ပ္ဍဲပွိုၚ်ဍုၚ်ယှိုဲကျေန် ဟိုတ်နူဒးဒုၚ်ဗတိုက်လဝ်ကဵုက္ၜၚ်ကျာတုဲ ကောန်အရာပ် ဒးချိုတ်လဝ် (၁) တၠ၊ ဗ္ဒာဲ ၆၀၀ ဒးပါဲဓလေတ်ဒၟံၚ်

ယှိုဲကျေန်၊ နဝ်ဝေမ်ဗာ (၂၁)

ကြဴနူဗဒိုပ်ဒပ်ကံၚ်ဇြဳပၞာန် မၞုံပွိုၚ်ဍုၚ်ယှိုဲကျေန် ဗော်သွးကောန်ဂကူကရေၚ် KNU မွဲဗဒိုပ် ဒးဒုၚ်ဗတိုက်သီကေတ်လဝ်တုဲ ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော် သီုပန်ပှော်ဒၟံၚ်ကဵုက္ၜၚ်ကျာ ပ္ဍဲကဵုကွာန်တအ်ဆက်ဆက်တုဲ ကောန်အရာပ်မွဲတၠ ဒးချိုတ်လဝ်ရဂှ် ဂွံတီကေတ် အတိုၚ်တၚ်လလောၚ်တြး KNU ဗဟဵုရ။

ဗဒိုပ်ဇိုၚ်ဒဵု ဒပ်ကံၚ်ဇြဳပၞာန် ခမရ-၃၅၁ မၞုံပွိုၚ်ဍုၚ်ယှိုဲကျေန်၊ ခရိုၚ်ညံၚ်လေဝ်ပေန် KNU ဂှ် ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၁၇) တုဲကၠုၚ်တေံ ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တအ် လုပ်စိုပ်ဗတိုက်လဝ်ဂှ် ပေါဲဗတိုက်က္တဵုဒှ်လဝ်တုဲ အခိၚ်လအ်အာ ပွိုၚ် (၁၀) မိနေတ်ဂှ် သီဂွံလဝ်ဗဒိုပ်ရ။

ပ္ဍဲပေါဲဗတိုက်သီဗဒိုပ်ဏံ နူလ္ပာ်ကံၚ်ဇြဳပၞာန် ပရေၚ်ဇီုကပိုက်ချိုတ်ဂျိုၚ်ဂှ်မ္ဂး ၜိုန်ရသ္ပဒ္တန်ဟွံမာန်ကီုလေဝ် လ္ပာ်ဒပ်ပံၚ်ကောံ KNLA တအ်ဂှ် ပရေၚ်ဇီုကပိုက် ဒးလဝ်ဟၟဲတုဲ သီဂွံလဝ်လွဟ်လက်နက်မကမ် မပ္တံကဵုလွဟ်ဇၞော်သုၚ်ပျောၚ် မွဲဒကိုအ်၊ မကမ်၊ ဗုမ်ကၠဟ်တအ်ရဂှ် လလောၚ်တြးလဝ်ရ။

ပ္ဍဲပေါဲဗတိုက်သီဗဒိုပ်ဂှ် အတိုၚ်တၚ် ဒပ်ပၞာန်ဗၠးၜးညးဍုၚ်ကွာန်ဗၟာ BPLA ပံၚ်တောဲပါလုပ်ဗတိုက်လဝ် လလောၚ်တြးလဝ်မ္ဂး ဒပ်ကံၚ်ဇြဳပၞာန် ဒးဂိလဝ် ပ္ဍဲကဵုပေါဲဗတိုက်ဏံ ဂြိပ်စ္ဍးတိတ်လဝ် နူကဵုဗဒိုပ်ဂှ်သီုဖအိုတ်ရဂှ် ဂွံတီကေတ်ရ။

ကြဴနူဒးဒုၚ်သီကေတ်ဗဒိုပ်တုဲဂှ် ပါဲနူဒပ်ကံၚ်ဇြဳပၞာန် ပန်ဖျေံလွဟ်ဇၞော် လၟိဟ်ဂၠိုၚ်ၚ်ကဵုဝါတုဲ နူကဵုဍာန်ကျာလေဝ် ကၠုၚ်စိုပ်ပန်ပှော်လဝ် နက္ၜၚ်ကျာဂျေတ်ဖိုက်တာ ဗ္ဒာဲ (၆) ဝါဂှ်ရ ကောန်ဒေသညးဍုၚ်ကွာန် နူကဵုကွာန်ကလဝ်တိုဝ်ခဳ၊ ထဳခေလအ်၊ ကွာန်ထိုဝ်ခေပူ (၃) ကွာန် ၅၇၂ တၠတအ်ကဵု ညးဍုၚ်ကွာန် နူကဵုကွာန်ဗ္ဒာဲဗ္ဒာဲ တၞဟ်တအ်ဂှ် ဒးဂြိပ်ဒဴပါဲဓလေတ်ဒၟံၚ်ရဂှ် ဓမံက်လဝ် ပ္ဍဲတၚ်လလောၚ်တြးရ။

ပ္ဍဲပရေၚ်ဒပ်ကံၚ်ဇြဳပၞာန် ဗတိုက်လဝ်ကဵုက္ၜၚ်ကျာဂှ် သ္ၚိဒၟံၚ်နူကွာန်ကျောက်တာန် ပွိုၚ်ဍုၚ်ယှုဲကျေန် KNU (၃) မ ဇီုကပိုက် ဒးလီုလာ်လဝ်တုဲ မၞိဟ်ဗြဴဴ (၁) တၠ ဒးလဝ်လွဟ်မကမ် ဒးချိုတ်လဝ်ရဂှ် KNU လလောၚ်တြးလဝ်ရ။

ပ္ဍဲအခိၚ်ဗတိုက်လဝ်ကဵုလွဟ်ဇၞော် ဗတိုက်လဝ်ကဵုက္ၜၚ်ကျာတုဲဂှ် ပၞာန်ရီု နူကဵုလ္ပာ်ကံၚ်ဇြဳပၞာန် ထပ်စိုပ်ကၠုၚ်တုဲ ပေါဲဗတိုက်ၜါလ္ပာ် ထပ်က္တဵုဒှ်လဝ်ကဵု ဒပ်ပံၚ်ကောံ KNLA ပ္ဍဲကြုၚ်ယျေပျာန်ချောၚ်ရဂှ် ဂွံတီကေတ် အတိုၚ်တၚ်လလောၚ်တြးရ။

ပရိုၚ် – သြၚ်လောန်တိုၚ်မ်

ဗီု -KNU