ကျာ်မြဟ်၊ နဝ်ဝေမ်ဗာ ၁၇
ညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ် ဟိုတ်နူပေါဲဗ္တိုက်ၜါသွာၚ် ပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ်ဝွံ နွံပၟိက်ဒၟံၚ်ကဵု အရီုဗၚ်ဂဥုဲဇဗ ကေုာံ ဇွောံမစၞစတံ ကာတၟေၚ်ရောၚ်ဂှ် ညးဒေသပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပပ္တံနူဂိတုနဝ်ဝေမ်ဗာ ၁၀ တုဲကၠုၚ်တေံတုဲ ဂကောံဒပ်ပံၚ်ကောံဂကောံဇြဟတ်ပၠန်ဂတးတံ ကေုာံ ဒပ်ပၞာန်ဗၠးၜးကောန်ဂကူကရေၚ် KNLA တံ လုပ်စိုပ်ဗ္တိုက်လဝ် ဗ္ဒိုပ်သၞေဟ်ကၚ်ဒဒန် ကေုာံ ဗ္ဒိုပ်ဗၠာဲသၟိၚ်တိဍာ်ၜါသွာၚ် မၞုံပ္ဍဲကွာန်ၜါသွာၚ်ဂှ်တုဲ ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။
အပ္ဍဲကဵုပေါဲဗ္တိုက်ပွိုၚ် ၆ တ္ၚဲ နူဂိတုနဝ်ဝေမ်ဗာ ၁၀ စဵုကဵု ၁၅ ဂှ် ဟိုတ်နူကံၚ်ဇြဳပၞာန် သုၚ်စောဲလွဟ်ဇၞော် ကေုာံ က္ၜၚ်ကျာတံတုဲ ဗ္တိုက်ဒၟံၚ်ဂှ်ရ ညးဒေသဂၠိုၚ်ကဵုလ္ၚီ ထောံလသာသ္ၚိဌာန် ဒးဂြိပ်ဒဴပါဲဒလေတ်လဝ်ရ။
ညးဒေသ ထောံလသာသ္ၚိဌာန် မ္ဒးဂြိပ်ဒဴဒၟံၚ်တံဝွံ ဒးမံၚ်တန်တဴဒၟံၚ် ပ္ဍဲကဵုဘာလကျာ် ကွာန်ဗ္ဒါဲဗ္ဒါဲတံဂှ်ကဵု ကၠအ်ထၜိုတ်တံဂှ်တုဲ ဟိုတ်နူကၟာတ်လဝ် ဂၠံၚ်တံဂှ်ရ ဒးဂဗဒၟံၚ်ကဵု အခက်အခုဲ ရာန်ကေတ်ဇွောံမစၞစဟွံဂွံတံရောၚ်ဂှ် ညးဒေသမွဲတၠ ဟီုရ။
“အကာဲအရာပေါဲဗ္တိုက်ဂှ်တှ်ေ ညိၚ်ဒၟံၚ်ရ။ မုရမျာၚ်မှလေဝ် ဟွံဂွံမိၚ်ကေတ်ရပုဟ်။ ဒှ်အာသာ်လဵုရောအိုတ်ယျဟီုဂှ်လေဝ် ဟွံဂွံတီကေတ် ချိုတ်တ်ပၠိုတ်တ်ပုဟ်။ လ္ၚဵုတံဂှ် မံၚ်ဒၟံၚ် ပ္ဍဲဘာလကျာ်တုဲ ပါဲဒလေတ်ဒၟံၚ်တံလေဝ် နွံတၟာဂလိုၚ်ရ။ ပ္ဍဲကွာန်ဂှ်လေဝ် တၟာဂလိုၚ်ရ။ လ္ၚဵု ဂြိပ်တိတ် လ္ပာ်ဍုၚ်ဂှ်လေဝ် ကိစ္စဟွံမွဲပုဟ်။ လ္ၚဵုဂှ်တှ်ေ ပ္ဍဲဘာလကျာ်၊ လ္ၚဵုဂှ်တှ်ေ နွံဒၟံၚ်ပ္ဍဲကွာန် အာကၠုၚ်ဟွံဂွံတံလေဝ် တၟာဂလိုၚ်ဏောၚ်” သာ်ဝွံ သ္ဂးရ။
