မဂွေ – နဝ်ဝေမ်ဗာ (၈)
ဟိုတ်နူပေါဲဗတိုက်သီဗဒိုပ်ဗဒိုပ်ကံၚ်ဇြဳပၞာန်ကဵု ပေါဲဗတိုက်သီဍုုၚ် ဂကောံဇြဟတ်ပၠန်ဂတးတအ်တုဲ ပ္ဍဲခရိုၚ်မေန်ဗူ ရးဒေသမဂွေ ပတေၚ်ဂြတ်ကၠုၚ်လဝ် ပရေၚ်ဂီုကၠီုရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်မ်။
ပြဟ်ဟ်ဏံ ပ္ဍဲကဵုခရိုၚ်မေန်ဗူ မွဲဒမြိပ်ဂၠံၚ် ဖာသီ-မုမ်ယွာဂှ် ဖျေံစွံလဝ်ကၚ်တုဲ ပရေၚ်စၟဳစၟတ်တအ်လေဝ် ဟိုတ်နူတေၚ်ဂြတ်ဒၟံၚ်ဂှ်ရ ညးသွံဖျာတအ်ကဵု ညးဒေသတအ် ဒးဆဵုဂဗဒၟံၚ်တၚ်ခက်ခုဲ ပရေၚ်အာကၠုၚ်ရ။
“ဒၟာနူမိၚ်လဝ် ကၠုၚ်သီဗဒိုပ်ဟီုတုဲ ဖျေံစွံလဝ်ကၚ် မွဲဒမြိပ်ဂၠံၚ် ဖာသီ-မုမ်ယွာဂှ် ဇြဟတ်ဗွဲမဂၠိုၚ်ရ။ ရပ်ဒက်ၜုၚ်တက်ဒၟံၚ် မၞိဟ်ဒှ်သံသယတအ်ကီု။ ပ္တိုန်လဝ်မံၚ်လွဟ်တုဲတုဲ ဗျာံဒၟံၚ်ရ” ဂှ် ညးဒေသ မံၚ်ဒၟံၚ် ဗ္ဒာဲဖာသီ-မုမ်ယွာမွဲတၠဂှ် ဟီုလဝ်ရ။
ပါဲနူဏံပၠန် ကောန်ဒပ်ကံၚ်ဇြဳပၞာန်တအ်ဂှ် ကၠာနူတ္ၚဲသီအဝဵု ဟွံပေၚ်လ္ၚီတ္ၚဲဏီ ပ္ဍဲကဵုပွိုၚ်ဍုၚ်ပွိဖျူ၊ သလေန် ကဵုပွိုၚ်ဍုၚ်မေန်ဗူတအ်ဂှ် ပတေၚ်ဂြတ်လဝ် ပရေၚ်ဂီုကၠီုရဂှ် ညးဟီုလဝ်ဏီရ။
ပ္ဍဲကဵုပွိုၚ်ဍုၚ်တအ်ဂှ် နူကဵု ၜိုတ် (၉) နာဍဳဗ္တံ စဵုကဵု (၂) နာဍဳနူဂယး စၟဳစၟတ်ဒၟံၚ်တုဲ သီုကဵုစၟဳစၟတ်ဒၟံၚ် ဖုၚ်ညးဍုၚ်ကွာန်တအ် နွံဒၟံၚ်တုဲ ဟိုတ်နူပရေၚ်စၟဳစၟတ်စရၚ်ကၟုဲ အခိၚ်ဟွံထေၚ်လဝ်မွဲသာ်ကီု၊ ပရေၚ်ဖံက်ပန်လွဟ် အခိၚ်ဗ္တံတအ်တုဲ ညးဒေသတအ်ဒးဒှ်ဓဝိၚ် ဂွိၚ်ဂွာဲဂၠိုၚ်တိုန်ဒၟံၚ်ရ။
“အကာဲအရာတိဍာ်ဂှ် ညိၚ်ဒၟံၚ်ရ။ ၝတအ်ဏံဖေက်တုဲ ကၠောန်ဒၟံၚ်။ ကၠာတေံတှ်ေ ပ္ဍဲကဵုသၞေဟ်ကၚ်ဂှ် စခ နွံၜိုတ်မသုန်တၠဓဝ်ရ။ လကြဴဏံမှ ပံၚ်ကဵုပျူတအ်တုဲ ကၠောန်ဒၟံၚ်။ အဓိကဂှ် ပ္ဍဲကဵုတွဵုရးသေံသၟဝ်ကျာကဵု ရးသေတ်ဂါၚ်မဂွေတအ်ဂှ် ဍေံတအ်ဒးဗလးလဝ်တဲ ဗဒိုပ်ဍေံတအ်ဂှ်ရ ဖေက်ဒှ်ဗီုဂှ်တုဲ ကဵုဒၟံၚ်ဒဒိုက်ကဵုညးဍုၚ်ကွာန်တအ်ရ” ဂှ် ကောန်ဒပ်စဵုဒၞာညးဍုၚ်ကွာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
နကဵုညးဍုၚ်ကွာန်တအ် ပရေၚ်ဒပ်ကံၚ်ဇြဳပၞာန် ၜုၚ်တက်စၟဳစၟတ်ကီု သီုကဵုပရေၚ်ချဳဒရာၚ်တိဍာ်တအ်ဂှ် သွက်ဂွံကဵုသမ္တီ ဇရေၚ်တံဒပ်မဆေၚ်စပ်ဂှ် ဗတိုက်ဖ္အောဝ်လဝ်ရ။
ကံၚ်ဇြဳပၞာန်ဂှ် ဗပေၚ်ဒၟံၚ်ဇြဟတ် ပ္ဍဲကဵုဗဒိုပ်ဖျေံသ္ဇိုၚ် မၞုံပွိုၚ်ဍုၚ်သလေန်၊ ဇြေတုတ္တရာ ကေုာံ ပွိုၚ်ဍုၚ်ပွိဖျူ ပ္ဍဲကဵုခရိုၚ်မေန်ဗူတအ်တုဲ ပ္ဍဲလ္ပာ်ကေန်ပွောန်ချောၚ် ပွိုၚ်ဍုၚ်သလေန်ဂှ်လေဝ် ထ္ပက်ဒၟံၚ်ကရောၚ်ပၞာန်ရဂှ် ဂွံတီကေတ်ရ။
ပ္ဍဲကဵုခရိုၚ်ဂဂဝ်ကဵု ခရိုၚ်ပခုက္ကူဂှ်မ္ဂး ပေါဲဗတိုက်သ္ကာတ်မြဟ်ဒၟံၚ်တုဲ ဂကောံစဵုဒၞာတအ် သီဂွံလဝ် ဗဒိုပ်ဗၠာဲသၟိၚ်မေန်ယွာတုဲ ဗဒိုပ်ဗၠာဲသၟိၚ်တောၚ်ယာန်ဂှ်မ္ဂး နူလ္ပာ်ဒပ်ကံၚ်ဇြဳပၞာန်တအ် ဂြိပ်ဒဴတိတ်လဝ်ရ။
ပရိုၚ် – သြၚ်လောန်တိုၚ်မ်
ဗီု – CJ
sanlontai