝ်သတိရ။

“ဇြဟတ်ဂှ်လေဝ် နူကဵုဒၞါဲတၞဟ်ဟ်တံဂှ် ဗလးထောံဟွံဂွံပုဟ်။ ဒုၚ်ဆောံလေၚ်ကၠေံ ဍုၚ်ဏံတုဲ ဂကောံဒပ်ပၠန်ဂတး မၞုံဒၟံၚ်ပ္ဍဲဍုၚ်ဏံကဵုဒှ်၊ ညးဍုၚ်ကွာန်တံကဵုဒှ် သီုဖအိုတ်ဂှ်တှ်ေ နှဴရဴတုဲ ထောံကဵုမခတိုဟ် နကဵုက္ၜၚ်ကျာဟာ။ ဟွံသေၚ်မ္ဂး ဘိုၚ်ပန်ပှော်ကဵုလွဟ်ဇၞော်ဏောၚ်။ ဗီုတံဏံဂှ်တှ်ေ ဂွံဒှ်ကၠုၚ်ဂၠိုၚ်ဏောၚ်။ ထောံမခတိုဟ် နကဵုက္ၜၚ်ကျာဂှ် အခိၚ်ဒှ်ဒၟံၚ်ပေါဲဗ္တိုက်ဂှ်လေဝ် ဂြာတ်ဒၟံၚ်ရဏောၚ်။ လၟုဟ်ဂှ် ယန္တယာဂကောံအုပ်ဓုပ်ဍေံတံ ဆောံလေၚ်အာအိုတ်ယျ။ အကာဲအရာဏံဂှ် ဟိုတ်နူဒှ်ဍုၚ် ဒးဆောံလေၚ်လဝ် ပ္ဍဲကဵုတဲသၞတံဂှ်ရ ပ္ဍဲကဵုဒၞါဲဒှ်အဓိကသာ်ဏံတံဂှ် ထောံကၠုၚ်မခတိုဟ်တံ နွံကၠုၚ်မာန်ဏောၚ်“ သာ်ဝွံ သ္ဂးရ။

ကၠာပေါဲဗ္တိုက်သီဍုၚ်ကအ်လေန်ဂွိုအ်စဂှ် စနူဂိတုအံက်တဝ်ဗာ ၂၇ တုဲကၠုၚ်တေံတုဲ ဂကောံဒပ်ပၠန်ဂတးဂမၠိုၚ် ပါလုပ်သီုကဵုမဟာမိတ်ကောဒေံ ၃ ဂကောံဂှ်ဝွံ ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် မၞုံရးသေံသၟဝ်ကျာတေံ မွဲအခိၚ်ဓဝ်တုဲ အခိၚ်လၟုဟ်ဂှ် သီဂွံလဝ် ဗ္ဒိုပ်ဒပ်ကံၚ်ဇြဳပၞာန် ဗ္ဒါဲ ၁၀၀ ဗ္ဒိုပ်ရ။

ညးမၞုံအခေါၚ်ဟီုဂးကံၚ်ဇြဳပၞာန် သ္ကိုပ်ဗိုလ်ဇၞော် ဇြဝ်မေန်ထောန်ဂှ်လေဝ် ဒးဆောံလေၚ်လဝ် ဍုၚ်ဇၞော် ၃ ဍုၚ် မဒှ်ပၟိက်ဇၞော်သွက်ဒပ်ပၞာန် ချေန်ယှိုဲဟဝ်၊ ဖံၚ်သာၚ် ကေုာံ ဍုၚ်သိန္နီတံ ပေၚ်ၚ်ဂှ် ဒုၚ်လဝ်ဝန်ရ။

အလဵုအသဳညဳသၟဟ်ဂကူ NUG ဂှ် စနူကဵုပေါဲဗ္တိုက်ကအ်လေန်ဂှ်တုဲ ဆက်သီအာ ဍုၚ်တၞဟ်ဟ်တံတုဲ ကလေၚ်ပအပ်ကဵု ပ္ဍဲတဲညးဍုၚ်ကွာန်တံဏောၚ်ဂှ် ထ္မံက်ပ္တိတ်ဟီုဂးလဝ်ရ။

ကြဴနူပေါဲဗ္တိုက်သီဍုၚ်ကအ်လေန်တုဲ ပ္ဍဲဂိတုနဝ်ဝေမ်ဗာ ၇ ဂှ်လေဝ် ဂကောံဇြဟတ်ပၠန်ဂတးတံ ထပ်သီဂွံလဝ် ဍုၚ်ခါန်ပါတ် ရးသက်ကိုၚ်ဂှ် NUG လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−NUG/Kawlin PDF