ပ္ဍဲကဵုညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ်တံဂှ် ညးဟွံထတ်ယုက်တံ၊ ညးအာယုက်ဇၞော်ဇၞော်တံကဵု ကောန်ၚာ်သၟတ်တံ၊ မၞိဟ်ဗြဴမၞုံကဵုဒၟုၚ်ဒၠေၚ်တံ ပါလုပ်ဒၟံၚ်တုဲ စနူကဵုပရေၚ်မၚ်မွဲရံၚ်စံၚ်ပရေၚ်ထတ်ယုက်သ္ဇိုၚ်တံဂှ် နွံပၟိက်ဒၟံၚ် အရီုဗၚ်တံရ။
ပ္ဍဲဂိတုနဝ်ဝေမ်ဗာ ၁၆ တ္ၚဲဏံဂှ် က္တဵုဒှ်ပေါဲဗ္တိုက် ဟွံမွဲကီုလေဝ် အပ္ဍဲဗ္ဒိုပ်ဗၠာဲသၟိၚ်ၜါသွာၚ်ဂှ် ကောန်ဒပ်ကံၚ်ဇြဳပၞာန်တံ ဆက်ဖျေံဒၟံၚ်ဒပ်ဂှ်ရ ပေါဲဗ္တိုက်ၜါလ္ပာ်တံ ထပ်က္တဵုဒှ်ကၠုၚ်ဏောၚ်ဂှ် ညးဒေသတံ ပရေၚ်ဂွိၚ်ဂွါဲ သၠုၚ်တိုန်ဒၟံၚ်ရ။
ဟိုတ်နူပေါဲဗ္တိုက်ၜါသွာၚ်တုဲ ညးဒေသ နူကဵုကွာန်ထပှ်ကွာန် ပါလုပ်သီုကဵု တယိတ်ကုန်၊ ကအ်သက်၊ ကျံက်ကွေဝ်၊ ပဝ်ဠဝ်တံ ၄၀၀၀ ပြၚ် ဒးဂြိပ်ဒဴပါဲဒလေတ်ဒၟံၚ်တုဲ ကောန်ၚာ်သၟတ် ၂ တၠ ချိုတ်တုဲ သ္ၚိဒၟံၚ် ဟွံအောန်နူကဵု ၁၀ မ လီုလာ်အာလဝ်ဂှ် ဂွံတီကေတ် အတိုၚ်ဂလာန် ညးဒေသပါဲဒဴဘဲပၞာန်တံရ။
အခိၚ်လၟုဟ်ဂှ်လေဝ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် အကာဲအရာပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ဂှ်ရ ပွမရပ်စပ်အာကၠုၚ် ဂၠံၚ်သ္ကုတ် ၜါသွာၚ်−လှာဒကှ်၊ ၜါသွာၚ်−မုဟ်ဍုၚ်ဂှ် ကၟာတ်လဒဵုလဝ်ရ။
အပ္ဍဲပေါဲဗ္တိုက်ၜါလ္ပာ်ဂှ် ကောန်ဒပ်ကံၚ်ဇြဳပၞာန် ၂၂ တၠ ချိုတ်တုဲ ၂၈ တၠ ဒုၚ်ကျဖျေံလဝ်လွဟ်တုဲ လ္ပာ်ဂကောံဇြဟတ်ပၠန်ဂတးတံဂှ်လေဝ် ကောန်သ္ဂံၚ် ၃ တၠ ပြဟ်လလုဲအာလဝ်ရောၚ် ဂကောံပြုပြေၚ်ပၞာန်တၟေၚ် SOF လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai