ကြဴနူ ရတခ ဒးဒုၚ်ဗ္တိုက်တုဲဂှ် ပ္ဍဲမတ်မလီု ပတေၚ်ဂြတ်လဝ် ပရေၚ်ဂီုကၠီု

မတ်မလီု၊ နဝ်ဝေမ်ဗာ ၁၉

တွဵုရးဍုၚ်မန်၊ ဌာန်ဂအုပ်ပၞာန်ရးအဂၞဲကံၚ်ဇြဳပၞာန် ဖျေံသ္ဇိုၚ်ဍုၚ်မတ်မလီု ကြဴနူဒးဒုၚ်ဗ္တိုက်တုဲဂှ် ပတေၚ်ဂြတ်လဝ် ပရေၚ်ဂီုကၠီု ကုဍုၚ်မတ်မလီုဗွဲတၟေၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တုဲကၠုၚ် ပ္ဍဲဂိတုနဝ်ဝေမ်ဗာ ၁၆ အခိၚ်ဇိုၚ်သဝ်တ္ၚဲတေံ အခိၚ်ကၠောန်ဗဒှ် တ္ၚဲ ရတခ ပေၚ် ၆၂ သၞာံဂှ် ဒးဒုၚ်ဗ္တိုက်လဝ်ကဵုဒရုၚ်တုဲ ဒပ်ကံၚ်ဇြဳပၞာန်ဝွံ ပန်ပှော်လဝ် ဂၠံၚ်ဒရုၚ်ကၠုၚ်ဂှ် နကဵုလွဟ်ဇၞော်၊ လွဟ်ဍောတ်တံရ။ သ္အာၚ်နူဂှ်ပၠန် အပ္ဍဲဍုၚ်ဂှ်လေဝ် ကၠောန်သ္ပကၟာတ်လဒဵုဂၠိုက်ဂၠါဲလဝ်တံ အဆက်က်ရ။

ကံၚ်ဇြဳပၞာန်ဝွံ သၠုၚ်ပ္တိုန်လဝ်ပရေၚ်ဂီုကၠီုတုဲ ပ္ဍဲကဵုအရာပ်လ္ၚဵုတံကဵု ကွာန်လ္ၚဵုတံဂှ် ဂၠိုက်ဂၠါဲစၟဳစၟတ်တံ ကၠောန်သ္ပဒၟံၚ်ရောၚ် ဂွံတီကေတ်ရ။

အခိၚ်တ္ၚဲတှ်ေ ဂကောံစုၚ်လေၚ် နကဵုဗီုပြၚ်စၟဳတ်စေဝ်ပၞောန်ယာန်တံဂှ် ဂၠိုက်ဂၠါဲစၟဳတ်တံသၟးဟွံက အပ္ဍဲဍုၚ်ဂှ် ထ္ၜးဇြဟတ် ဗက်ဂေတ်ဂေၚ်တံဂှ်ကဵု ဖျေံကၚ်ဒမၠုက် မၚ်ရံၚ်တံဂှ် ကၠောန်ၜိုတ်ဒၟံၚ် အဆက်က်ရောၚ်ဂှ် ညးဒေသမတ်မလီုမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပရေၚ်ဂီုကၠီုဂှ်တှ်ေ ဖျေံဂလိုၚ်လဝ်ရ။ နူဂယးဏံ ပ္ဍဲကဵု (သွေးသောက်) ဂှ် နကဵုကွဳစက်ပၞာန်ၜါဖ္ဍိုက်ဂှ် PDF တံ အောပ်ဒၟံၚ်ဂးတုဲ ဗက်ဂၠါဲဒၟံၚ် ပ္ဍဲကဵုကွာန်တံရ။ တုဲပၠန် ဍေံတံဂှ် ကရေက်ခဠာတ်ဒိုၚ်ဝန်တံ၊ ယှိုဲမျာၚ်သီရိတံ၊ ဇြေယျာသီရိတံ လ္ပာ်တံဏံဂှ်လေဝ် ကၠောန်ကၠုၚ်ဗီုပြၚ် စၟဳတ်စရၚ်ကၟုဲတံရ။ လၟုဟ်လေဝ် အခိၚ်တ္ၚဲတံဂှ် ကၠောန်ကၠုၚ်ဗီုပြၚ် စၟဳတ်စေဝ်ပၞောန်ယာန်တံရ။ ကၠာတေံဟီုမ္ဂး ဗၠာဲသၟိၚ်ထိၚ်ယာန်တံ စၟဳတ်ဒၟံၚ်။ လၟုဟ်ဂှ်တှ်ေ နူကဵုဒပ်ပၞာန် ပါကၠုၚ်မွဲၜါ၊ ဗၠာဲသၟိၚ်ပါဏောၚ်၊ ညးထိၚ်ယာန်ပါဏောၚ်။ တုဲပၠန် ကွဳလိုန်ဓာတ်တံတှ်ေ လာၚ်ဇြေန်တံဂှ် ဟွံစၟဳတ်အဓိကရပုဟ်၊ စၟတ်ဗုၚ်ကွဳလိုန်ဓာတ်တံ၊ မၞိဟ်တံရဏောၚ်။ တေၚ်ဂြတ်အာ တၟာဂလိုၚ်ရ” သာ်ဝွံ သ္ဂးရ။

