သွက်ဂွံသောၚ်ကလး ပရေၚ်ကၟိန်ဍုၚ်ဗၟာ ခက်ခုဲကၠုၚ် သမ္မတဖိလေတ်ပိုၚ် ဟီု

မနဳလာ၊ နဝ်ဝေမ်ဗာ(၂၁)

ပ္ဍဲကၟိန်ဍုၚ်ဗၟာ ဒပ်ပၞာန်သီလဝ်အဝဵု ပေါဲဗတိုက်တအ် သာတုဲသ္ကာတ်မြဟ်ကၠုၚ်ဒၟံၚ်ဂှ် သွက်အာဇြဳယာန် ဂွံသောၚ်ကလး ပရေၚ်ကၟိန်ဍုၚ်ဗၟာ ဒှ်ကၠုၚ်ပြဿနာခက်ခုဲမွဲရဂှ် သမ္မတဖိလေတ်ပိုၚ် ဖာဒဳနာန်မာကိုစ် ဟီုဂးလဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၀) ရ။

သွက်ဂွံသောၚ်ကလးပရေၚ်ကၟိန်ဍုၚ်ဗၟာဂှ် ၜိုန်ရလးဖျေံလဝ် တၚ်တုပ်စိုတ် (၅) တၚ်ကီုလေဝ် ပြဿနာဂမၠိုၚ် ပါလုပ် သီုပရေၚ်ကဵုအရီုဗၚ်ဗ္စာရဏာပရေၚ်မၞိဟ် အယှုက်ထုဲ နွံဒၟံၚ်ရဂှ် မာကိုစ်ဟီုလဝ် ပ္ဍဲဖိုဝ်ရာမ်ဟာဝိုၚ်အဳယှဳ ကၠောန်ဗဒှ်ဒၟံၚ် ပ္ဍဲဍုၚ်ဖိလေတ်ပိုၚ် မွဲဂှ်ရ။

ကြဴနူဒးဒုၚ်သီလဝ်အဝဵုကဵုဒပ်ပၞာန်ဗၟာ နူသၞာံ ၂၀၂၁ လောန်ကၠုၚ်တေံတုဲ ပရေၚ်ပိုန်ဒြပ်ကၟိန်ဍုၚ် ပါလုပ် သီုသၞောတ်ဒဳမဝ်ကရေဇြဳ ဒးခရိုဟ်လီုလာ် က္တဵုဒှ်လဝ်တုဲ လၟိဟ်မၞိဟ်မွဲပြကောဋိကိုတ်ပြၚ်ဂှ်လေဝ် ထောံသ္ၚိဌာန်တုဲ ဒးဂြိပ်ဒဴ ပါဲဓလေတ်ဒၟံၚ်ရ။

“သွက်အာဇြဳယာန် ဂွံသောၚ်ကလးပြဿနာဏံဂှ် ဇြဟတ်ဓရိုဟ် နွံဒၟံၚ်ဗွဲမဂၠိုၚ်ရ၊ အရာဏံ ဒှ်ပြဿနာဝါတ်ဂါတ်ခက်ခုဲလောန်ရ”ဂှ် သမ္မတဖိလေတ်ပိုၚ် မာကိုစ် ဟီုလဝ်ရ။

ဖိလေတ်ပိုၚ်ဂှ် ကြဴနူလုပ်ကေတ်အဇာ နဒဒှ်အလန်တၠသ္ၚိ စၞးကၟိန်ဍုၚ်ဗၟာတုဲဂှ် ပ္ဍဲသၞာံ ၂၀၂၆ မ္ဂး ကေတ်အာတာလျိုၚ် နဒဒှ်ဥက္ကဋ္ဌအာဇြဳယာန်ရောၚ်ဂှ် ဂွံတီကေတ်ရ။

ဗီုပြၚ်တိပရေၚ်ၜိုဟ်လလံကၟိန်ဍုၚ်ဗၟာ က္ဍိုပ်သ္ကိုပ်အာဇြဳယာန်တအ် လးဖျေံလဝ်ဂှ် လုကဴကတိပါၚ်ဟွံဗိုန်ဗတ်ဏီမ္ဂး သ္ပကဵုအာအခေါၚ် သ္ကိုပ်ပၞာန်သီအဝဵုတအ် တိုန်စိုပ်ကောံဓရီုကဆံၚ်လ္တူ ဟွံသေၚ်ရဂှ် ဂွံတီကေတ်ရ။

သ္ပတံနူဂိတုတုဲကၠုၚ်တေံ မွဲကရောံကဵု မဟာမိတ်ကောဒေံ (၃) ဂကောံဂှ် ဟိုတ်နူပံၚ်တောဲထ္ပက်ဒၟံၚ်ပၞာန်တုဲ ပ္ဍဲကဵုတွဵုရးသေံသၟဝ်ကျာ မၞိဟ်ဂၠိုၚ်ကဵုလက် ထောံသ္ၚိဌာန်တုဲ ဒးဂြိပ်ဒဴဒၟံၚ်ရ။

ဟိုတ်နူပေါဲပၞာန် အလုံမွဲကၟိန်ဍုၚ်တုဲ ကံၚ်ဇြဳပၞာန်ဒးဂိဒၟံၚ်ဂှ် ဒးဆေၚ်ဒၟံၚ်မုက်ကဵု အကာဲအရာ ဒးဆောံလေၚ်ဒၟံၚ် နူပရေၚ်ထံက်ဂလာန် နူဒပ်ပၞာန်ညးတအ်ရဂှ် သမ္မတမာကိုစ် ဟီုလဝ်ရ။

Source: Reuters

Ref: Asiaone