လာအိုဝ် မသ္ဂောံဒှ်အာဥက္ကဌဒးအလန်ဂှ် ဆက်မိတ် တဆိပ်လိုဝ်ဂိုဝ်အာဇြဳယာန် ကေုာံ ပိုတ်လိက်သ္ကေံ

ဗဳယာန်ကျေန်၊ နဝ်ဝေမ်ဗာ ၂၁

ဍုၚ်လာအိုဝ် သ္ဂောံဒှ်ကၠုၚ်ဥက္ကဌအာဇြဳယာန် ပ္ဍဲသၞာံ ၂၀၂၄ ဏံဂှ်ဝွံ လိုဝ်ကိုဝ်တဆိပ်၊ ပိုတ်လိက်သ္ကေံ၊ ဝပ်သာ် ကေုာံ တၚ်ပလေဝ်ပလေတ် စပ်ကဵုပရေၚ်ကေတ်တာလျိုၚ်ဒးအလန်ဂှ် နူကဵုရေဒဳယောကောန်ဂကူလာအိုဝ် လလောၚ်ပ္တိတ်လဝ်ရ။

ဝန်ဇၞော်ကာဍုၚ်သ္အာၚ်လာအိုဝ် သလာမ်သေကောန်မာသေတ် ကေုာံ ဌာနဝန်ဇၞော်မဆေၚ်စပ်ဂမၠိုၚ်၊ အေဂျေန်ဇြဳဂမၠိုၚ်တံဝွံ စနူသၞာံ ၂၀၂၄ ဂိတုဂျာန္နဝါရဳ ၁ တုဲ သွက်ဂွံရေၚ်တၠုၚ် နဒဒှ်ဥက္ကဌအာဇြဳယာန်ဂှ် ပလေဝ်ပလေတ်ဒၟံၚ်ရ။

ပိုတ်လိက်သ္ကေံ အာဇြဳယာန် မကၠုၚ်စိုပ်ဏံဂှ် ပရေၚ်ဆက်စၠောံ ဇြဟတ်သ္ဂောံခိုဟ် ကေုာံ ပရေၚ်သၠုၚ်ပ္တိုန် ပွမဒုၚ်အဍေဝ်အဍာ မဒှ်တုဲ ဍုၚ်လာအိုဝ် မသ္ဂောံဒှ်ကၠုၚ် ဥက္ကဌအာဇြဳယာန်ဂှ်ဝွံ ပရေၚ်ဆက်စၠောံ မၞုံပ္ဍဲသွာၚ်ဇဳတံဂှ် သွက်ဂွံသၠုၚ်ပ္တိုန် ပရေၚ်ပံၚ်တောဲရေၚ်တၠုၚ် သာတုဲဇြိုဟ်နက်တံဂှ် ဆန္ဒမၞုံဂှ်လေဝ် ဟီုဂးလဝ်ရ။

သ္အာၚ်နူဂှ်ပၠန် သွက်သ္ဂောံသၠုၚ်ပ္တိုန် ပရေၚ်ဆက်စၠောံစမြိုၚ်သ္ဇိုၚ်၊ ညံၚ်တၚ်တၞဟ်ခြာ စပ်ကဵုကမၠောန်ကၟိတ်တံ ဂွံဍန်စှ်ေအာ၊ ပရေၚ်ပံၚ်ကောံ ပရေၚ်ပိုန်ဒြပ်တံကဵု သွက်ဂွံသၠုၚ်ပ္တိုန် ပရေၚ်သၠာဲဂတးကောန်မၞိဟ်ရေၚ်သ္ကအ်တံဂှ်တုဲ ဍုၚ်လာအိုဝ် ကြဵုဇာလဝ် ကမၠောန်မ္ဒးကဵုက္ဍိုပ်ဂမၠိုၚ်ရ။

အခိၚ်ဍုၚ်လာအိုဝ် ကေတ်အာတာလျိုၚ် နဒဒှ်ဥက္ကဌဒးအလန်အာဇြဳယာန်ဂှ် စၟတ်သမ္တီလိုဝ်ဂိုဝ် မရပ်စပ်အာဂှ် ဒှ်ဗီုပြၚ်ဗၞဳအဝန်တုဲ ဣဏံဝွံ သ္ပစၞးကဵု ဂၠးတိရောၚ် သ္ဂးရ။ သီုကဵုသ္ပစၞး ပရေၚ်ပံၚ်တောဲရေၚ်တၠုၚ် ကုအဖဝ်မိတ်တၞဟ်သ္အာၚ် လ္တူဂၠးတိဏံဂှ်ကဵု ပရေၚ်ဆက်ဆောံအာဇြဳယာန်တံရောၚ်ဂှ်လေဝ် ဂွံတီကေတ်ရ။

သ္အာၚ်နူဂှ်ပၠန် သာ်အရံၚ်မစကာလဝ် ပ္ဍဲလိုဝ်ဂိုဝ်ဂှ်ဝွံ သာ်တဆိပ် အလာံအာဇြဳယာန် သာ်ပ္ကဴခ္ဍောၚ်၊ သာ်ဗ္ကေတ်၊ သာ်ဍာ်မိတ်၊ သာ်ဗုဗု ပန်အရံၚ်နွံဏောၚ်ဂှ် ဂွံတီကေတ်ရ။

ဍုၚ်လာအိုဝ် မသ္ဂောံဒှ်ကၠုၚ် ဥက္ကဌအာဇြဳယာန် ပ္ဍဲသၞာံ ၂၀၂၄ ဂှ်ဝွံ ကောံဓရီုဝန်ဇၞော်ကာဍုၚ်သ္အာၚ်တံဂှ် ပ္ဍဲဂိတုဂျာန္နဝါရဳ ၂၈ ကဵု ၂၉ တံဂှ် ကၠောန်ဗဒှ်အာ ပ္ဍဲကဵုလောန်ဘရာဗာန်ဏောၚ်ဂှ် ဂွံတီကေတ် အတိုၚ်ပရိုၚ်တမ်ရိုဟ် ပရေၚ်ကလုတ်တမာန်တံရ။

Ref: Thai PBS World