ဂကောံဒေါအ်ပန်ပှော်ဂမၠိုၚ် ဂွံပါလုပ် ပ္ဍဲကဵုပေါဲဗ္တိုက်တံဂှ် ဟွံစၟဳပုဟ်ဂှ် ဒုဝန်ဇၞော်ကာစဵုဒၞါ NUG ဟီု

နေဗျဳဒဝ်၊ နဝ်ဝေမ်ဗာ ၁၇

ပ္ဍဲကဵုပေါဲဗ္တိုက်သီဗ္ဒိုပ်သီဍုၚ် မက္တဵုဒှ်ဒၟံၚ် အလုံဍုၚ်မွဲဂှ် ဂကောံရပ်လွဟ်ကောန်ဍုၚ်အရၚ်ဒေါအ်ပန်ပှော် EAO မသဳကၠဳဒၟံၚ်ပရေၚ်ၜိုဟ်လလမ် ကုကံၚ်ဇြဳပၞာန်တံ ဂွံပါလုပ်ကၠုၚ်ဂှ် ဟွံစၟဳတ်လဝ်ပုဟ်ဂှ် ဒုဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG နာဲကဴရတ် ဟီုရ။

စပ်ကဵုချဳဒရာၚ်ပၞာန် ၁၀၂၇ နူကဵုရာမည FM ဖျေံသ္ဇိုၚ်တွဵုရးဍုၚ်မန် မဗလးပ္တိတ်လဝ် ပ္ဍဲဂိတုနဝ်ဝေမ်ဗာ ၁၅ တေံဂှ်တုဲ အပ္ဍဲသၟာန်သှ်ဆဵုဂဗတၞဟ်ခြာဂှ် နာဲကဴရတ် သှ်ကဵုလဝ် နကဵုဘာသာမန်ရ။

နာဲကဴရတ်ဝွံ ၜိုတ်ခါတ်စမ်ရံၚ်အကာဲ ဂကောံထ္ပက်လဝ်စၟတ်တဲ NCA တံဂှ်မ္ဂး ဗော်သွးကောန်ဂကူကရေၚ် KNU ကဵု ဒပ်ပၠတရဴကောန်ဂကူချေၚ် CNF တံဂှ် တိတ်အာနူ NCA တုဲ ဂကောံကွးဘာ ABSDF ဂှ်လေဝ် ပံၚ်တောဲလဝ်ကဵု ဇကုတံရောၚ်ဂှ် ဟီုရ။

ဂကောံထ္ပက်လဝ် NCA သှ်ေဒၟံၚ်ဂမၠိုၚ် ဗော်ဍုၚ်မန်တၟိကဵု ဂကောံပါ်တိတ်ဂမၠိုၚ် ကံၚ်ဇြဳၜိုဟ်လလမ်ကရေၚ် KNU/KNLA-PC ကေုာံ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် DKBA တံပါလုပ်ဂှ် ဗော်ဗၠးၜးကောန်ဂကူရခေၚ် ALP တံဝွံ ဇြဟတ်ရုမ်မ်ဂပ်ပ်ဟွံမွဲပုဟ်ဂှ် သ္ဂးရ။

ပ္ဍဲကဵုအကာဲအရာသာ်ဏံဂှ် ဂကောံတံဏံ ဂွံပါလုပ်အာ ပ္ဍဲကဵုပေါဲဗ္တိုက်ထပိုတ်ရိုဟ်ကၞက် သၞောတ်တၠအဝဵုပၞာန်တံဂှ် ပါလုပ်ကဵုဒှ်၊ ဟွံပါကဵုဒှ် နကဵုဇကုတံ ဟွံစၟဳလဝ်ကွေံကွေံပုဟ်ဂှ် ဟီုဂးလဝ်ရ။

သ္အာၚ်နူဂှ်ပၠန် ဗော်ဍုၚ်မန်တၟိဝွံ ဒၟါနူဂွိၚ်ဖေက်ဇီုကပိုက်ဒး ကောန်ဂကူမန်တံဂှ်တုဲ ညးတံ ပါကီု၊ ဟွံပါကီုဂှ် တန်တဴဒၟံၚ် လ္တူတၚ်သ္ဂုတ်သွာတ်ညးတံရောၚ်ဂှ် နာဲကဴရတ် ဟီုရ။