ဒပ်ကံၚ်ဇြဳပၞာန် သၠုၚ်ပ္တိုန်လဝ် ပရေၚ်ဂီုကၠီု အပ္ဍဲကဵုဍုၚ်သာ်ဏံတုဲ ပတေၚ်ဂြတ်လဝ် ပရေၚ်စၟဳတ်တံဂှ်ရ ပရေၚ်အာကၠုၚ်တံဂှ် အခက်အခုဲနွံဒၟံၚ်တုဲ အခိၚ်ဗ္တံတံဂှ်လေဝ် ဟိုတ်နူပရေၚ်ရပ်ဒက်စၟဳတ်တံ နွံကၠုၚ်ဂှ်ရ ညးဒေသတံ ဒှ်ဓဝိၚ်ဂွိၚ်ဂွါဲတံ သၠုၚ်တိုန်ဒၟံၚ်ဂှ် ဂွံတီကေတ်ရ။

အခိၚ်ဂေတ်ဂေၚ်အပ္ဍဲဍုၚ်တံဂှ်လေဝ် ကၠာတံဂှ် ကောန်ဒပ်ဗၠာဲသၟိၚ်တံသၟးရ ဂေတ်ဂေၚ်ဒၟံၚ် နကဵုကွဳစက် ၂ ဖ္ဍိုက်ကီုလေဝ် လၟုဟ်ဂှ် ဒပ်ပၞာန်၊ ဗၠာဲသၟိၚ် ကေုာံ ဂကောံပံၚ်ကောံ ကယျိုၚ်အရာပ်တံဂှ် သုၚ်စောဲကွဳစက်သ္ၚိတံတုဲ ဂေတ်ဒၟံၚ်ကၚ်အိုတ်ဂှ် ဂွံတီကေတ်ရ။

သ္အာၚ်နူဂှ်ပၠန် ပ္ဍဲကဵုသၞေဟ်ကၚ်စၟဳတ် လုပ်တိတ်ဍုၚ်တံဂှ်လေဝ် သၠုၚ်ပ္တိုန်လဝ်ပရေၚ်ဂီုကၠီုတုဲ ပ္ဍဲကဵုဒၞါဲလဒေါဝ်ဍုၚ်တံကဵု ဗ္ဒါဲဌာနဆေၚ်စပ်ကံၚ်ဇြဳပၞာန်တံဂှ်လေဝ် ဟွံလအ်ဟွံလအ် ဗက်စၟဳတ်ဒၟံၚ်တံ နွံဒၟံၚ်ဂှ် ညးဒေသတံ ဟီုရ။

လ္တူညးသၟတ်တံဂှ်လေဝ် ဟွံသၚ်္ကာမ္ဂး ရပ်ဒက်စၟဳတ်သၟာန်သၟုက်တံဂှ် ကၠောန်သ္ပဒၟံၚ်တုဲ စၟဳတ်စရၚ်ကၟုဲတံဂှ်လေဝ် ကၠောန်ဒၟံၚ်အဆက်က်ရ။

နူကဵု CCTV မစုတ်လဝ် အပ္ဍဲဍုၚ်တံဂှ်မွဲကဆံၚ် ပွမမၚ်ရံၚ် ပရေၚ်အာကၠုၚ်ညးဍုၚ်ကွာန်တံ နွံဒၟံၚ်လၟိုန်တုဲ သုၚ်စောဲဇြဟတ်ဗွဲမဂၠိုၚ်ဂၠေၚ်တုဲ ကၟာတ်လဒဵုဂၠိုက်ဂၠါဲဒၟံၚ်တံဂှ် ကၠောန်သ္ပဒၟံၚ်ရ။

ၜိုန်ရသၠုၚ်ပ္တိုန်လဝ် ပရေၚ်ဂီုကၠီုသာ်ဏံ နွံဒၟံၚ်ကီုလေဝ် ပ္ဍဲကဵုဍုၚ်မတ်မလီုဂှ် မွဲဏှမွဲဏှဟီုဂွံ ဒးဒုၚ်ပၠံၚ်ၜးကွဳလိုန်ဓာတ်ကီု၊ ဒးဒုၚ်ကၠတ်ဂၠံက်တံသၟးဟွံ လုပ်စိုပ်အပ္ဍဲသ္ၚိဒၟံၚ်တံတုဲ ဒးဒုၚ်ကၠတ်ဏာကပေါတ်ကညောတ်တံ နွံဒၟံၚ်ဂှ်ရ ပရေၚ်ဂီုကၠီုဟွံမွဲဒှ်ဒၟံၚ်ရောၚ် ညးဒေသတံ ဟီုဂးလဝ်ရ။

ပရိုၚ်−သြၚ်လောန်တိုၚ်(မ်)

ဗီု−CJ