လွိုၚ်ကဝ် – နဝ်ဝေမ်ဗာ(၁၈)
ဗဒိုပ်ကံၚ်ဇြဳပၞာန် ဖျေံလဝ်ဗဒိုပ် ပ္ဍဲရုၚ်သၞောဝ်ဓဝ် မၞုံသ္ကဲဂၠံၚ်မဖဝ် ကဵု ဂၠံၚ် (၅) အရာပ်ဒဝ်ဥခူ ဍုၚ်လွိုၚ်ကဝ်၊ တွဵုရးကရေၚ်ဍာဲဂှ် ကြဴနူဂကောံဇြဟတ်ပၠန်ဂတးတအ် လုပ်စိုပ်ဗတိုက်လဝ်တုဲဂှ် ရုၚ်သၞောဝ်ဓဝ် တူအာပၟတ်ရဂှ် KNDF ဟီုကဵု ဌာန်ပရိုၚ်သြၚ်လောန်တိုၚ်မ်ရ။
တ္ၚဲဏံ ဂိတုနဝ်ဝေမ်ဗာ စၟတ်တ္ၚဲ (၁၇) အခိၚ်နူဂယးဂှ် ပ္ဍဲကဵုရုၚ်သၞောဝ်ဓဝ်လွိုၚ်ကဝ် ဒၞာဲဒပ်ကံၚ်ဇြဳပၞာန် ဖျေံလဝ်ဗဒိုပ်ပန်ဒၞာဲဂှ် ဂကောံပၠန်ဂတးပံၚ်ကောံကရေၚ်ဍာဲတအ် လုပ်ဗတိုက်လဝ်ရ။
ရုၚ်သၞောဝ်ဓဝ်ခရိုၚ်ဏံဂှ် ကၠာနူအခိၚ်ဟွံဂွံသီအဝဵုဏီတေံ ဟိုတ်နူဒှ်ဒၞာဲ ဖျေံဒၟံၚ်ဒဏ်ထံၚ် သၟာဗ္ၚကောန်ဒေသတအ်ကဵု သၟတ်တအ် ဟွံဗဗွဲဓဝ်ဂှ်ရ ခရိုဟ်ပလီုဖျေံလဝ်ရဂှ် ခူရဳဒူ ဟီုလဝ်ရ။
“သွက်ညးဍုၚ်ကွာန် ကောန်ဍုၚ်ကရေၚ်ဍာဲပိုဲ ဒှ်ဒၞာဲမုလေဝ် မုဖိုလ်လေဝ် ဟၟဲမွဲဒၞာဲရ။ ဒၟာနူဒှ်ရုၚ်သၞောဝ်ဓဝ် မၚ်မွဲပွဟွံဗဗွဲဓဝ်ဂှ်ရ ဒၞာဲလီုလာ်စာ်ထောၚ်ဒၟံၚ်ဏံ ပိုဲခရိုဟ်ပလီုဖျေံလဝ်ရ” ဂှ် ညးဟီုလဝ်ရ။
ပ္ဍဲကဵုပေါဲဗတိုက်ဏံ ၜိုန်ရကောန်ဒပ်ကံၚ်ဇြဳပၞာန်တအ် ဒးချိုတ်လဝ် နွံကီုလေဝ် သ္ပဒ္တန်လၟိဟ် ချိုတ်တ်ပၠိုတ်တ်ဟွံမာန်ဏီရဂှ် ညးဟီုလဝ်ဏီရ။
သ္ပတံနူကဵုဂိတုနဝ်ဝေမ်ဗာ စၟတ်တ္ၚဲ (၁၁) တုဲကၠုၚ်တေံတုဲ စဵုကဵုတ္ၚဲဏံ ဂကောံဇြဟတ်ပၠန်ဂတးတအ်ဂှ် ကၠောန်ချဳဒရာၚ်ဒၟံၚ် ပရေၚ်ချဳဒရာၚ်ပၞာန် ၁၁၁၁ ပ္ဍဲတွဵုရးကရေၚ်ဍာဲတုဲ ပ္ဍဲကဵုပရေၚ်ချဳဒရာၚ်ပၞာန်ဏံ သီဂွံလဝ်ဗဒိုပ်ကံၚ်ဇြဳပၞာန် (၉) ဗဒိုပ်တုဲ တက္ကသိုလ်လွိုၚ်ကဝ်ဂှ်လေဝ် ထိၚ်ဒဝ်မာန်လဝ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်မ်
ဗီု – KNDF
sanlontai