တိုဝ်ကျိုဝ်၊ နဝ်ဝေမ်ဗာ ၈
ဟိုတ်နူပဋိပက္ခ မက္တဵုဒှ်ဒၟံၚ် ပ္ဍဲဂါဇြာဂှ်တုဲ တၚ်နွံပၟိက်ပရေၚ်ဗ္စာရဏာမၞိဟ် ပါလက်သတိုၚ်တံ မ္ဒးဂဗဒၟံၚ်တံဂှ် သွက်ဂွံရီုဗၚ်ကဵုမာန် အလဵုအသဳဂျပါန် ထံက်ပၚ်ကဵုအာ ဒဝ်ဠာအမေရိကာန် ဗ္ဒါဲ ၆ ပြကောဋိကိုဋ်ဏောၚ်ဂှ် ဝန်ဇၞော်ကာဍုၚ်သ္အာၚ်ဂျပါန် ယိုဝ်ကိုဝ်ကာမဳကာဝါ ဟီုရ။
စပ်ကဵုအစဳဇန် ကဵုအရီုဗၚ် ပရေၚ်ဗ္စာရဏာမၞိဟ်တံဂှ်တုဲ ဝန်ဇၞော်ကာဍုၚ်သ္အာၚ်ဂျပါန် အခိၚ်အာဂေတ်ဝေၚ် ဍုၚ်အေဿရေကဵု ဂျဝ်ဒါန်ဂှ် ဟီုဂးလဝ်ရ။
နကဵုညး ဆဵုဂဗလဝ် ဝန်ဇၞော်ကာဍုၚ်သ္အာၚ် ဍုၚ်အေဿရေကဵု ဍုၚ်ပါလက်သတိုၚ် ၜါဍုၚ်တုဲ အလဵုအသဳဂျပါန်ဝွံ သွက်ဂွံကဵုအရီုဗၚ် ကပေါတ်ကညောတ်ဝတ္ထု ကုဂါဇြာ မဒးဒၟံၚ်ဘဲဒဏ်ပေါဲပၞာန်ဂှ် စဳဇန်ဒၟံၚ်ရောၚ် ဝန်ဇၞော်ဂျပါန် ဟီုဂးလဝ်ကဵု အ္စာပရိုၚ်ဂမၠိုၚ် ပ္ဍဲဍုၚ်ဂျဝ်ဒါန်ရ။
“အေဿရေ ကေုာံ ပါလက်သတိုၚ်တံ ညံၚ်ဂွံပံၚ်တောဲမံၚ်ညးသ္ကအ်တုပ်ပ် ဗွဲမၜိုဟ်လလမ်မာန် ညံၚ်ပွပကီုပရာပ် သ္ဇက်ဒးဂၠိုက်ဟောံအောန်စိုတ်တံ ညံၚ်ဂွိုအ်ထပ်က္တဵုဒှ်ဂှ် ဒးစဵုဒၞါဏောၚ်” ကာမဳကာဝါ ဟီုဂးလဝ်ရ။ နဲကဲသောၚ်ကလးသ္ပသ္ဇိုၚ်ကဵုၜါဍုၚ်ဂှ် နကဵုဂျပါန် ဆက်ထံက်ဂလာန်အာဏောၚ်ဂှ်လေဝ် ဟီုဗပေၚ်စုတ်လဝ်ရ။
ပ္ဍဲဂါဇြာ အခိၚ်အကြေပ်အဂြတ်တံ သၠုၚ်တိုန်ကၠုၚ်မံၚ်ဂှ် ကၠာကောံဓရီု ဝန်ဇၞော်ကာဍုၚ်သ္အာၚ် ဍုၚ်ကွတ်စက် ၇ ဍုၚ်တံ ဂွိုအ်ဆဵုဂဗ ပ္ဍဲတိုဝ်ကျိုဝ်ဏီဂှ် လၟေၚ်တရဴဏံ မံက်ဂတဝ်ကၠုၚ်လဝ်တုဲ သွက်ကမၠောန် ပရေၚ်ဗ္စာရဏာမၞိဟ်တံဂှ် တၚ်အာတ်မိက်သ္ဂောံဒေါအ်ဒေၚ်ကဵုပေါဲပၞာန်ခေတ္တဂှ် အေဿရေ တးပါဲလဝ်ရ။
က္ဍိုပ်သ္ကိုပ်ဂကောံဟေသ်ဗိုဝ်လာ မၞုံပ္ဍဲလက်ဗနန် အဳရာန်မၞုံလက္ကရဴဂှ် ဒဒှ်ရပဋိပက္ခဂမၠိုၚ် ပြးထၞာန်ကၠုၚ် ဒေသသ္ၚိရေၚ်ကၟေၚ်ဆက်တံမာန်ဂှ် ကဵုလဝ်သတိရ။
ပရေၚ်ဗ္တိုက်အေဿရေ လ္တူဒေသဂါဇြာဂှ်ဝွံ လ္တူတၚ်အာတ်မိက် အ္စာပရိုၚ်ဂမၠိုၚ် သွက်ဂွံကဵုတၚ်စၟတ် ဒဒှ်ရလုပ်ဗွိုၚ် သၞောဝ်ဥပဒေတံ နွံ၊ ဟွံမွဲဂှ် ဝန်ဇၞော်ကာဍုၚ်သ္အာၚ်ဂျပါန် ကာမဳကာဝါ ကယျာန်ပါဲလဝ်တုဲ ညးမပါလုပ်ဆက်စပ်ဂမၠိုၚ်ဝွံ ဒးဒ္ဂေတ်ဗက် သဘဴစိုတ်ကဵုအရီုဗၚ် အခေါၚ်အရာမၞိဟ်တံဏောၚ်တုဲ ဟွံမွဲပၟိက်မွဲသာ် ကောန်အရာပ်မ္ဒးချိုတ်တံ ညံၚ်ဂွိုအ်ဒှ်ဂှ် ဟီုဂးလဝ်ရ။
Ref: Reuters
sanlontai