ပ္ဍဲကအ်ကြိက် ဟိုတ်နူဒးဒုၚ်ဗတိုက်လဝ်ကဵု က္ၜၚ်ကျာမသက္ကုမၞိဟ်ဒဳတုဲ ကောန်ဒပ်ကံၚ်ဇြဳပၞာန် (၃) တၠ ဒးချိုတ်လဝ်

ကအ်ကြိက်၊ နဝ်ဝေမ်ဗာ (၉)

ဟိုတ်နူဒပ်ကံၚ်ဇြဳပၞာန် ဖျေံလဝ်ဗဒိုပ် ပ္ဍဲဘာလကျာ် ဍုၚ်ကအ်ကြိက် တွဵုရးကရေၚ် ဒးဒုၚ်ဗတိုက်လဝ်ကဵုက္ၜၚ်ကျာမသက္ကုမၞိဟ်ဒဳတုဲ ပါလုပ်သီုသ္ကိုပ်ဒပ်လ္ပာ်မွဲတၠ ကောန်ဒပ်ကံၚ်ဇြဳပၞာန် ဒးချိုတ်လဝ် (၃) တၠရဂှ် ကရောၚ်ပၞာန်ကျာဖျူ လလောၚ်တြးလဝ်ပရိုၚ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၈) ရ။

ဂိတုနဝ်ဝေမ်ဗာ စၟတ်တ္ၚဲ (၇) အခိၚ်ဇိုၚ်သဝ်တ္ၚဲ ကောန်ဒပ်ကံၚ်ဇြဳပၞာန်ဖျေံလဝ်ဗဒိုပ် ပ္ဍဲကဵုဘာလကျာ်ဇိနသုခဂှ် ဂကောံဇြဟတ်ပၠန်ဂတးတအ် မွဲကရောံကဵုပရေၚ်ချဳဒရာၚ်ဗလးကျာ ပန်ဗတိုက်လဝ်ကဵုက္ၜၚ်ကျာမသက္ကုမၞိဟ်ဒဳ ဟွံအောန်နူ (၆) အလန်ရ။

ဟိုတ်နူဒးဒုၚ်ဗတိုက်လဝ်ကဵုက္ၜၚ်ကျာမသက္ကုမၞိဟ်ဒဳတုဲ နူကဵုတံဒပ်ကံၚ်ဇြဳပၞာန် စၟတ် (၉၇) ပါလုပ်သီုသ္ကိုပ်ဒပ်လ္ပာ် မွဲတၠ ဒးချိုတ်လဝ် ၃ တၠတုဲဂှ် ဇွတအ်ဂှ် နူကဵုတံဒပ်ကၠုၚ်ပ္ဍိုက်ကေတ်ဏာလဝ် လွာဲဂှ်ရဂှ် ပါလုပ်ဒၟံၚ် ပ္ဍဲတၚ်လလောၚ်တြး ကရောၚ်ပၞာန်ကျာဖျူရ။

ပ္ဍဲကဵုဒၞာဲတံဒပ်ကံၚ်ဇြဳပၞာန်ကဵု ဒၞာဲဒပ်ကံၚ်ဇြဳပၞာန်ဖျေံလဝ်ဗဒိုပ် မၞုံလ္တူဍုၚ်ကအ်ကြိက်တအ်ဂှ် ဂကောံဇြဟတ်ပၠန်ဂတး ဒပ်ဒရုမ်ပံၚ်ကောံတအ် ကၠောန်သ္ပချဳဒရာၚ်ဒၟံၚ် ပရေၚ်ပန်ဗတိုက်ဂြာတ်ထောံဖျေံဗုမ် ကဵုဒရုမ်၊ က္ၜၚ်ကျာမသက္ကုမၞိဟ်ဒဳတအ် ခြာဟွံလအ်ဟွံလအ်တုဲ လ္ပာ်ဒပ်ကံၚ်ဇြဳပၞာန်လေဝ် ကလေၚ်ပန်ဖျေံနၚ်ဒၟံၚ်လွဟ်ဇၞော်တအ် ကြာန်ကြာန် နွံရ။

ဟိုတ်နူပရေၚ်ပန်ပှ်ောၜါလ္ပာ် ဗီုလၟုဟ်ဏံတုဲ ပရေၚ်ကောန်အရာပ်တအ် ဇီုကပိုက်ဒးချိုတ် နွံဒၟံၚ်တုဲ ပ္ဍဲကဵုတုဲကၠုၚ်မွဲၜါတ္ၚဲတေံဂှ်လေဝ် ဟိုတ်နူလွဟ်ဇၞော်ပြဟ်စှ်ေပါ်ခတိုဟ်လဝ် လ္တူဍုၚ်ကအ်ကြိက်တုဲ ဂကောံသ္ၚိကၟိန်မၞိဟ် (၅) တၠ ဒးလဝ်ဘဲဝပ် နွံရ။

ပ္ဍဲဂိတုအံက်တဝ်ဗာစၟတ်တ္ၚဲ (၂၇) ကဵု (၂၈) တုဲကၠုၚ်တေံဂှ် ဂကောံပံၚ်တောဲပရေၚ်ပၠန်ဂတးတအ် လုပ်စိုပ်က္ဍိုက်ဗတိုက်လဝ် ဒၞာဲဒပ်ကံၚ်ဇြဳပၞာန် ဖျေံလဝ်ဗဒိုပ်တအ်တုဲ ပေါဲဗတိုက်ၜါလ္ပာ်သ္ကာတ်မြဟ်က္တဵုဒှ်လဝ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်မ်

ဗီု – ကရောၚ်ပၞာန်ကျာဖျူ