ပရေၚ်ချဳဒရာၚ်ပၞာန်အလုံဍုၚ်မွဲ ကဆံၚ်ပထမဂှ် ထ္မံက်ဒၟံၚ်ရုပ်ရဴရောၚ် ဂကောံကောဒေံပိဂကောံ ကဵုသမ္တီ

ကဝ်က၊ နဝ်ဝေမ်ဗာ ၁၉

ဂကောံမဟာမိတ်ကောဒေံပိဂကောံ မဗ္တိုက်ဒၟံၚ်ပၞာန်ထ္ပက် ကုကံၚ်ဇြဳပၞာန် သ္ကာတ်မြဟ်အိုတ်ဂှ် နဒဒှ် “Nationwide Operation” နကဵုဗၞတ်ဗ္ၜတ်အလုံဍုၚ် ထ္မံက်ဒၟံၚ်ရုပ်ရဴ ပရေၚ်ချဳဒရာၚ်ပၞာန် ကဆံၚ်ပထမရောၚ်ဂှ် ပ္ဍဲဂိတုနဝ်ဝေမ်ဗာ ၁၇ တေံ ကဵုကၠုၚ်သမ္တီရ။

သီကေတ်ဒၟံၚ် ဗ္ဒိုပ်ဒပ်ကံၚ်ဇြဳပၞာန် နူကဵုသက်ကိုၚ်၊ မာန္တလေဝ်၊ တွဵုရးကချေၚ်၊ ချေၚ် ကေုာံ ကရေၚ်ဍာဲ ပါလုပ်သီုကဵုကဝ်က၊ တအာၚ် ကေုာံ ရခေၚ် ဒၞါဲပေါဲဗ္တိုက် မသ္ကာတ်မြဟ်ဒၟံၚ်တံ မွဲတုဲမွဲဂှ်ဝွံ ဒှ်ပရေၚ်ချဳဒရာၚ်ပၞာန် အလုံဍုၚ်မွဲ ကဆံၚ်ပထမရောၚ်ဂှ် သ္ဂးလဝ်ရ။

တုဲကၠုၚ် ပ္ဍဲဂိတုအံက်တဝ်ဗာကြပ်အိုတ်တေံ ဂကောံမဟာမိတ်ကောဒေံပိဂကောံ မစကၠုၚ်လဝ်ဂှ်ဝွံ သွက်ဂွံစဵုဒၞါ ဒြပ်ရတ်ပိုန်ဟာန်လမျီုညးဍုၚ်ကွာန်တံမာန်၊ သွက်ဂွံထိၚ်ဒက် ဒေသဇကုတံမာန် ကေုာံ သွက်သၞောတ်တၠအဝဵုပၞာန် အလုံညးဍုၚ်ကွာန်ဍုၚ်ဗၟာတံ မနွံပၟိက်ဒၟံၚ် ညံၚ်ရိုဟ်ကၞက်ဂွံပိုတ်အာတံဂှ်တုဲ စကၠုၚ်လဝ် ချဳဒရာၚ်ပၞာန် ၁၀၂၇ ဏံဂှ်ရ။

ညးမၞုံအခေါၚ်ဟီုဂး ဂကောံကဝ်က MNDAA လဳကျာဝေန်ဂှ် ကၠောန်ၜိုတ်အာ အတိုၚ်တၚ်ရန်တၟံချဳဒရာၚ်ပၞာန်ဂှ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“မူဟိုတ်ရောတှ်ေ နူကဵုပိုယ်တံလလောၚ်တြး တၚ်ရန်တၟံတေံဂှ်ရ စုတ်လဝ်မတံဏံတုဲ ဟီုလဝ်ဂှ်နွံဒၟံၚ်။ အတိုၚ်ပရေၚ်သ္ဂောံထပိုတ်ရိုဟ်ကၞက်သၞောတ်တၠအဝဵုပၞာန်ဂှ်ရ ဗွိုၚ်ပၞာန်ဍောတ်ဇၞော်ဂှ်တှ်ေ ဟွံဒးဟီုရပုဟ်” သာ်ဝွံ ညးဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဂကောံမဟာမိတ်ကောဒေံပိဂကောံဂှ်ဝွံ ကုတၚ်ရန်တၟံပရေၚ်ပၞာန်တံဂှ် ပံၚ်တောဲဒၟံၚ်ကဵု ဂကောံဇြဟတ်မဟာမိတ်တံ ဗွဲမသၟဟ်ညဳတုဲ သွက်ဂွံဖအိုတ် သီကေတ် ပွန်ပရေၚ်ပၞာန်တံမာန်ဂှ်ကဵု သွက်ဂွံကလေၚ်ဖျေံဒၞါဲ ပ္ဍဲကဵုဌာန်ဒေသဇကုတံမာန်ဂှ် ကဵုက္ဍိုပ် ရေၚ်တၠုၚ်ဒၟံၚ်ရောၚ် ဂွံတီကေတ်ရ။

