ကျာ်ထဝ်၊ နဝ်ဝေမ်ဗာ (၉)
တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ရုၚ်ဌာနက္ဍိုက်က္ဍိုပ်ပရေၚ်အုပ်ဓုပ်နာနာ ဍုၚ်တုၚ်ဇြယာတ်ဂှ် ဟိုတ်နူဒးဒုၚ်ဗတိုက်လဝ်ကဵုဒရုမ်တုဲ ပရေၚ်ဇီုကပိုက် ဒးချိုတ်လဝ် နွံဂၠိုၚ်မာန်ဒၟံၚ်ရဂှ် ဂွံတီကေတ် နူညးဒေသတအ်ကီု သီုကဵုဂကောံဇြဟတ်ပၠန်ဂတးတအ်ရ။
ဂိတုနဝ်ဝေမ်ဗာ စၟတ်တ္ၚဲ (၇) အခိၚ်ဒေါဝ်တ္ၚဲ ၜိုတ် (၁၁) နာဍဳဂှ် ပ္ဍဲကဵုရုၚ်ဌာနက္ဍိုက်က္ဍိုပ်ပရေၚ်အုပ်ဓုပ်နာနာ ဍုၚ်တုၚ်ဇြယာတ် ဃောကၠောန်ဒၟံၚ်အခန်ကၞာစၟတ်သမ္တီ ပေၚ် ၃၅ သၞာံဂှ် ဂကောံဇြဟတ်ပၠန်ဂတးတအ် ထောံဖျေံလဝ်ဗုမ်ကဵုဒရုမ် (၂) မတုဲ ဗတိုက်လဝ်ရ။
ပ္ဍဲပရေၚ်ဒးဒုၚ်ဗတိုက်လဝ်ကဵုဒရုမ်ဂှ် ဗုမ်ဒတုမ်စှ်ေပါ်ခတိုဟ်လဝ် လ္တူကၟဳရုၚ်အုပ်ဓုပ်နာနာ (၁) မတုဲ သှ်ေ (၁) မဂှ် ဒတုံစှ်ေပါ်ခတိုဟ်လဝ် ဗ္ဒာဲပါၚ်ဂၠံၚ်လုပ်ရုၚ်ရဂှ် လ္ပာ်ဂကောံဇြဟတ်ပၠန်ဂတးတအ် ဟီုလဝ်ရ။
ဟိုတ်နူရုၚ်အုပ်ဓုပ်နာနာ ဒးဒုၚ်ဗတိုက်လဝ်ကဵုဒရုမ်ဏံ ဒးချိုတ်လဝ် (၁) တၠ ဒးလဝ်ဘဲဝပ် (၁၀) တၠရဂှ် ၜိုန်ရလ္ပာ်ဂကောံဇြဟတ်ပၠန်ဂတးတအ် ဟီုဂးဒၟံၚ်ကီုလေဝ် နကဵုသြၚ်လောန်တိုၚ်မ် သ္ပဒ္တန်တၞဟ်ခြာဟွံမာန်ဏီရ။
ညးဒေသမွဲတၠဂှ်မ္ဂး ဒဒှ်ရရုၚ်ပရေၚ်အုပ်ဓုပ်ဂှ် ဒးဒုၚ်ဗတိုက်လဝ်ဍာံဍာံကီု အကာဲအရာပရေၚ်ဇီုကပိုက် ဒးချိုတ်လဝ် သောဲသောဲဗြောဲဗြောဲ ဟွံဂွံတီကေတ်ဏီကီုဂှ် ဟီုလဝ်ရ။
ညးဒေသသ္အာၚ် မွဲတၠပၠန်ဂှ်လေဝ် ပ္ဍဲပရေၚ်ရုၚ်အုပ်ဓုပ်နာနာ ဒးဒုၚ်ဗတိုက်လဝ်ကဵုဒရုမ်ဏံ ညးယိုက်ဝန် (၂) တၠကဵု တၠဆေၚ်ကၠေၚ်တုၚ်ဇြယာတ်မွဲတၠ စိုပ်ကၠုၚ်လဝ် ရုၚ်ဂဥုဲတုၚ်ဇြယာတ်ကီု ညးဒးလဝ်ဘဲဝပ်သှ်ေနူတအ်ဂှ် ပြံၚ်စၠောံလဝ် ရုၚ်ဂဥုဲလဂုၚ်ရဂှ် ဟီုလဝ်ရ။
စပ်ကဵုအကာဲအရာ ရုၚ်ဌာက္ဍိုက်က္ဍိုပ်ပရေၚ်အုပ်ဓုပ်နာနာ ဍုၚ်တုၚ်ဇြယာတ် ဒးဒုၚ်ဗတိုက်လဝ်ဏံတုဲ ၜိုန်ရသြၚ်လောန်တိုၚ်မ် ဆက်စၠောံသၟာန်ဇာန်လဝ် ဒံက်တာအောၚ်မျေတ်ကျဝ်သုၚ် ညးမၞုံအခေါၚ်ဟီုဂး အလဵုအသဳကံၚ်ဇြဳပၞာန် တွဵုရးဍုၚ်မန်ကီုလေဝ် ဒုၚ်တဲဟီုသှ်ကဵုလဝ် ဟၟဲရ။
ကြဴနူရုၚ်အုပ်ဓုပ်နာနာ ဒးဒုၚ်ဗတိုက်လဝ်တုဲဂှ် နူကဵုဒပ်အမၠံက်ကံၚ်ဇြဳပၞာန် ဟိုတ်နူပန်ဖျေံနၚ်လွဟ်ဇၞော် ဒၟာနူဒတုံစှ်ေပါ်ခတိုဟ်လဝ် ပ္ဍဲကွာန်တနဝ်တုဲ ညးဒေသ (၄) တၠ ဒးချိုတ်လဝ်တုဲ ဒးလဝ်ဘဲဝပ် (၇) တၠရဂှ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
ဗီု – CJ
sanlontai