စပ်ကဵုသၞောဝ်ဥပဒေမူအပြောံ ပရေၚ်ပလေဝ်ပလေတ်အခိၚ်ကာလအကြာ NLD မသ္ပဒတန်လဝ်ဂှ်တုဲ ဂကောံဇြဟတ်အပ္ဍဲဒေသတံ ဒစဵုဒစး

ထဝါဲ၊ နဝ်ဝေမ်ဗာ ၂၁

သၞောဝ်ဥပဒေမူအပြောံ ပရေၚ်ပလေဝ်ပလေတ် ဒစးဒုၚ် သွက်သၞောဝ်သ္ဇိုၚ်ဒက်ပ္တန် အခိၚ်ကာလအကြာ ပိရး နူကဵုကမ္မတဳကေၚ်ကာဗဟဵု ဂအုပ်ဂကောံဒဳမဝ်ကရေဇြဳကောန်ဂကူ NLD မသ္ပဒတန်လဝ်ဂှ် ဂကောံဇြဟတ်အပ္ဍဲဒေသတံ ဒစဵုဒစးကၠုၚ်ရ။

ပ္ဍဲဂိတုနဝ်ဝေမ်ဗာ ၁၇ တေံ ညးစၞးကၠတ်ထဝ်ရးဒေသဇၞော် ဂွံဒုၚ်ရုဲစှ်လဝ် နကဵုသၞောတ်ဒဳမဝ်ကရေဇြဳ နူကဵုရးသက်ကိုၚ်၊ ရးတၞၚ်သဳ ကေုာံ ရးမဂွဵုတံ ကော်ကၠောန်ဗဒှ်လဝ် ကၠတ်ထဝ်ရး ဗွဲမသၟဟ်ညဳကဵု လက္ချန်ကၠတ်ထဝ်တံဂှ်ရောၚ် NLD သ္ဂးရ။

အပ္ဍဲကၠတ်ထဝ်ဏံဂှ် ရုဲစှ်ပ္တိုန်လဝ် ဥက္ကဌ၊ ဒုဥက္ကဌတံဂှ်တုဲ ညံၚ်သၞောဝ်သ္ဇိုၚ်ဒက်ပ္တန်အခိၚ်ကာလအကြာ၊ အစဳဇန်အခိၚ်ကာလအကြာ မရန်ကဵု ကၟိန်ဍုၚ်ပံၚ်ကောံဖေဝ်ဒရေဝ်ဒဳမဝ်ကရေဇြဳတံ ညံၚ်ဂွံမံက်ဂတဝ်ကၠုၚ်ဂှ် သ္ပဒတန်လဝ် သၞောဝ်အပြောံ စပ်ကဵုပရေၚ်ပလေဝ်ပလေတ်ဒစးဒုၚ်တံရ။

ကိုဝ်မေန်လွေန်ဥူ ကောန်ဂကောံကမ္မတဳဗကပ်ဗဗေၚ် ပရေၚ်ချဳဒရာၚ်ပရေၚ်ဒဳမဝ်ကရေဇြဳ ခရိုၚ်ထဝါဲဂှ် ကၠတ်ထဝ်အလန်တတိယဂှ်ဝွံ ဟိုတ်ဒၟါနူကၠုၚ်နူကဵု သၞောဝ်သ္ဇိုၚ် ၂၀၀၈ ဂှ်ရ နူကဵုဏံ ပွမသ္ပဒတန် မူအပြောံအခိၚ်ကာလအကြာဂှ် လုပ်အာသၞောဝ်ဟွံသေၚ်ပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပိုယ်တံကၠိုဟ်လဝ်ဂှ်တှ်ေ ကၠတ်ထဝ်ရးဒေသဇၞော်တၞၚ်သဳ မရနုက်ကဵုတတိယဟီုဂှ် ကၠုၚ်နူကဵု သၞောဝ်သ္ဇိုၚ် ၂၀၀၈ ရဏောၚ်။ ဟိုတ်ဂှ်ရ ကၠတ်ထဝ်ဂှ် ဟွံလုပ်သၞောဝ်ပုဟ်၊ မူဟိုတ်ရောတှ်ေ ၂၀၀၈ ဂှ် လီုအာတုဲတုဲယျ။ အေ ဂှ်တှ်ေ ကၠတ်ထဝ်ရးတၞၚ်သဳ အလန်တတိယဟီုဂှ်လေဝ် ဟွံမွဲပုဟ်။ သၞောဝ်မသ္ပဒတန်လဝ် နူကဵုကၠတ်ထဝ်ဏံဂှ်လေဝ် လုပ်အာသၞောဝ်ဟွံသေၚ်ပုဟ်။ ပိုယ်တံလေဝ် ဒုၚ်အာတဲဟွံသေၚ်ပုဟ်“ သာ်ဝွံ ညးသ္ဂးရ။

