ညးယိုက်ဝန် Non CDM တက္ကသိုလ်မတ်မလီုတံ ဆုဲပြံၚ်ဒၞါဲမံၚ်စံၚ်ကၠုၚ်တံ နွံကၠုၚ်

မတ်မလီု၊ နဝ်ဝေမ်ဗာ ၁၇

ဂကောံဇြဟတ်ပၠန်ဂတးတံ ကြဴနူသီကေတ် တက္ကသိုလ်လွိုၚ်ကဝ် တွဵုရးကရေၚ်ဍာဲတုဲဂှ် အ္စာ၊ အ္စာၝောံ Non CDM တက္ကသိုလ်မတ်မလီုတံကဵု ညးယိုက်ဝန်လ္ၚဵုတံ ဆုဲပြံၚ်ကၠုၚ်ဒၞါဲ မံၚ်စံၚ်ကၠုၚ်တံ နွံကၠုၚ်ဂှ် သြၚ်လောန်တိုၚ်(မ်) ဂၠိုက်ဂၠါဲဂွံတီကေတ်ရ။

ဂအုပ်ပါမောက္ခ တက္ကသိုလ်မတ်မလီု ကံၚ်ဇြဳပၞာန် မခါန်ကၞက်လဝ်ဂှ်ဝွံ ပ္ဍဲဂိတုနဝ်ဝေမ်ဗာ ၁၅ တေံ ကော်လဝ် ကောံဓရီုကာတၟေၚ်မွဲတုဲ သွက်ဂွံပတေၚ်ဂြတ်ပရေၚ်ဂီုကၠီု အပ္ဍဲတက္ကသိုလ်တံကဵု ညံၚ်မၞိဟ်မ္ၚးမ္ၚး လုပ်စိုပ်ဟွံဂွံ သွက်ဂွံစၟဳတ်ဂှ် စၞောန်ပ္ညုၚ်ကၠုၚ်ရ။

ကောံဓရီုဏံဝွံ အပ္ဍဲတ္ၚဲအကြာတံဏံ ဂကောံဒပ်စဵုဒၞါညးဍုၚ်ကွာန် PDF တံ ဒဒှ်ရကၠုၚ်စိုပ်ဗ္တိုက် တက္ကသိုလ်မတ်မလီုဂှ် ပလံၚ်ဗစိုပ်လဝ်လိက်ဂးတုဲ ကော်ကောံဓရီုကာတၟေၚ်တုဲ ကၠောန်ဗဒှ်လဝ်ရ။

ကြဴနူကောံဓရီုဂှ်တုဲဂှ် အ္စာ၊ အ္စာၝောံတက္ကသိုလ် Non CDM တံကဵု ညးယိုက်ဝန်လ္ၚဵုတံ ဟွံဂံၚ်မံၚ် အပ္ဍဲဘာဂှ်ရ ပြံၚ်မံၚ်ကၠုၚ် ပ္ဍဲကဵုသ္ၚိမသကလောကောဒေံ မၞုံမ္ၚးဘာတံဂှ်ကဵု သ္ၚိမိဿဟာဲပြောဲဇွာတံ နွံကၠုၚ်ဂှ် ဗွိုၚ် Non CDM တံ ဟီုရ။

ဥက္ကဌ သမဂ္ဂကွးဘာတက္ကသိုလ်မတ်မလီု မေန်တာန်ဇြေန် မပါလုပ်ဒၟံၚ် ပ္ဍဲပၠန်ဂတးက္ညၚ်ဂှ် လ္ပာ်ဂကောံဇြဟတ်ပၠန်ဂတးတံ ဘပဠဒၟံၚ် တက္ကသိုလ်မတ်မလီုဂှ်ဟွံမွဲတုဲ နကဵုညးယိုက်ဝန် Non CDM ဂမၠိုၚ် ဇကုညးတံ ညးတံဒးပတှ်ေဏောၚ်ဂှ် ကဵုလဝ်တၚ်စၟတ်ရ။

