အပ္ဍဲကာလသီအဝဵုဏံ ကောန်ဗော် NLD ၁၀၀ ပြင် ချိုတ်အာ

လ္ဂုၚ်၊ နဝ်ဝေမ်ဗာ ၉

အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံဘာ်ပြၚ်ဏံ ဟိုတ်နူကံၚ်ဇြဳပၞာန်တုဲ ပါလုပ်သီုကဵုညးစၞးကၠတ်ထဝ်ဗော် NLD တံဂှ် ကောန်ဗော်အပံၚ် ၁၀၁ တၠ ချိုတ်အာလဝ်ရောၚ် ဗော်ဂအုပ်ဒဳမဝ်ကရေဇြဳကောန်ဂကူ NLD လလောၚ်ပ္တိတ်လဝ်ရ။

အခိၚ်လလောၚ်ပ္တိတ် တၚ်လလောၚ်တြးလစွံစိုတ် တ္ၚဲကၠောန်ဗဒှ်ပေါဲရုဲမာဲ ၂၀၂၀ ပေၚ်ပိသၞာံ ပ္ဍဲကဵုဂိတုနဝ်ဝေမ်ဗာ ၈ တ္ၚဲဏံဂှ် ထ္မံက်ထ္ၜးစုတ်လဝ်ရ။

အတိုၚ်တၚ်နၚ် ဂကောံကံက်ကပှ်စၟတ်သမ္တီဝးပ္ကဝ်အခေါၚ်အရာမၞိဟ် ဗော် NLD မဒက်ပ္တန်လဝ် ( NLD-HRD T) ဂှ်မ္ဂး နူကဵုသၞာံ ၂၀၂၁ ဂိတုဖေဖဝ်ဝါရဳ ၁ စဵုကဵုဂိတုနဝ်ဝေမ်ဗာ ၁ သၞာံဏံဂှ် ညးစၞးကၠတ်ထဝ် NLD တံပါလုပ်ဂှ် ကောန်ဗော်အပံၚ်ဖအိုတ် ၁၂၉၀ တၠ ဒးဒုၚ်ရပ်ဒက်လဝ်ရ။

သ္အာၚ်နူဂှ်ပၠန် ကံၚ်ဇြဳပၞာန် လုပ်စိုပ်ၜက်ၜေတ်လဝ် ရုၚ်ဗော် NLD ၁၆၀ ဝါပြၚ်တုဲ သီုကဵုကၟာတ်လဒဵုလဝ် သ္ၚိဒၟံၚ်ကောန်ဗော် NLD ၄၀၇ တၠ ပါလုပ်သီုကဵု ညးစၞးကၠတ်ထဝ် NLD ၁၈၂ တၠဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

စံၚ်ပလီုပလာ်လဝ် သ္ၚိဒၟံၚ်ညးဍုၚ်ကွာန်ကောန်အရာပ်တံဂှ် ၁၄၉၈ ဝါတုဲ သ္ၚိ ၆၀၀၀၀ ပြၚ် လီုလာ်ဆောံလေၚ်အာလဝ်ဂှ်လေဝ် လလောၚ်ပ္တိတ်လဝ်ရ။

ဟိုတ်နူဒပ်ကံၚ်ဇြဳပၞာန် ထ္ပက်ကရောၚ်ပၞာန် လုပ်စိုပ်ကၠုၚ်ဂှ်ကီု၊ ဗ္တိုက်ကဵုတရဴကျာကီု၊ ရပ်ဒက်ပျဲပျာံတံကဵု ဟိုတ်နူဂစိုတ်ဂယိုၚ်ပကီုပရာပ် ဂကောံဗော်သွးသၟဝ်တဲကံၚ်ဇြဳပၞာန်တံဂှ်တုဲ ညးဍုၚ်ကွာန်ကောန်အရာပ် အပံၚ်ဖအိုတ် ၄၀၉၅ တၠ ချိုတ်အာလဝ်ရောၚ် သ္ဂးရ။

နကဵုဗော် NLD သွက်ဂွံဒက်ပ္တန်ကၟိန်ဍုၚ်ပံၚ်ကောံ ဖေဝ်ဒရာဒဳမဝ်ကရေဇြဳမာန်ဂှ်ကဵု ပံၚ်တောဲရေၚ်တၠုၚ်အာ ကုဂကောံအဖဝ်မိတ်ဂမၠိုၚ်၊ ဂကောံဇြဟတ်ကောန်ဍုၚ်အရၚ် မဒစဵုဒစး ပရေၚ်သီအဝဵု ကရောံညးဍုၚ်ကွာန်တံဏောၚ်ဂှ်လေဝ် ဟီုဂးလဝ်ရ။

သ္အာၚ်နူဂှ်ပၠန် ပါလုပ်သီုကဵုဥက္ကဌဗော် ဒဝ်အံၚ်သာန်သုကျဳဂှ် ညံၚ်ဂွံဗလးကဵု ကောန်ထံၚ်ပရေၚ်ဍုၚ်ကွာန်သီုဖအိုတ် ဗွဲမပြဟ်ဂှ်ကဵု အမှုရာဇဝတ်ကံၚ်ဇြဳပၞာန် ကလိလောန်တံဂှ် သွက်ဂွံထ္မံက်ပ္တိတ်ကေတ်အရေဝ် ဗွဲမကိတ်ညဳကဵု သၞောဝ်ဍုၚ်သ္အာၚ်တံမာန် ကုလသမဂ္ဂကီု ဂကောံဗော်သွးနာနာ ကေုာံ ကၟိန်ဍုၚ်နာနာတံ သွက်ဂွံရီုဗၚ်ကဵု လ္တူနူဏံ ဗွဲမစိုပ်တရဴမာန်ဂှ် ဗော် NLD ဒုၚ်လဝ်ဂုဏ် နမေတ္တာရ။

ပရိုၚ်−သြၚ်လောန်တိုၚ်(မ်)

ဗီု−Social Media

လိက်ဗီု− သွက်ဂွံဇၞးပေါဲရုဲမာဲ အခိၚ်ကောန်ဗော် NLD တံ ဂေတ်ဂေၚ်ဒၟံၚ်