ထဝါဲ၊ နဝ်ဝေမ်ဗာ (၈)
အပ္ဍဲပေါဲဗ္တိုက် မက္တဵုဒှ်လဝ် အကြာကွာန် (ဘန်ကြုတ်) ကဵု ကွာန်တကျက်၊ ပွိုၚ်ဍုၚ်တၞၚ်သဳ၊ ရးဒေသဇၞော်တၞၚ်သဳဂှ် ၜါလ္ပာ်ဇီုကပိုက်ချိုတ်တံ နွံလဝ်ရောၚ် ဂွံတီကေတ် အတိုၚ်ဂလာန် ဂကောံဒပ်စဵုဒၞါဒေသတံရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ် ၈၀ ပြၚ်ပါဂှ်ဝွံ ပ္ဍဲဂိတုနဝ်ဝေမ်ဗာ ၆ အခိၚ်လဒေါဝ်တ္ၚဲ ၜိုတ် ၁၂ နာဍဳဂှ် ဟိုတ်နူလုပ်စိုပ်ထ္ပက်ကၠုၚ်ကရောၚ်ပၞာန်ဂှ်ရ အကြာဒပ်ပံၚ်ကောံစဵုဒၞါဒေသတံဂှ် ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် လလအ်ပွိုၚ် ၆ နာဍဳပြၚ်ဂှ် လ္ပာ်ကံၚ်ဇြဳပၞာန် ဟွံအောန်နူကဵု ၃ တၠ ဇီုကပိုက်ချိုတ်လဝ်တုဲ လ္ပာ်ဂကောံဒပ်စဵုဒၞါဒေသတံဂှ် ၂ တၠ ကလိဂွံလဝ်ဝပ်ရောၚ် သ္ဂးရ။
အပ္ဍဲပေါဲဗ္တိုက်ဂှ်ဂှ် နူကဵုတမ်ဒပ်ကံၚ်ဇြဳပၞာန် ခမရ−၅၆၁ ဖျေံသ္ဇိုၚ်ပွိုၚ်ဍုၚ်တၞၚ်သဳဂှ် ဘိုၚ်ပန်ပှော်လဝ်လွဟ်ဇၞော်တုဲ ပန်ပှော်စုတ်လဝ်လွဟ်ဇၞော် အပ္ဍဲကဵုကွာန်ပွဳပွူဗ္ဒါဲတံဂှ်ရ။
တ္ၚဲဏံ ပ္ဍဲဂိတုနဝ်ဝေမ်ဗာ ၇ ဂှ် ပေါဲဗ္တိုက်က္တဵုဒှ်ဟွံမွဲဏီကီုလေဝ် ဟိုတ်နူကရောၚ်ပၞာန်ကံၚ်ဇြဳပၞာန် ဆက်နွံဒၟံၚ်ဂှ်ရ ပရေၚ်ပၞာန်ၜါလ္ပာ်ကြံၚ်မ္ၚိုဟ်ဒၟံၚ်ရောၚ်ဂှ် ဂကောံဒပ်စဵုဒၞါဒေသတံ ဟီုဂးလဝ်ရ။
မ္ၚးနူကဵုပေါဲဗ္တိုက်ၜါလ္ပာ်ဂှ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံတုဲ ညးဒေသ ၅၀၀ ပြၚ် နူကဵုကွာန်တကျက်၊ ဗာန်ကျုက်၊ ဗာန်လဝ်၊ ဂဏာန်ကွေန်တံဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ်ဂှ် ဂွံတီကေတ် ဇရေၚ်ညးဒေသတံရ။
ပ္ဍဲကဵုပွိုၚ်ဍုၚ်တၞၚ်သဳ မလလောၚ်တြးလဝ် ပရေၚ်အုပ်ဓုပ်ပၞာန်ဂှ် အပ္ဍဲဂိတုအံက်တဝ်ဗာတုဲကၠုၚ်တေံ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ပေါဲဗ္တိုက်ၜါလ္ပာ် ဟွံအောန်နူကဵု ၁၀ ဝါ က္တဵုဒှ်လဝ်ရောၚ် ဂကောံသုတေသနအပ္ဍဲဒေသတံ လလောၚ်ပ္တိတ်လဝ်ရ။
ဂကောံဇြဟတ်ပၠန်ဂတးတံဂှ် စနူရာသဳဗြဲကျာတၟးကၠုၚ်စိုပ်ဏံတုဲ ပ္ဍဲကဵုရးတၞၚ်သဳဂှ် ပေါဲဗ္တိုက်ၜါလ္ပာ်တံ သာသ္ကာတ်မြဟ်ကၠုၚ်မာန်ဂှ်ရ နကဵုညးဍုၚ်ကွာန်တံ စွံသတိဗွဲတၟေၚ်တုဲ သွက်ဂွံအာကၠုၚ်အိုတ်ဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Tanintharyi PDF
sanlontai