ဂကောံဇြဟတ် မၞုံအပ္ဍဲရးတၞၚ်သဳ ၂၀ ပြၚ်ဂှ် စပ်ကဵုသၞောဝ်အပြောံဏံဂှ်တုဲ ဒဵုကဵုတ္ၚဲဏံ ကဵုသမ္တီဗွဲမလုပ်သၞောဝ်တုဲ သဳကၠဳကီု၊ ကေတ်လညာတ်ကီု ကုဂကောံဇြဟတ်ပၠန်ဂတး၊ ပရေၚ်ဍုၚ်ကွာန် အပ္ဍဲဒေသတံ ဟွံမွဲပုဟ်ဂှ် ပ္ဍဲဂိတုနဝ်ဝေမ်ဗာ ၁၈ တေံ လလောၚ်ပ္တိတ်လဝ်လစွံစိုတ်ရ။

သ္အာၚ်နူဂှ်ပၠန် ဟိုတ်နူပလီုလဝ် သၞောဝ်သ္ဇိုၚ်ဒက်ပ္တန် ၂၀၀၈ ဂှ်သောၚ်ၚ်ကၠးကၠးတုဲဂှ်ရ ဒုၚ်သ္ဇိုၚ်ကဵုသၞောဝ်ဂှ်တုဲ နူကဵုဗော်မွဲမွဲ ဂကောံမွဲမွဲ ကၠောန်သ္ပၜတ်ၜေတ်ကၠုၚ် အခေါၚ်စၞောန်ပျးစပ်ကဵုတွဵုရးသာ်ဏံဂှ်ဝွံ နကဵုဂကောံဗော်သွးမွဲမွဲ အုပ်ဓလီု ပရေၚ်ဍုၚ်ကွာန်အပ္ဍဲဒေသတံရဏောၚ်ဂှ် သ္ဂးရ။

ဒေသတၞၚ်သဳဂှ် စှ်ေလဝ်စိုတ် နဒဒှ်ဖေဝ်ဒရာယူနေတ် မၞုံကဵုအခေါၚ်စၞောန်ပျးအပိုၚ် ကေုာံ ကဆံၚ်တုပ်သၟဟ်မွဲဏောၚ်တုဲ ကံကုသိုလ် တၞၚ်သဳဂှ် ညးဍုၚ်ကွာန်အပ္ဍဲဒေသတံဟေၚ် အခေါၚ်စၞောန်ပျး သ္ဂုတ်သွာတ်နွံဂှ် ဂကောံဇြဟတ်အပ္ဍဲဒေသတံ ကဵုလဝ်သမ္တီ ပ္ဍဲကဵုတၚ်လလောၚ်တြးဂှ်ရ။

ညးမၞုံအခေါၚ်ဟီုဂး သက်ကိုၚ်ဝှဝ်ရာမ် ကိုဝ်သဵုဝေန်ဇြိုဲဂှ် ကိစ္စကော်ကေတ်ကၠတ်ထဝ် နူကဵုသၟဝ်သၞောဝ်သ္ဇိုၚ် ၂၀၀၈ တုဲ သ္ပဒတန်သၞောဝ်ဂှ်ဝွံ ဟွံဒှ်လွေဟ်ပရေၚ်အာက္ဍိုပ်ပံၚ်ကောံတုဲ ကိစ္စသာ်ဏံတံဂှ် ယဝ်ရပ္ညဳပ္ညပ်လဝ် ပ္ဍဲကဵု NUCC ဟွံမွဲမ္ဂး ဟွံကိတ်ညဳကဵု ချာတာပုဟ်ဂှ် ဟီုရ။

