ကောန်ဒပ်ဗၠာဲသၟိၚ် နူကဵုဗ္ဒိုပ်ဗၠာဲသၟိၚ်ၝောံဍုၚ်ပဠဝ်မွဲတၠ ဒးဒုၚ်ရပ်ဒက်

ပဠဝ်၊ နဝ်ဝေမ်ဗာ ၁၇

ပ္ဍဲဂိတုနဝ်ဝေမ်ဗာ ၁၅ တေံ ကရောၚ်ပၞာန်ပဠဝ် (၁) လလောၚ်ပ္တိတ်လဝ် ဒဒှ်ရရပ်ဂွံလဝ် ကောန်ဒပ်ဗၠာဲသၟိၚ်မွဲတၠ မယိုက်ဂၠၚ်ဒၟံၚ်တာလျိုၚ် ပ္ဍဲဗ္ဒိုပ်ဗၠာဲသၟိၚ်ၝောံဍုၚ်ပဠဝ် ပွိုၚ်ဍုၚ်ပဠဝ် ရးဒေသဇၞော်တၞၚ်သဳဂှ် မဒှ်ရ။

ပ္ဍဲဂိတုအံက်တဝ်ဗာ ၁၅ တုဲကၠုၚ်တေံဂှ် ရပ်ဂွံလဝ် ကောန်ဒပ်ဗၠာဲသၟိၚ် အံၚ်ကိုဝ်ဖျဵု ပ္ဍဲကဵုဂတမုက် (ဘုရားတောၚ်) ကွာန်ပံၚ် ပွိုၚ်ဍုၚ်ပဠဝ်ဂှ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ကောန်ဒပ်ဗၠာဲသၟိၚ် အံၚ်ကိုဝ်ဖျိုဝ် နူကဵုဗ္ဒိုပ်ဗၠာဲသၟိၚ်ၝောံဒပ်ပဠဝ်ဂှ်ဝွံ ကေတ်လဝ်တာလျိုၚ် ပ္ဍဲကဵုဂကောံဒပ်ဗၠာဲသၟိၚ်ကံၚ်ဇြဳပၞာန် ပွိုၚ် ၄ သၞာံတုဲ နူကဵုဗ္ဒိုပ် ဂၠံၚ်အာကွာန်ပံၚ်ဂှ် ဒးဒုၚ်ရပ်ဒက်လဝ်ရ။

ကောန်ဒပ်ဗၠာဲသၟိၚ် အံၚ်ကိုဝ်ဖျိုဝ်ဝွံ ဟိုတ်နူရေၚ်တၠုၚ်ဒၟံၚ် နဒဒှ်လေံထံက်ကံၚ်ဇြဳပၞာန်ဂှ်ရ ဆက်ရပ်ဒက် ထိၚ်ဒက်အာဏောၚ်ဂှ် ဂွံတီကေတ် အတိုၚ်တၚ်လလောၚ်တြး ကရောၚ်ပၞာန်ပဠဝ်ရ။

ရပ်ဂွံလဝ် ကောန်ဒပ်ဗၠာဲသၟိၚ် ကံၚ်ဇြဳပၞာန်မွဲတၠ စဵုကဵုဗ္ဒါဲမွဲဂိတုကီုလေဝ် ဒၟါနူဒးရေၚ်တၠုၚ်ဒၟံၚ် လ္တူပရေၚ်ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန်တံဂှ်တုဲ လအ်လအာလဝ်ရောၚ် သ္ဂးရ။

သ္အာၚ်နူဂှ်ပၠန် နကဵုကောန်ဂကောံဒပ်ကံၚ်ဇြဳပၞာန် မသှ်ေဒၟံၚ် သွက်ဂွံထပိုတ်ရိုဟ်ကၞက် သၞောတ်တၠအဝဵုပၞာန်ဂှ် သွက်ဂွံပံၚ်တောဲပါလုပ်ကဵု ညးဍုၚ်ကွာန်တံ ဗွဲမပြဟ်အိုတ်ဂှ် ဖ္တိုက်ဖ္အောဝ်လဝ်ရ။

အတိုၚ်တၚ်လလောၚ်တြး အလဵုအသဳညဳသၟဟ်ဂကူ NUG တံဂှ်မ္ဂး အပ္ဍဲကာလသီအဝဵုဏံ ကောန်ဒပ်ဗၠာဲသၟိၚ် ကေုာံ နူကဵုဒပ်ပၞာန်တံ ဗ္ဒါဲ ၁၄၀၀၀ သ္ပလဝ်ဇြဳဒဳအာမ်ရောၚ် လလောၚ်ပ္တိတ်လဝ် အပ္ဍဲဂိတုအံက်တဝ်ဗာရ။

ပရိုၚ်−သြၚ်လောန်တိုၚ်(မ်)

ဗီု−Palaw PDF