ဟိုတ်နူဒဒန်အတ္ထရံ (ၜါသွာၚ်) ကဝ်ပိုတ်အာတုဲ ညးဒေသတအ်ခက်ခုဲကဵု ပရေၚ်အာကၠုၚ်

ကျာ်မြဟ်၊ နဝ်ဝေမ်ဗာ (၁၉)

ဒဒန်အတ္ထရံ (ၜါသွာၚ်) မၞုံပွိုၚ်ဍုၚ်ကျာ်မြဟ်ဂှ် ဒးဒုၚ်ဖံက်ခတိုဟ်လဝ်မာၚ်တုဲ ဟိုတ်နူကဝ်ပိုတ်အာဂှ်ရ ပရေၚ်အာကၠုၚ် ခက်ခုဲကၠုၚ်တုဲ ၚုဟ်စရိတ်ကွဳစက်တအ်လေဝ် တိုန်အာရဂှ် ညးဒေသတအ်ဟီုလဝ်ရ။

ဟိုတ်နူဒဒန်အတ္ထရံ ကဝ်ပိုတ်စှ်ေတုဲ အပံၚ်လၟိဟ်ကွာန် (၂၀) ကွာန် ပါလုပ်သီုကုန်ပၞဴ၊ လှာဒကှ် ပ္ဍဲကဵုပွိုၚ်ဍုၚ်လှာဒကှ်ကဵု ပ္ဍဲပွိုၚ်ဍုၚ်ကျာ်မြဟ်ဂှ် ပါလုပ်သီုကွာန်ၜါသွာၚ်၊ ပှ်လှ်၊ မဳတွေကုမ်၊ ကျောက်ကွေဝ် အပံၚ်လၟိဟ် ကွာန် ၜိုတ် (၃၀) ပြၚ် ညးဒေသတအ် ဒးဆေၚ်ဒၟံၚ်မုက်ကဵု အခက်ခုဲပရေၚ်အာကၠုၚ်ရ။

ကွဳစက်လိုၚ် ပ္ဍိုက်ညးအာတရဴတအ်လေဝ် ဟိုတ်နူဒးဂေတ်အာ နူကဵုဂၠံၚ်တၞဟ်ဂှ်ရ ကၠာတေံၚုဟ်ကွဳစက် မုဟ်ဍုၚ် – မြဝတဳ နူကဵုနွံဒၟံၚ် ၜိုတ် ၁၅၀၀၀ ဂှ် အခိၚ်လၟုဟ်တိုန်အာ စဵုကဵု ၜိုတ် ၆၀၀၀၀ ပြၚ်ရဂှ်လေဝ် ဂွံတီကေတ်ရ။

ဒဒန်အတ္ထရံ ကွာန်ၜါသွာၚ်ဂှ် မၞုံလ္တူဂၠံၚ်မုဟ်ဍုၚ်-ဆုကၠ-တၟံဗြဴ-ၜါသွာၚ်-လှာဒကှ်တုဲ ဒှ်ဒဒန်ဆက်စၠောံလဝ် အာစဵုကဵုမြဝတဳ သီုကျာ်ပိ အဓိက မွဲတၞုၚ်ရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၇) အခိၚ်နူဂယးဂှ် ပ္ဍဲကဵုပေါဲဗတိုက် ဒဒန်အတ္ထရံ (ၜါသွာၚ်)ဂှ် ဟိုတ်နူဒှ်ဒၟံၚ် ဂၠံၚ်ထံက်ပလံၚ် သွက်ကံၚ်ဇြဳပၞာန်အဓိကဂှ်ရ ကၠောန်ရေၚ်တၠုၚ်လဝ် လဂွံကဵုပရေၚ်ပၞာန်ရဂှ် လ္ပာ်ဂကောံဇြဟတ်ပၠန်ဂတးတအ် ဟီုဂးလဝ်ရ။

စဵုကဵုအကာဲအရာလၟုဟ်ဏံ ဒေသၜါသွာၚ်ဂှ် ဟွံညိၚ်ဝတ်ဏီတုဲ လ္ပာ်ကံၚ်ဇြဳပၞာန် ကၠုၚ်ပန်ပှော်ဒၟံၚ်ကဵုက္ၜၚ်ကျာနွံတုဲ ပရေၚ်ပန်ပှော်လွဟ်ဇၞော်ဍောတ်တအ်လေဝ် နွံတုဲ လ္ပာ် KNLA၊ PDF တအ်လေဝ် သုၚ်စောဲဒရုမ်တုဲ ဗတိုက်ဒၟံၚ်နွံဏီရ။

ပ္ဍဲကဵုဒေသၜါသွာၚ်ဂှ် သ္ပတံနူဂိတုနဝ်ဝေမ်ဗာ စၟတ်တ္ၚဲ (၁၀) တုဲကၠုၚ်တေံတုဲ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက်သ္ကာတ်မြဟ်ဒၟံၚ်တုဲ ကောန်ဒပ်ကံၚ်ဇြဳပၞာန် (၂၈) တၠ ဖျေံလဝ်လွဟ် ထံက်လဝ်က္ၜံၚ်ရ။

ပရိုၚ် – သြၚ်လောန်တိုၚ်မ်

ဗီု – CJ