“ ဂကောံဇြဟတ်ပၠန်ဂတး ကေုာံ PDF တံ ဒှ်ဒှ် ညးသၟတ်ပၠန်ဂတးတံသီုဖအိုတ်ဂှ်တှ်ေ ဘပဠအာဟွံသေၚ်ပုဟ်ဂှ် အဲထေၚ်ရ။ ဆ္ဂး ပိုယ်တံဂွံမိၚ်ဒၟံၚ်ရ။ ညးတံ ကော်ကောံဓရီုကာတၟေၚ်ဂှ်။ တုဲပၠန် တၚ်ကဵုသတိတံဂှ် နွံ၊ ဘပဠဂှ်ဟွံသေၚ်ပုဟ်။ ဆ္ဂး ဗီုပိုယ်ဟီုလဝ်ကၠာတေံဂှ်ရ ဒးပတှ်ေဖျေံစိုတ် သိက္ခာဇကုဇကုတံဏောၚ်။ မိက်ဂွံသ္ဂးဂှ်တှ်ေ အကာဲအရာညးတံချဳဒရာၚ်ဒၟံၚ်လၟုဟ်ဂှ်တှ်ေ ဇကုညးတံ ညးတံဟွံပတှ်ေရဏောၚ်။ ညးလဵုမွဲမှလေဝ် ဘပဠလဝ် ဒြပ်ရတ်ပိုန်ဟာန်လမျီုညးတံ ဟွံမွဲပုဟ်။ အပ္ဍဲကဵုတက္ကသိုလ်ဂှ် ညးတံနွံဒၟံၚ်ဂှ်ရ အာတုဲကဵုအန္တရာယ်ဂှ်လေဝ် ကၠောန်လဝ်ဟွံမွဲပုဟ်။ မိက်ဂွံသ္ဂးဂှ်တှ်ေ ပ္ဍဲပိုယ်တံဂှ် ပြဟ်ဟ်ဏံ အာဒၟံၚ် အတိုၚ်စေဝ်ပၞောန် အတိုၚ်ပရေၚ်ပညာပိုယ်တံရဏောၚ်” သာ်ဝွံ သ္ဂးရ။

အခိၚ်လၟုဟ်ဂှ် သၟိၚ်တၠအဝဵု တက္ကသိုလ်မတ်မလီု ကံၚ်ဇြဳပၞာန် မခါန်ကၞက်လဝ်ဂှ်ဝွံ ကၟာတ်လဒဵုလဝ် ညးယိုက်ဝန်တက္ကသိုလ်ဂမၠိုၚ် ညးလဵုမွဲမှ ညံၚ်ဂွိုအ်တိတ်မ္ၚးဂှ်တုဲ နကဵုညးယိုက်ဝန်ဂမၠိုၚ် သွက်ဂွံကေတ်တာလျိုၚ် ဂီုကၠီုဇကုကီု၊ ညံၚ်ဂွံနွံကဵု သတိ၊ သမ္တီ ဂီုကၠီုတံဂှ် စၞောန်ပ္ညုၚ်လဝ်ရ။

သ္အာၚ်နူဂှ်ပၠန် ပ္ဍဲကဵုဌာနနာနာ နကဵုလၟေၚ်မေဂျာ အပ္ဍဲတက္ကသိုလ်တံဂှ်လေဝ် သွက်ဂွံမၚ်ရံၚ် နူကဵုကေမ္မရာ CCTV တံ လၟိုန်ဂှ်ကဵု ယဝ်ရဂွံဆဵုကေတ် မၞိဟ်ဟွံသၚ်္ကာတံဂှ်မ္ဂးလေဝ် သွက်ဂွံပ္တိုန်ထ္ၜး အဆံၚ်ၚ် ကုညးမဆေၚ်စပ်တံ ဗွဲမပြဟ်ဂှ် စၞောန်လဝ်ရ။

ကြဴနူတက္ကသိုလ်လွိုၚ်ကဝ် ဒးဒုၚ်သီတုဲဂှ် ကံၚ်ဇြဳပၞာန် လလောၚ်တြးလဝ် ဆုဲပြံၚ်ထောံ ပေါဲသၟာန်သှ်လိက်တန်ဗ္တောန်ဇမ္ၚောဲ တက္ကသိုလ်လာယှိုဝ် ကေုာံ တက္ကသိုလ်လွိုၚ်ကဝ်တံရ။

ပရိုၚ်−သြၚ်လောန်တိုၚ်(မ်)

ဗီု−CJ