သ္အာၚ်နူဂှ်ပၠန် သီုကဵုကိစ္စ မဆက်စပ်ဒၟံၚ်ကဵု ချဳဒရာၚ်ပၞာန်တံပါလုပ်ဂှ် ပ္ဍဲကဵုဍုၚ် ယန္တယာကံၚ်ဇြဳပၞာန် မသရိုဟ်ဒေါမ်လဝ်တံဂှ် ဂကောံမဟာမိတ်ကောဒေံပိဂကောံတံ ကေတ်ဒၞါဲ ကုဒၞါဲမဆက်စပ်ကဵု ပရေၚ်အုပ်ဓုပ်တံဂှ်တုဲ ဆက်တုဲကၠောန်ၜိုတ်ဒၟံၚ် ကမၠောန်ဟံၚ်ပြာ်တံကဵု ပရေၚ်ဂီုကၠီုညးဍုၚ်ကွာန်တံရ။

အခိၚ်ကာလချဳဒရာၚ်ပၞာန် ဂွံကၠုၚ် ၂၀ တ္ၚဲပြၚ်ဂှ် ဂကောံဇြဟတ်ပၠန်ဂတးတံ သီဂွံလဝ် နူကဵုရးသေံသၟဝ်ကျာတေံဂှ် ဗ္ဒိုပ်ဒပ် ၁၅၀ ပြၚ် ပါလုပ်သီုကဵုဍုၚ်ဇၞော် ၆ ဍုၚ် ၊ ပ္ဍဲတွဵုရးရခေၚ်ဂှ်လေဝ် ဗ္ဒိုပ်ဗၠာဲသၟိၚ်လ္ၚဵု ပါလုပ်သီုကဵုဒပ်မၚ်ပယျဵု၊ ပ္ဍဲကဵုရးသက်ကိုၚ်ဂှ် ဍုၚ်ၜါဍုၚ်၊ နူကဵုဒေသကရေၚ်ဍာဲ ကေုာံ တွဵုရးချေၚ်တံဂှ် ဗ္ဒိုပ်ဒပ်ပၞာန်တံ ပါလုပ်သီုကဵုဍုၚ်ပယျဵုတံရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်၊ ပရေၚ်ပၞာန် ဥူတာန်သဵုနာၚ်ဂှ် နဒဒှ်ပၞောန်တတိယ ချဳဒရာၚ်ပၞာန်ဏံဂှ် ပြံၚ်လှာဲအာ ကဆံၚ်ပေါဲပၞာန်ဇၞော် မပ္တဝ်အာက္ဍိုပ် အလုံဍုၚ်မွဲမာန်ရောၚ်ဂှ် သ္ၚဳဂၠိပ်လဝ်ရ။

