ပ္ဍဲထဝါဲ ဒပ်ကံၚ်ဇြဳပၞာန် ဒးဒုၚ်ကၠတ်ဗ္တိုက်၊ ပရေၚ်ဇီုကပိုက်ချိုတ် ဂၠိုၚ်မာန်

ထဝါဲ၊ နဝ်ဝေမ်ဗာ ၂၁

ရးဒေသဇၞော်တၞၚ်သဳ၊ ပွိုၚ်ဍုၚ်ထဝါဲ၊ ကွာန်မံၚ်မေဝ်ယှံၚ် ဗ္ဒါဲကျာ် ( ရှင်ဓာတ်ဝဲ) ကေုာံ (ဖောင်တော်ဦး) ဒပ်ကံၚ်ဇြဳပၞာန် မဖျေံလဝ်ဒပ်ဂှ် လုပ်စိုပ်ဗ္တိုက်လဝ်ရောၚ် ဂွံတီကေတ် ဇရေၚ်ဂကောံဒပ်ပၠန်ဂတးဒမၠုက်ထဝါဲ DGRF ရ။

ဂကောံဒပ်ကံၚ်ဇြဳပၞာန် ဇြဟတ်ဒပ် ပွဳပွူၜိုတ် ၃၀ နွံဂှ် ပ္ဍဲဂိတုနဝ်ဝေမ်ဗာ ၁၉ အခိၚ်လဒေါဝ်တ္ၚဲ ၁၂ နာဍဳကဝိုက်ဂှ် ဂကောံဒပ်ပၠန်ဂတးဒမၠုက်ထဝါဲ DGRF ဒပ်စြေက် ၂ ဂှ် လုပ်စိုပ်ဗ္တိုက်လဝ်ရ။

အပ္ဍဲပရေၚ်ဗ္တိုက်ဏံဂှ် ဂကောံပၠန်ဂတးတံ ဟိုတ်နူဂွံလဝ်ကၠာတဲဂှ်ရ လ္ပာ်ကံၚ်ဇြဳပၞာန် ဟွံဂွံအခိၚ်ပလေဝ်ပလေတ်မွဲသာ် ဒးဂိအာလဝ်ရောၚ် ညးဒုၚ်တာလျိုၚ်လလောၚ်ပရိုၚ် DGRF ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဟိုတ်နူဒးဒုၚ်ဗ္တိုက်ဂှ်တုဲ ကောန်ဒပ်ကံၚ်ဇြဳပၞာန် ဟွံအောန်နူကဵု ၆ တၠ ဒဒှ်ရချိုတ်အာလဝ်ဂှ် သ္ပဒတန်ဂွံလဝ် နူကဵုညးဒေသတံမွဲကဆံၚ်တုဲ ဇီုကပိုက်ကလိဂွံဝပ်တံလေဝ် နွံဒၟံၚ်ဂှ် သ္ဂးရ။

ကြဴနူလၟေၚ်ဒဒှ်ဏံတုဲဂှ် ဒပ်ကံၚ်ဇြဳပၞာန်ဝွံ နကဵုတၚ်ထ္ၜးဟိုတ် သ္ဇက်ဒးစၟဳတ်သၟာန်သၟုက်နွံဂှ်တုဲ ရပ်ဒက်ဏာလဝ် ညးဒေသ ဟွံအောန်နူကဵု ၃ တၠဂှ် ဂွံတီကေတ် ဇရေၚ်ညးဒေသတံရ။

တုဲကၠုၚ် ပ္ဍဲဂိတုနဝ်ဝေမ်ဗာ ၁၈ တေံဂှ်လေဝ် ဒပ်ကံၚ်ဇြဳပၞာန် နူကဵုသၞေဟ်ကၚ်စၟဳတ်(ဘုရားမဲ) မလုပ်စိုပ်ကၠုၚ် လ္ပာ်ကျာ်(ဖောၚ်တော်ဦး) ဂှ် ဒးဒုၚ်ဗ္တိုက်လဝ်ဂှ်ရ ပေါဲဗ္တိုက်ၜါလ္ပာ် က္တဵုဒှ်လဝ်ရ။

ကြဴနူပေါဲဗ္တိုက် ဗ္ဒါဲပိစှော်မိနေတ် က္တဵုဒှ်လဝ်တုဲဂှ် ဒပ်ကံၚ်ဇြဳပၞာန်ဝွံ ကလေၚ်ဆုတ်ကလေၚ်အာ ဇရေၚ်သၞေဟ်ကၚ်စၟဳတ်(ဘုရားမဲ) ဂှ်တုဲ ဇီုကပိုက်ချိုတ်တံဂှ် ဆက်ဂၠိုက်ဂၠါဲဒၟံၚ်ဖိုဟ်ရောင် ဂကောံဇြဟတ်ပၠန်ဂတးတံ ဟီုရ။

စနူဂိတုတုဲကၠုၚ်တေံ သတ္တာဟလက္ကရဴအိုတ်ဂှ်တုဲ ပ္ဍဲကဵုပွိုၚ်ဍုၚ်ထဝါဲဂှ် အကြာဒပ်ကံၚ်ဇြဳပၞာန်ကဵု ဒပ်စဵုဒၞါဒေသတံဂှ် ပေါဲဗ္တိုက်တံ ကလေၚ်က္တဵုဒှ်ကၠုၚ်တုဲ ကံၚ်ဇြဳပၞာန်ဂှ်လေဝ် ဟိုတ်နူသၠုၚ်ပ္တိုန်လဝ်ပရေၚ်ဂီုကၠီု အပ္ဍဲဍုၚ်ဂှ်ရ ညးဒေသတံ ဒးဂဗဒၟံၚ်အခက်အခုဲ ကုပရေၚ်အာကၠုၚ်ရ။

ပရိုၚ်−သြၚ်လောန်တိုၚ်(မ်)

ဗီု−DGRF