ဆ္ဂး နာဲကဴရတ်ဂှ် ပ္ဍဲကဵုပေါဲဗ္တိုက်ပၠန်ဂတးက္ညၚ်ဏံ ယဝ်ရရံၚ်ကဵုဂကူကောန်ဍုၚ်အရၚ်တံဂှ်မ္ဂး ဍိုက်ပေၚ်ဒၟံၚ်တုဲ ပ္ဍဲပေါဲဗ္တိုက်ဏံ ဇကုတံ သွက်ဂွံဂွံပေါဲအံၚ်ဇၞးရဏောၚ်ဂှ် သ္ဂးရ။

နကဵုသြၚ်လောန်တိုၚ်(မ်) စပ်ကဵုဂလာန်နာဲကဴရတ်ဏံဂှ်တုဲ ဆက်စၠောံလဝ်ဖုၚ် ဇရေၚ်ညးမၞုံအခေါၚ်ဟီုဂး ဂကောံဒေါအ်ပန်ပှော် သ္ကိုပ်ဗိုလ်ဇၞော် သဝ်ကျဝ်ညောအ်ကဵု ညးဒုၚ်တာလျိုၚ်ကေၚ်ကာအပ္ဍဲဍုၚ် ဗော်ဍုၚ်မန်တၟိ နာဲဗညာလဴတံ ဟွံအောန်နူကဵု ၃ ဝါကီုလေဝ် ဒုၚ်တဲသှ်ကဵုလဝ်ဂှ် ဟွံမွဲဏီရ။

ဌာနဝန်ဇၞော်ကာစဵုဒၞါ NUG ဝွံ ဒပ်ပၞာန်စဵုဒၞါညးဍုၚ်ကွာန် PDF သၟဝ်တဲဂှ်ကဵု ဂကောံရပ်လွဟ်ကောန်ဍုၚ်အရၚ်ဂမၠိုၚ် ဂကောံကချေၚ် KIA, ဂကောံချေၚ် CNF ၊ ဂကောံကရေၚ်ဍာဲ KNPP ၊ ဂကောံကရေၚ် KNU ကေုာံ ဂကောံကွးဘာ ABSDF တံ ပံၚ်တောဲရေၚ်တၠုၚ်ဒၟံၚ်ရ။

ဂကောံမဟာမိတ်ကောဒေံပိဂကောံ ဒပ်ပၞာန်ရခေၚ် AA ၊ ဂကောံကဝ်က MNDAA ကေုာံ ဂကောံတအာၚ် TNLA တံဝွံ ပ္ဍဲကဵုဂိတုအံက်တဝ်ဗာ သ္ကုတ်လက္ကရဴဏံဂှ် စလဝ် ချဳဒရာၚ်ပၞာန် ၁၀၂၇ ဂှ်တုဲ ဒဵုကဵုတ္ၚဲဏံ လုပ်ဒၟံၚ်ပေါဲဗ္တိုက်သၟဟ်ညဳ ကုဒပ်ပံၚ်ကောံမဟာမိတ်တံရ။

စပ်ကဵုဗျူဟာပရေၚ်ပၞာန် ဒပ်ပၞာန်တံဂှ်တုဲ နာဲကဴရတ်ဂှ် ဒပ်ပၞာန်ဝွံ ဟိုတ်နူဒုၚ်သ္ဇိုၚ်ကဵု ညးဍုၚ်ကွာန်တံဂှ်ရ လွဟ်လက်နက်တံ က္ၜၚ်ကျာတံ ၜိုတ်လဵုခိုဟ်ဟ် မၞိဟ်လုပ်ပၞာန်ဟွံမွဲမ္ဂး သွက်ဂွံကလေၚ်ဗပေၚ် ဇြဟတ်မဆောံလေၚ်အာတံဂှ် ဟွံမွဲတုဲ ယဝ်ရညးဍုၚ်ကွာန်တံ ဟွံထံက်ဂလာန်ပုဟ်ဟီုမ္ဂး ဒးသရိုဟ်စှ်ေရဏောၚ်ဂှ် ကဵုလဝ်တၚ်စၟတ်ရ။

ပရိုၚ်−သြၚ်လောန်တိုၚ်(မ်)

ဗီု−ရာမည FM