“နူကဵုပေါဲဗ္တိုက် မဗ္တိုက်ဒၟံၚ် အပ္ဍဲတွဵုရး အပ္ဍဲရးဒေသတံဂှ် စိုပ်အာပၞောန်တတိယ မပ္တဝ်အာက္ဍိုပ် ကုဍုၚ်ဇၞော်ကွာန်လှဲတံဂှ်ဏောၚ်တုဲ ပ္ဍဲကဵုအခိၚ်ဂှ် ပေါဲဗ္တိုက်သီဍုၚ်တံ က္တဵုဒှ်ကၠုၚ်ဏောၚ်ဂှ် အဲချိၚ်ကေတ်ရ။ အေ ဂှ်တှ်ေ ပၞာန်ဂှ်တှ်ေ သာတုဲဒှ်ကၠုၚ်ဒၟံၚ်တွဵုရဏောၚ်။ ဆ္ဂး နူကဵုဒှ်ဒၟံၚ် ဗက်ကဵုဒေသတံဂှ် ပြံၚ်လှာဲအာ ကဆံၚ်ပေါဲပၞာန်ဇၞော် အလုံဍုၚ်မွဲဏောၚ်ဂှ် အဲညာတ်ကေတ်ရ” သာ်ဝွံ သ္ဂးရ။

သ္အာၚ်နူဂှ်ပၠန် ပေါဲပၞာန်ဇၞော် မပ္တဝ်အာက္ဍိုပ် ကုဍုၚ်ဇၞော်တံဂှ်ဝွံ ယဝ်ရထ္ပက်ပၞာန် ကုဌာန်ဂအုပ်ဒပ်ပၞာန်တံဂှ်မ္ဂး ကရောၚ်ပၞာန် ဂကောံပံၚ်ကောံပၠန်ဂတးတံသီုဖအိုတ် ဇက်ဂၠေါဲတိုန်နေဗျဳဒဝ်တုဲ ထ္မံက်ရုပ်ရဴမာန်ဏောၚ်ဂှ် ညးဟီုဂးလဝ်ရ။

အခိၚ်လၟုဟ်ဂှ် ပ္ဍဲကဵုရးသေံသၟဝ်ကျာ၊ သက်ကိုၚ်၊ မာန္တလေဝ်၊ ချေၚ်၊ ကရေၚ်ဍာဲ၊ ရခေၚ်၊ ကရေၚ် ကေုာံ တွဵုရးမန်တံဂှ် ပေါဲဗ္တိုက်တံ က္တဵုဒှ်ဒၟံၚ်တုဲ ပ္ဍဲကဵုလ္ပာ်ဗၟံက်ဗဂေါ ဂၠံၚ်ကာ (တောင်ငူ-သံတောင်) ဂှ်လေဝ် ပေါဲဗ္တိုက်ဆေၚ်မုက်တံ က္တဵုဒှ်ဒၟံၚ်ရ။

ချဳဒရာၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံ မစကၠုၚ်လဝ်ဂှ်ဝွံ သၠဲလးကၠုၚ် အလုံဍုၚ်ဗၟာမွဲတုဲ ကံၚ်ဇြဳပၞာန်ဝွံ ဒးဒုၚ်ဒၟံၚ် ပၞာန်ထ္ပက်ဂကောံဇြဟတ်ပၠန်ဂတးတံ ဇၞော်ကဵုဇြဟတ်တုဲ ဒးဆေၚ်ဒၟံၚ်မုက်ကဵု အကာဲအရာကလေၚ်တဝ်စၞေဟ် ဟွံမာန်တံရ။

ပ္ဍဲကဵုပေါဲပၞာန်ဗလးတိ သာ်ဏံတံဂှ် ဒပ်ကံၚ်ဇြဳပၞာန် မကျဗြံဒၟံၚ်ဂှ်ဝွံ သုၚ်စောဲဒၟံၚ် ညးဍုၚ်ကွာန်တံ နဒဒှ်ဇွောံစဵုဒၞါပၞာန်တုဲ ဝးပ္ကဝ်သၞောဝ်ပၞာန်ဍုၚ်သ္အာၚ်တံတုဲ ကလိလောန်ဒၟံၚ် အမှုရာဇဝတ်ပၞာန်တံ အရိုဟ်တ္ၚဲဏောၚ်ဂှ် ကဵုလဝ်သမ္တီရ။

ပရိုၚ်−သြၚ်လောန်တိုၚ်(မ်)

ဗီု−The Kokang