သေန်ကာပေါဝ် ဆက်မိတ် နဲကဲသောၚ်ကလးသၠုဲ တတ်ကၠောံပယျဵုတၟိ ကုအေန်ဒိုဝ်၊ မလေဝ်ယှာ

သေန်ကာပေါဝ်၊ နဝ်ဝေမ်ဗာ ၁၉

သေန်ကာပေါဝ်ဝွံ ပ္ဍဲဂိတုနဝ်ဝေမ်ဗာ ၁၇ တေံ ဆက်မိတ်လဝ် နဲကဲသောၚ်ကလးသၠုဲတၟိ သၞောတ် QR Code တတ်ကၠောံပယျဵု ကုအေန်ဒိုဝ်နဳယှာ၊ မလေဝ်ယှာတံရ။

နူကဵုပရေၚ်ဆက်စၠောံဏံမွဲကဆံၚ် ညးမရပ်စပ်သုၚ်စောဲဂမၠိုၚ်ဝွံ ဆၜိုတ်တက်ကေတ် Scan ဂှ် ရေၚ်တၠုၚ်အာ ပရေၚ်သောၚ်ကလးသၠုဲပရး အကြာဂကောံဗော်သွး ပရေၚ်ဘဏ္ဍာ မၞုံအကြာကၟိန်ဍုၚ်တံမာန်ဏောၚ်ဂှ် ထ္မံက်ထ္ၜးလဝ် ပ္ဍဲကဵုတၚ်လလောၚ်တြးပံၚ်တောဲ ဂကောံသၟိၚ်တၠအဝဵုသြန်သေန်ကာပေါဝ် (MAS) ကေုာံ Bank Indonesia (BI) တံရ။

သ္အာၚ်နူဂှ်ပၠန် ပ္ဍဲကဵုသၞောတ်သောၚ်ကလးသၠုဲ တတ်ကၠောံပယျဵုတံဂှ် သွက်ဂွံကဵုကေတ် နကဵုသြန်အပ္ဍဲဒေသတံဂွံဂှ် တိုက်သြန်ဗဟဵုၜါဍုၚ်ဏံ သွက်ဂွံကၠောန်ၜိုတ်အာ နဒဒှ်မူမွဲ ပ္ဍဲကဵုသၞာံ ၂၀၂၄ ဂှ် နွံဒၟံၚ်ရောၚ် ဂွံတီကေတ်ရ။

ပ္ဍဲကဵုကဝက်သၞာံ ၂၀၂၃ ဂှ် ညးအာတရဴ မလုပ်စိုပ်ကၠုၚ် ပ္ဍဲကဵုဍုၚ်သေန်ကာပေါဝ်ဂမၠိုၚ်ဝွံ ဒှ်နူကဵုဍုၚ်အေန်ဒိုဝ်နဳယှာတုဲ သေန်ကာပေါဝ်ဂှ်တှ်ေ ပရေၚ်ပိုန်ဒြပ်ဇၞော်အိုတ် အာယှဒိုဟ်အဂၞဲဂှ်ကဵု လၟိဟ်မၞိဟ် ၂၇၀ ပြကောဋိကိုဋ် နွံဒၟံၚ်ရ။ ဒှ်ဒၟံၚ်ဍုၚ်ဒယှ်အိုတ် မရနုက်ကဵု ၄ ဍုၚ် လ္တူဂၠးတိဏံမွဲရ။

သၞောတ်မစၟတ်ထောံလၟုဟ်ဂှ်ဝွံ သီုကဵုကမၠောန် အဳကဝ်မာသ် တတ်ကၠောံပယျဵုတံပါလုပ်ဂှ် သၠုၚ်ပ္တိုန်ရေၚ်တၠုၚ်အာ ပရေၚ်ကဵုကေတ်သောၚ်ကလးလှုဲ သွက်ကမၠောန်အာတရဴ အကြာသေန်ကာပေါဝ် ကေုာံ အေန်ဒိုဝ်နဳယှာတံမာန်ဏောၚ်ဂှ် ဂကောံသၟိၚ်တၠအဝဵုသေန်ကာပေါဝ် ဟီုဂးလဝ်ရ။

ဂကောံသၟိၚ်တၠအဝဵုသေန်ကာပေါဝ်ဂှ်ဝွံ ဆက်စၠောံလဝ် ပရေၚ်သောၚ်ကလးသြန်တတ်ကၠောံပယျဵု သီုကဵုတိုက်သြန်ကောန်ဂကူမလေဝ်ယှာ (Bank Negara Malaysia-BNM) ဂှ်တုဲ အကြာ PayNow သေန်ကာပေါဝ်ကဵု DuitNow မလေဝ်ယှာတံဂှ် စရေၚ်တၠုၚ်ဒၟံၚ် ပရေၚ်ဆက်စၠောံသၞောတ်သောၚ်ကလးလှုဲတံ ဗွဲမဗဗွဲကဵုအခိၚ်ယျ မဒှ်ရ။

နူကဵုတၚ်ရေၚ်တၠုၚ်သာ်ဏံမွဲကဆံၚ် သွက်ပရေၚ်သောၚ်ကလးလှုဲ၊ လှဲပြံၚ်လှုဲ နူမၞိဟ်မွဲကဵုမွဲ မၞုံအကြာမလေဝ်ယှာကဵု သေန်ကာပေါဝ်တံဂှ် ပရေၚ်ဂီုကၠီုနွံတုဲ သ္ကဵုကလိဂွံဖဵု ခရိတ်အိုတ်သက်သာတံရောၚ်ဂှ် ဂွံတီကေတ်ရ။

သေန်ကာပေါဝ်ဝွံ ပရေၚ်ရေၚ်တၠုၚ်လအာတုပ်သာ်ဏံဂှ် ဆက်စၠောံရေၚ်တၠုၚ်လဝ် သီုကဵုဍုၚ်သေံ၊ ဍုၚ်အိန္ဒိယတံဂှ် နွံဒၟံၚ်ရ။

Ref; CNA