“ကော်ကေတ်ကၠတ်ထဝ် နူကဵုသၟဝ်သၞောဝ်သ္ဇိုၚ် ၂၀၀၈ တုဲ ကိစ္စသ္ပဒတန်သၞောဝ်ဂှ် ဟွံဒှ်ဗီုပြၚ် ပံၚ်ကောံအာက္ဍိုပ်ပုဟ်ဂှ် အဲကၠိုဟ်ကေတ်ရ။ မွဲပၠန်ဂှ် ပ္ဍဲကဵုပဋိညာန် ဖေဝ်ဒရာဒဳမဝ်ကရေဇြဳ သ္ကုတ် ၂၊ ပိုဒ် ၅၃ ဂှ်လေဝ် စပ်ကဵုကိစ္စခၞံသၞောဝ်၊ ပရေၚ်အုပ်ဓုပ်၊ ပရေၚ်စဳရေၚ်သၞောဝ်ဓဝ် ဖေဝ်ဒရာယူနေတ်တွဵုရးတံဂှ် ဒးပ္ညဳပ္ညပ်ရေၚ်တၠုၚ်အာ ပ္ဍဲကဵုကံၚ်ဇြဳကဵုကသပ်ပရေၚ်ညဳသၟဟ်ဂကူဏောၚ်ဂှ် ပါလုပ်ရ။ ဟီုတှ်ေ ကိစ္စခၞံသၞောဝ်လၟုဟ်ဂှ် ပ္ညဳပ္ညပ်လဝ် ပ္ဍဲ NUCC နွံ၊ ဟွံမွဲဟာ။ ယဝ်ရဟွံမွဲပုဟ်ဟီုမ္ဂး ဟွံကိတ်ညဳကဵု ချာတာပုဟ်ဂှ် ဟီုဂွံရ“ သာ်ဝွံ သ္ဂးရ။

ပ္ဍဲကဵုတၚ်လလောၚ်တြး ကမ္မတဳကေၚ်ကာဗဟဵု NLD ဂှ် နူကဵုရးဒေသဇၞော်ပိ ကော်ကၠတ်ထဝ်တုဲ သ္ပဒတန်မူအစဳဇန်အပြောံအခိၚ်ကာလအကြာ ကိစ္စဏံဂှ် ပ္ညဳပ္ညပ်ရေၚ်တၠုၚ်လဝ် ကုကံၚ်ဇြဳကဵုကသပ်ပရေၚ်ညဳသၟဟ်ဂကူ NUCC နွံ၊ ဟွံမွဲဂှ် ထ္မံက်ထ္ၜးလဝ် ဟွံမွဲရ။

ကိစ္စပလေဝ်ပလေတ် သွက်ဂွံချူဓဇက် အစဳဇန်အခိၚ်ကာလအကြာဂှ်ဝွံ ဟိုတ်နူစၞောန်ပျးစၟတ်သမ္တီတဴ ကံကုသိုလ် ရးဒေသဇၞော် ဟွံသေၚ်မ္ဂး တွဵုရး ဖေဝ်ဒရာယူနေတ်တံသီုဖအိုတ်ဂှ်ရ ထေက်ကဵုဒးဖျေံစၟတ် လၟေၚ်ကမၠောန် မကိတ်ညဳကဵု ပရေၚ်ပၠန်ဂတးဗလးတိ မၞုံကဵုအခေါၚ်ကဆံၚ်တုပ်သၟဟ် မၞုံကဵုပွမကၠးမှးတံရောၚ်ဂှ် သက်ကိုၚ်ဝှဝ်ရာမ် ဖ္တိုက်ဖ္အောဝ်လဝ်ရ။

ဂကောံဇြဟတ်ပၠန်ဂတး၊ ပရေၚ်ဍုၚ်ကွာန် မၞုံအပ္ဍဲဒေသတံဂှ် ပ္ဍဲအရာချူဓဇက် အစဳဇန်အခိၚ်ကာလအကြာတံ၊ အစဳဇန်အခိၚ်ပြံၚ်လှာဲလွေဟ်တံ ကေုာံ သၞောဝ်သ္ဇိုၚ်ဒက်ပ္တန်တွဵုရးအခိၚ်ကာလအကြာတံဂှ် နွံပၟိက်ဒးကၠောန်ၜိုတ်အာ နူကဵုပလာတ်ဝှမ် ပရေၚ်ဍုၚ်ကွာန် ပါလုပ်သီုဖအိုတ်တံဏောၚ်ဂှ် ထံက်ထ္ၜးလဝ်ရ။

ပရိုၚ်−သြၚ်လောန်တိုၚ်(မ်)

ဗီု−Frontier Myanmar