မုဟ်ဍုၚ်၊ နဝ်ဝေမ်ဗာ ၂၁
တွဵုရးဍုၚ်မန်၊ ဍုၚ်မုဟ်ဍုၚ် ဗ္ဒိုပ်ဗၠာဲသၟိၚ်ၝောံဍုၚ် ဒးဒုၚ်ဗ္တိုက်ကဵုဒရုၚ်တုဲဂှ် လ္ပာ်ကံၚ်ဇြဳပၞာန် ပတေၚ်ဂြတ်လဝ်ပရေၚ်ဂီုကၠီုအပ္ဍဲဍုၚ်တုဲ ဂၠံၚ်လ္ၚဵုတံဂှ် ကၟာတ်လဝ်အခေါၚ်တတ်ကၠောံအာကၠုၚ်တံရောၚ် ဂွံတီကေတ် အတိုၚ်ဂလာန်ညးဒေသတံရ။
ပ္ဍဲဂိတုနဝ်ဝေမ်ဗာ ၁၉ တေံ ဗ္ဒိုပ်ဗၠာဲသၟိၚ်ၝောံဍုၚ်မုဟ်ဍုၚ် ဒးဒုၚ်ဗ္တိုက်ကဵုဒရုၚ်ဂှ်ရ ဗမ်ဒတုံဗ္တိုဟ်ထ္ကးအာလဝ် ပ္ဍဲကဵုဆေၚ်ဍာ်လက်ဖက်သက်သာ သွက်ညးဒုၚ်ကာတံဂှ်တုဲ ဂြောဝ်ဂတာဗၠာဲသၟိၚ်တံမွဲတၠကဵု ကောန်ဝုတ်အာယုက် ၁၅ သၞာံ (မသင်းသဇင်ဖူး) ကလိဂွံလဝ်ဝပ်ရ။
ကြဴနူလၟေၚ်ဒဒှ်ဏံတုဲ စနူဂိတုနဝ်ဝေမ်ဗာ ၂၀ ဏံတုဲ နူကဵုကံၚ်ဇြဳပၞာန် ကၟာတ်လဝ်အခေါၚ်တတ်ကၠောံအာကၠုၚ်ဂၠံၚ်လ္ၚဵု မၞုံပွဳပွူဗ္ဒါဲဗ္ဒိုပ်ဗၠာဲသၟိၚ်ၝောံဍုၚ်ဂှ်တုဲ ဗ္ဒါဲဗ္ဒိုပ်ဂှ်လေဝ် ဂလိုၚ်ပ္တိုန်ဖျေံလဝ်ဇုက်ပသဲ ကေုာံ ဇွောံတာဒၞါ (ဘလောက်တုံး) တံဂှ် ညးဒေသတံ ဟီုဂးလဝ်ရ။
သ္အာၚ်နူဂှ်ပၠန် ကံၚ်ဇြဳပၞာန်ဝွံ ပ္ဍဲကဵုဒၞါဲဂၠံၚ်လုပ်တိတ်ဍုၚ်မုဟ်ဍုၚ်ကဵု ဂၠံၚ်ဒဵုထပှ်ကဝးတံဂှ်လေဝ် ကၟာတ်လဒဵုဂၠိုက်ဂၠါဲစၟဳတ်တံ ကၠောန်ဒၟံၚ်တုဲ သီုဗ္တံသီုတ္ၚဲ ဂွံမိၚ်ဒၟံၚ် ရမျာၚ်ပန်ပှော်လွဟ်ဇၞော်တံရောၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံတုဲ ညးဍုၚ်ကွာန်ဒေသ မၞုံအရာပ် ဗ္ဒါဲဇိုၚ်ဒဵုထပှ်ကဝးတံဂှ်ဝွံ ဆုဲပြံၚ်ကၠုၚ် လ္တူဍုၚ်တံဂှ်ကဵု ညးဒေသလ္ၚဵုတံဂှ် ဆုဲပြံၚ်မံၚ်တန်တဴကၠုၚ် အခိၚ်ဗ္တံတံ နွံကၠုၚ်ဂှ် ဂွံတီကေတ် ဇရေၚ်ညးလ္တူဍုၚ်တံရ။
အခိၚ်လၟုဟ်ဂှ် ညးဒေသမုဟ်ဍုၚ်တံဝွံ မ္ၚးနူကဵုပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံဂှ် ဟိုတ်နူပရိုၚ် ဂကောံဇြဟတ်ပၠန်ဂတးတံ လုပ်စိုပ်ဗ္တိုက် အပ္ဍဲဍုၚ်ဂှ်တုဲ ပရေၚ်ဒှ်ဓဝိၚ်ဂွိၚ်ဂွါဲတံ သၠုၚ်တိုန်ဒၟံၚ်ရ။
ပ္ဍဲကဵုတ္ၚဲဗ္ဒိုပ်ဗၠာဲသၟိၚ်ၝောံဍုၚ် ဒးဒုၚ်ဗ္တိုက် တ္ၚဲဏံဂှ်ရ ရုၚ်ဌာနက္ဍိုက်ပ်ပရေၚ်အုပ်ဓုပ်ကာနာနာ ပွိုၚ်ဍုၚ် မၞုံဍုၚ်ကျာ်မြဟ် ဒးဒုၚ်ဗ္တိုက်လဝ် ကဵုဒရုၚ်ကီုလေဝ် ဇီုကပိုက်ချိုတ်ဂျိုၚ်တံ ဟွံမွဲပုဟ်ဂှ် ဂၠိုက်ဂၠါဲဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−SBM
sanlontai