ၚုဟ်သြန်ဂိတုသ္ဇိုၚ်တၟိ ဍုၚ်သေံဂှ် အပ္ဍဲဂိတုဒဳဇြေမ်ဗာဏံ လလောၚ်ပ္တိတ်အာဏောၚ်

ၜၚ်ကံက်၊ နဝ်ဝေမ်ဗာ ၈

အပ္ဍဲဂိတုဒဳဇြေမ်ဗာဏံ ၚုဟ်သြန်ဂိတုသ္ဇိုၚ်သဝ်အိုတ် ဍုၚ်သေံဂှ် သွက်ဂွံလလောၚ်တြးအာနွံဒၟံၚ်တုဲ ၚုဟ်နှေန်တၟိဏံဝွံ မွဲတ္ၚဲမ္ဂး အောန်နူကဵု ၄၀၀ ၝာတ်ရဟေၚ် ဒှ်မာန်ဏောၚ်ဂှ် ဝန်ဇၞော်ကောန်ကလောန်ဍုၚ်သေံ ဟီုရ။

တန်တဴကဵု အကာဲအရာပရေၚ်ပိုန်ဒြပ်တံကဵု ခရိတ်မံၚ်စံၚ်တံဂှ်တုဲ ပရေၚ်ခုတ်ၚုဟ်သြန်ဂိတု ခရိုၚ်ဒေသန္တရမွဲကုမွဲဂှ်ဝွံ ပြံၚ်လှာဲမာန်ရောၚ် ညးဟီုဂးလဝ်ရ။

စနူဂိတုအံက်တဝ်ဗာ ၁၊ သၞာံ ၂၀၂၂ ဂှ်တုဲ ပ္ဍဲကဵုခရိုၚ်ဒေသန္တရ ဍုၚ်သေံ ၇၇ ဂှ် ခုတ်လဝ်ၚုဟ်သြန်ဂိတုအောန်အိုတ်ဂှ် နွံဒၟံၚ် ၉ သာ်ရောၚ် ဂွံတီကေတ်ရ။

သြန်ဂိတုသၠုၚ်အိုတ် မွဲတ္ၚဲဂှ် ပ္ဍဲကဵုဖူခက်၊ ရယံၚ် ကေုာံ ပ္ဍဲချောန်ဘူရဳတံဂှ် ၃၅၄ ၝာတ်၊ ပ္ဍဲၜၚ်ကံက်၊ နန်ထဘူရဳ၊ ပထုံဌာနဳ၊ နခေါန်ပထုံ၊ သမုတ်ပါရာကာန် ကေုာံ သမုတ်သာခံၚ်တံဂှ် မွဲတ္ၚဲမ္ဂး ၃၅၃ ၝာတ်တုဲ ပ္ဍဲကဵုခရိုၚ်ဒေသန္တရဍုၚ်သေံ သှ်ေဒၟံၚ်တံဂှ် မွဲတ္ၚဲ ကလိဂွံဒၟံၚ် နူကဵု ၃၃၈ ၝာတ် စဵုကဵု ၃၄၅ ၝာတ်ရ။

စပ်ကဵုခုတ်ၚုဟ်သြန်ဂိတုသဝ်အိုတ်သာ်ဏံဂှ်တုဲ ကံက်ကေတ်လညာတ် သၟာကမၠောန်တံဂှ် သၟာကမၠောန်ဗွဲမဂၠိုၚ်ဝွံ သွက်ဂွံသၠုၚ်ပ္တိုန် ၚုဟ်သြန်ဂိတုအောန်အိုတ်ဏံ ဟွံမွဲပၟိက်ဂှ်လေဝ် ဂွံတီကေတ်ရ။

သ္အာၚ်နူဂှ်ပၠန် အပ္ဍဲကဵုဍုၚ်သေံဂှ် ခရိတ်အာကၠုၚ်တံကဵု ၚုဟ်ဒးလိၚ်မံၚ်စံၚ်တံ သၠုၚ်ဒၟံၚ်ဂှ်ရ ဂွိၚ်ဒၟံၚ် ဖေက်ဒှ်အာမၞိဟ်ကလောန်ဟွံမွဲတံသၟးတုဲ ဒဒှ်ရဟွံမိက်ဆုဲပြံၚ် တွဵုရးတၞဟ်သ္အာၚ်တံဂှ်လေဝ် သှ်ကဵုလဝ်ရ။

ၚုဟ်သြန်ဂိတုတၟိ မလလောၚ်ပ္တိတ်အာ အပ္ဍဲဂိတုဒဳဇြေမ်ဗာဏံဂှ် ထ္မံက်ထ္ၜးအာ ပ္ဍဲ Royal Gazette ဏောၚ်ဂှ် ဂွံတီကေတ်ရ။

ချာလဳလွိုၚ်ဇြောန် မဒှ်ညးစၞးသၟာကမၠောန် ကမ္မတဳပ္ညဳပ္ညပ်သၟာကမၠောန်သေံဂှ် သွက်အလုံဍုၚ်မွဲ ၚုဟ်ခရိတ်ကမၠောန် မွဲတ္ၚဲမ္ဂး သွက်ဂွံခုတ်ကဵု ၄၉၂ ၝာတ်ဂှ် ပၠောပ်လဝ်ဂလာန်ရ။

ဗော် Pheu Thai ဂှ်လေဝ် ပ္ဍဲအခိၚ်စန်ဒက်ပေါဲရုဲမာဲတေံ ယဝ်ရညးတံဒှ်အလဵုအသဳမ္ဂး အပ္ဍဲပွိုၚ် ၄ သၞာံ ၚုဟ်ကမၠောန်မွဲတ္ၚဲ အောန်အိုတ် ခုတ်ကဵုအာ ၆၀၀ ၝာတ်ဏောၚ်ဂှ် ကေၚ်ဟီုဂးလဝ်ရ။

Ref: Thai PBS