မတ်မလီု၊ နဝ်ဝေမ်ဗာ ၂၁
ဟိုတ်နူပေါဲဗ္တိုက် မက္တဵုဒှ်ဒၟံၚ် အလုံဍုၚ်တံကီု သီုကဵုၚုဟ်သြန်ၝာတ်သေံ ကလေၚ်သၠုၚ်တိုန်ကၠုၚ်တံကီုဂှ်တုဲ အပ္ဍဲကဵုဒေသဂှ် စနူကဵုဗၞိက်စၞစသုၚ်သ္ဇိုၚ် ပါလုပ်သီုကဵုသ္ၚုတံဂှ် ၚုဟ်ထပ်သၠုၚ်တိုန်ကၠုၚ်ရောၚ် သၟာဗၞိက်အပ္ဍဲဍုၚ်မန်တံကဵု ညးဗြဴတၠသ္ၚိတံ ဟီုကဵုဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ဗၞိက်သ္ဇိုၚ်တံဂှ်ဝွံ စနူဂိတုနဝ်ဝေမ်ဗာတုဲ ကရောံပေါဲဗ္တိုက် မသ္ကာတ်မြဟ်ကၠုၚ်ဂှ် ဟိုတ်နူတိဍာ်ဟွံညိၚ်ဝတ်ကီု၊ ပရေၚ်ပလံၚ်ဗစိုပ် ခက်ခုဲကၠုၚ်ကီု၊ ၚုဟ်မးသြန်ဗၟာ စှ်ေကၠုၚ်ကီုတုဲ ၚုဟ်သြန်ၝာတ်သေံ သၠုၚ်တိုန်ကၠုၚ်ဂှ်ရ ၚုဟ်ဗၞိက်ဖျာတံလေဝ် ဗက်တိုန်ကၠုၚ်လဝ်ရ။
ၚုဟ်သြန်ၝာတ်သေံဝွံ စနူဂိတုနဝ်ဝေမ်ဗာစတေံဂှ် မွဲၝာတ် နူကဵုဂွံဒၟံၚ် သြန်ဒ္ကေဝ်ဗၟာ ၈၅ ဒ္ကေဝ်ဂှ် ပ္ဍဲဂိတုနဝ်ဝေမ်ဗာ ၂၀ ဂှ် မွဲၝာတ်ဂှ် ၚုဟ်သၠုၚ်တိုန်ကၠုၚ်လဝ် စဵုကဵုဗ္ဒါဲ ၁၀၀ ဒ္ကေဝ်ရ။
ဟိုတ်နူအသိၚ်အလိုန်ပေါဲဗ္တိုက်တံတုဲ ၚုဟ်သ္ၚုဂှ်လေဝ် အခိၚ်သ္ၚုတၟိမံက်ဂှ် သ္ၚုမောဝ်မွဲရိုက်ဂှ် ၚုဟ်သၠုၚ်တိုန်ကၠုၚ် စဵုကဵုမွဲကိုဋ်ဒ္ကေဝ်ပြၚ်တုဲ သ္ၚုကြံၚ် (ဧည့်မထ) မွဲရိုက်ဂှ် ၚုဟ်သၠုၚ်တိုန်ကၠုၚ်လတ် စဵုကဵုပွဳပွူ ဒ္စါံဠက်ဒ္ကေဝ်ရ။
သၟာဗၞိက်မွဲတၠဂှ် ၚုဟ်ဗၞိက်ဖျာသ္ဇိုၚ်တံဝွံ ကရောံပေါဲဗ္တိုက်တံဂှ် ဟိုတ်နူၚုဟ်သြန်သေံ သၠုၚ်တိုန်ကၠုၚ်ဂှ်ရ ၚုဟ်ဗက်တိုန်ကၠုၚ် မဒှ်တုဲ အကာဲအရာလၟုဟ်ဝွံ ဒှ်သဘဴဍုၚ်ကွာန်လီုဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ၚုဟ်သြန်ၝာတ်ဂှ် ကလေၚ်ဒှ်အာ ၁၀၀ ပၠန်ယျ။ ပရေၚ်ဍုၚ်ကွာန်ဍုၚ်ဗၟာဟွံညိၚ်ဝတ်တုဲ ၚုဟ်သြန်ဂှ်စှ်ေ။ ၚုဟ်ဖျာဂှ်တိုန်။ ပေါဲပၞာန်ၚုဟ်ဗၞိက်ဖျာဂှ်လေဝ် ဒးလုပ်မံၚ်မွဲလ္ပာ်။ မွဲလ္ပာ်တေံဂှ်လေဝ် ဒးလုပ်ဒၟံၚ် ပေါဲပၞာန်အပ္ဍဲဍုၚ်ရ။ အခိၚ်ဍုၚ်ကွာန်ပိုယ်တံ ဟွံညိၚ်ဝတ်ဂှ် သြန်ဗၟာပိုယ်တံဂှ် စှ်ေအာရ။ ၚုဟ်မးသြန်ဗၟာ စှ်ေအာဟဂှ်ရ။ တုဲပၠန် နစကလေဝ် ထိၚ်ဟွံမာန်ပုဟ်။ အခိၚ်ဏံဂှ် အလဵုအသဳဂှ်တှ်ေ ကြေပ်ဂြတ်ညိတှ်ေ ကြေပ်ဂြတ်ဏောၚ်။ ဗၞိက်ဖျာတံဂှ် တိုန်ဖအိုတ်တုဲ ညးဍုၚ်ကွာန်တံဂှ် ဒှ်ဒဒိုက်။ ဒှ်သဘဴဍုၚ်ကွာန်လီုရဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ဟိုတ်နူဍုၚ်ကွာန်ဟွံညိၚ်ဝတ်တုဲ ၚုဟ်သြန်ၝာတ်သေံ မသၠုၚ်တိုန်ကၠုၚ်ဂှ် နကဵုကံၚ်ဇြဳပၞာန် ဒးထိၚ်ဒက် ဗွဲမပြဟ်တုဲ ယဝ်ရဟွံထိၚ်ဒက်မ္ဂး ၚုဟ်ကပေါတ်ဗၞိက်စၞစသုၚ်သ္ဇိုၚ်တံ သၠုၚ်တိုန်ကၠုၚ် ဂၠိုၚ်ကဵုဆမာန်ရောၚ်ဂှ် ညးဆက်ဟီုရ။
ကရောံပေါဲဗ္တိုက်တံဂှ် ဟိုတ်နူၚုဟ်သြန်ၝာတ်သေံ သၠုၚ်တိုန်ကၠုၚ်ဂှ်ရ ကပေါတ်ဗၞိက်သေံဂမၠိုၚ်ဝွံ အပ္ဍဲမွဲၜါတ္ၚဲဂှ်ရဂှ် တန်တဴကဵုဂကူအဇာဍေံတုဲ ကပေါတ်မွဲဂကူ နူကဵု ၅၀၀ ဒ္ကေဝ်ဂှ် ၚုဟ်သၠာ်တိုန်ကၠုၚ် စဵုကဵု ၃၀၀၀ ဒ္ကေဝ်ရ။
ညးဗြဴတၠသ္ၚိမွဲတၠဂှ် ဟိုတ်နူၚုဟ်ဗၞိက်ဖျာတံ ထပ်သၠုၚ်တိုန်ကၠုၚ်ဂှ်ရ ဒးခၞေံစသုၚ်ဒၟံၚ်တုဲ ဒၟါနူကဵုအခက်အခုဲကမၠောန်ကၟိတ်တံတုဲ သွက်ဂွံဒတူလိုၚ် သာတုဲခက်ခုဲကၠုၚ်ဂှ် ဟီုရ။
“ၚုဟ်ဖျာတံတိုန်ဂှ် ဟွံဒးဟီုရ။ လၟုဟ် ညးဍုၚ်ကွာန်တံဂှ်တှ်ေ ဒှ်ဒၟံၚ်ဒဒိုက်အိုတ်ဍာ်ရ။ ကၠာတေံဟီုတှ်ေ လှုဲပိပန်လ္ၚီရဂှ် အလုံသ္ၚိမွဲ စဂယးသဝ်တ္ၚဲဂွံမံၚ်။ လၟုဟ်ဂှ် ကေတ်ဏာမွဲဠက်လေဝ် မုဟွံပါကၠုၚ်ပုဟ်။ ၚုဟ်ဖျာတံဂှ် ကလေၚ်တိုန်ဒၟံၚ် ၜိုတ်ပိပန်ဆ။ ကမၠောန်ဂှ်လေဝ် ဟွံပြေပြံၚ်ရပုဟ်လေဝ်။ ကမၠောန်တံဂှ်လေဝ် ဟွံဂေတ်ဂြိပ်တုဲ အခက်အခုဲဂှ်တှ်ေ ဒှ်ဒၟံၚ်တၟာဂလိုၚ်ဏောၚ်“ သာ်ဝွံ သ္ဂးရ။
တွဵုရးဍုၚ်မန်ဝွံ ပါဲနူကပေါတ်ဗၞိက်ပရေၚ်တဵုလွဳတုဲ ကပေါတ်ဗၞိက်စၞစသုၚ်သ္ဇိုၚ်သှ်ေ ဗွဲမဂၠိုၚ်ဂှ် ဒးဗ္ဒဗ္ဒါဲဒၟံၚ် လ္တူကပေါတ်ဗၞိက် မပၠောပ်ပ္တိုန်နၚ် နူကဵုဍုၚ်သေံတံဂှ် အဓိကတုဲ တန်တဴကဵု လ္တူၚုဟ်သြန်ၝာတ်သေံတံဂှ်တုဲ ဒးဒုၚ်စသိုၚ်ဒၟံၚ် ဘဲဒဏ်ၚုဟ်ဗၞိက်ဇၞော်သၠုၚ်တံရ။
တၠပညာပရေၚ်ပိုန်ဒြပ်တံဂှ် ပေါဲဗ္တိုက် မက္တဵုဒှ်ဒၟံၚ်လၟုဟ်တံဂှ်ဝွံ ယဝ်ရကၠောံထၞာန်ပြးအာ အလုံဍုၚ်မ္ဂး ညးဍုၚ်ကွာန်သ္ဇိုၚ်တံ ဒးဒုၚ်စသိုၚ် ဘဲဒဏ်ကၞောဝ်ကၠောဝ်ဗျဵု ပါလုပ်သီုကဵုၚုဟ်ဗၞိက်က္ဍၚ်ဂၠိုၚ်ကဵုဆတံ သီုကဵုကပေါတ်ဗၞိက်အောန်ကြဳတံ ဇၞော်ကဵုဇြဟတ်ရောၚ်ဂှ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai