ပ္ဍဲတိဍာ် KNU စချဳဒရာၚ်ဒၟံၚ် ပေါဲဗတိုက်သီဗဒိုပ်

ကဝ်ဒူလေဝ် – နဝ်ဝေမ်ဗာ(၁၉)

ကြဴနူလလောၚ်တြးလဝ် ဒဒှ်ရချဳဒရာၚ်လုပ်ပေါဲဗတိုက်ညးဍုၚ်ကွာန်တုဲဂှ် စချဳဒရာၚ်ဒၟံၚ် ပေါဲဗတိုက်သီတံဒပ် ကေုာံ ဗဒိုပ်ကံၚ်ဇြဳပၞာန် ပ္ဍဲကဵုတိဍာ် KNU ရဂှ် ဂွံတီကေတ် နူတံရိုဟ်တၚ်ဂၞၚ်ပရိုၚ်တအ်ကီု သီုညးဒေသတအ်ရ။

ဟိုတ်နူဒးဒုၚ်ဒၟံၚ် ပေါဲဗတိုက်သီဗဒိုပ်တအ်တုဲ လ္ပာ်ကံၚ်ဇြဳပၞာန် ကၠောန်သ္ပကၠုၚ် ပရေၚ်ဗတိုန်ပန် ကဵုက္ၜၚ်ကျာ သ္ကာတ်တ်မြဟ်ဟ်ရဂှ် ဟီုလဝ်ရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၇) တုဲကၠုၚ်တေံဂှ် နကဵု KNU ဓမံက်အာရုပ်ရဴပေါဲဗတိုက်ညးဍုၚ်ကွာန်ရောၚ် အခိၚ်ကဵုလဝ်သမ္တီဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် လုပ်စိုပ်ဗတိုက်သီကေတ်လဝ် ဗဒိုပ်ပၞာန်ဖျေံသ္ဇိုၚ်ကံၚ်ဇြဳပၞာန် ခမရ ၃၅၁ ရဂှ် BPLA လလောၚ်တြးလဝ် ပရိုၚ်ရ။

သ္အာၚ်နူဂှ်ပၠန် လ္တူဂၠံၚ်ကွဳစက် တံၚ်ဥူ-သာန်တောၚ် မဒှ်တိဍာ်ဒပ်မဟာ (၂) ခရိုၚ်တံၚ်ဥူ KNU ဂှ် ကံၚ်ဇြဳပၞာန်ကဵု ဒပ်ပံၚ်ကောံ ဒပ်မဟာ (၂) KNU တအ် ပေါဲဗတိုက်သ္ကာတ်မြဟ်လဝ်တုဲ လ္ပာ်ကံၚ်ဇြဳပၞာန် ကၠုၚ်ပန်လဝ်ကဵုက္ၜၚ်ကျာသၞေၚ်ဝဲ ပွိုၚ် (၂) တ္ၚဲ ဆက်ဆက်ဂှ်ရ ညးဒေသ (၂) တၠ ဒးချိုတ်လဝ်တုဲ ညးဍုၚ်ကွာန်ဗွဲမဂၠိုၚ် ဒးဂြိပ်ဒဴပါဲဓလေတ်လဝ်ရဂှ် ညးဒေသတအ်ဟီုလဝ်ရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၈) ဂှ်လေဝ် သီုပေါဲဗတိုက်ဟၟဲမွဲသာ် ပ္ဍဲကဵုကွာန်မျေနဳကုမ် ဗ္ဒာဲရုၚ်ပွိုၚ်ဍုၚ်ဝၚ်ရော KNU ဂှ် ဟိုတ်နူဗတိုက်ပန်လဝ်ကဵု က္ၜၚ်ကျာတုဲ ကောန်အရာပ် (၁) တၠ ဇီုကပိုက်ဒးလဝ်ဘဲဝပ်ရဂှ် ဂွံတီကေတ်ရ။

ပ္ဍဲကဵုဒေသၜါသွာၚ် ပွိုၚ်ဍုၚ်ကျာ်မြဟ် တွဵုရးဍုၚ်မန် မဒှ်တိဍာ် KNU ဒပ်မဟာ (၆) ဂှ် ပေါဲဗတိုက်တအ် ဆက်က္တဵုဒှ်ဒၟံၚ်တုဲ နူလ္ပာ်ကံၚ်ဇြဳပၞာန် ဆက်ကၠောန်သ္ပဒၟံၚ်ပရေၚ်ဗတိုက်ပန်ကဵုက္ၜၚ်ကျာ ပန်ဖျေံလွဟ်ဇၞော်တအ်ရဂှ် ညးဒေသတအ် ဟီုလဝ်ရ။

ပ္ဍဲကဵုပေါဲဗတိုက်တအ်ဂှ် ဟိုတ်နူလွဟ်ဇၞော်ဒတုံစှ်ေပါ်ခတိုဟ်လဝ်တုဲ ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၇) ဂှ် ပ္ဍဲကဵုဗ္ဒာဲဒေသၜါသွာၚ် ညးဒေသ နူကွာန်လှာကဇိုၚ်မွဲတၠ ဒးလဝ်ဘဲဝပ်လွဟ်မကမ်ရဂှ် ဂကောံရီုဗၚ်ဟံၚ်ပြာ်ပရေၚ်မၞိဟ်ပ္ဍဲဒေသဂှ် ဟီုလဝ်ရ။

နကဵုညးမပါလုပ်ဒၟံၚ် ပ္ဍဲကဵုယန္တရာပရေၚ်အုပ်ဓုပ်ကံၚ်ဇြဳပၞာန် ပ္ဍဲပွိုၚ်ဍုၚ်ဝဝ်လေဝ်၊ သုကလိ၊ ကျာ်ဍုၚ် ကေုာံကအ်ကြိက် ပ္ဍဲကဵုတိဍာ်ဒပ်မဟာ (၆) ခရိုၚ်ဒူပလာယာ KNU တအ်ဂှ် ပ္ဍဲကဵုပွိုၚ် (၁) သတ္တာဟ ညံၚ်ဂွံတိတ်အာ နူကဵုဍုၚ်ဗွဲမပြဟ်ကီု ယဝ်ရဟွံဒ္ဂေတ်ဗက်မ္ဂး ပြဿနာအဆက်တောဲကြဴတအ်ဂှ် ကေတ်အာတာလျိုၚ် ဟွံသေၚ်ရောၚ်ဂှ် ကဝ်မတဳပွိုၚ်ဍုၚ်ကအ်ကြိက် KNU ကဵုလဝ်သမ္တီ နကဵုစၟတ်တ္ၚဲ ဂိတုနဝ်ဝေမ်ဗာ စၟတ်တ္ၚဲ (၁၇) ရ။

ဗဒိုပ်ဖျေံသ္ဇိုၚ်ကံၚ်ဇြဳပၞာန် မၞုံပ္ဍဲကဵုပွိုၚ်ဍုၚ်တအ်ဂှ် ဟိုတ်နူဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် အာစိုပ်ဗတိုက်ဒၟံၚ် ခြာဟွံလအ်ဟွံလအ်နွံဒၟံၚ်ဂှ်ရ ပေါဲဗတိုက်တအ် သ္ကာတ်မြဟ်ဒၟံၚ်ရ။

ပရိုၚ် – သြၚ်လောန်တိုၚ်မ်

ဗီု -Reuters