ကအ်ကြိက်၊ နဝ်ဝေမ်ဗာ(၂၂)
ဟိုတ်နူလွဟ်ဇၞော်ဒပ်ကံၚ်ဇြဳပၞာန် ဒတုံစှ်ေပါ်ခတိုဟ်လဝ် ပ္ဍဲဗ္ဒာဲဘာလကျာ်မျိုအ်တဝ်ဥူ(မြို့တော်ဦး)၊ အရာပ် စၟတ်(၂)၊ ဍုၚ်ကအ်ကြိက်၊ တွဵုရးကရေၚ်တုဲ အပါနော်ကဵုကောန်စဴ ညး (၂)တၠ ဒးချိုတ်လဝ်တုဲ ဒးလဝ်ဘဲဝပ် (၂) တၠရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၀) အခိၚ်ဗ္တံ ၜိုတ် (၉) နာဍဳဂှ် နူဒပ်ကံၚ်ဇြဳပၞာန် ဖျေံသ္ဇိုၚ်ကအ်ကြိက် ဟိုတ်နူပန်ဖျေံလဝ်လွဟ် ဇၞော်အဆက်ဆက် ဟွံအောန်နူ (၆) မတုဲ ဒတုံစှ်ေပါ်ခတိုဟ်လဝ် ပ္ဍဲသ္ၚိဒၟံၚ် (၂)သ္ၚိ မၞုံအရာပ်လ္တူဍုၚ်ရ။
ဟိုတ်နူလွဟ်ဇၞော် ပြဟ်ဒတုံစှ်ေပါ်ခတိုဟ်လဝ်တုဲ ဥူထောန်ယေန် အယုက် (၇၀) သၞာံ (ကော်) ဥူကုလာ ကဵုကောန်စဴညး မောၚ်မေန်ခတအ်ညး (၂) တၠ ဒးလဝ်ဘဲဝပ်လွဟ်မကမ်တုဲ ဒးချိုတ်လဝ် ပ္ဍဲဒၞာဲဒှ်ပရေၚ်ပရောဂှ်ရ။
သ္အာၚ်နူဂှ်ပၠန် ကိုဝ်ခမိုဝ်ဥူ ညးမဒှ်ကောန်ညးကဵု မၞိဟ်ဗြဴ အယုက် (၅၀) သၞာံမွဲတၠဂှ် ဒးလဝ်ဘဲဝပ်ကဝေက်မကမ်တုဲ ကိုဝ်ခမိုဝ်ဥူဂှ် ဟိုတ်နူဒးလဝ်ဘဲဝပ်မကမ် လုပ်ဂွံပ္ဍဲဒဳပုၚ်တုဲ ဒးပလံၚ်ဗစိုပ်ဏာလဝ် ရုၚ်ဂဥုဲကအ်ကြိက်ရဂှ် ညးဒေသတအ် ဟီုလဝ်ရ။
ပ္ဍဲကဵုဂိတုနဝ်ဝေမ်ဗာ သတ္တာဟတုဲကၠုၚ်တေံလေဝ် ဟိုတ်နူလွဟ်ဇၞော်ဒတုံစှ်ေပါ်ခတိုဟ်လဝ် ပ္ဍဲအရာပ် စၟတ် (၁) ဍုၚ်ကအ်ကြိက်တုဲ တုဲ ဂကောံအိန်ထံၚ် (၅) တၠ ပါလုပ်သီုကောန်ၚာ် အယုက် (၃) သၞာံ မွဲတၠ ဒးလဝ်ဘဲဝပ်ရ။
ပ္ဍဲဍုၚ်ကအ်ကြိက်ဂှ် ပ္ဍဲမွဲကာလဒပ်ပၞာန်သီအဝဵုဏံ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက်ဆေၚ်မုက် က္တဵုဒှ်ဒၟံၚ် ခြာဟွံလအ်ဟွံလအ်တုဲ နူကဵုလ္ပာ်ကံၚ်ဇြဳပၞာန်လေဝ် ပန်ဖျေံဒၟံၚ်လွဟ်ဇၞော် အရိုဟ်ဒဒှ်တ္ၚဲရ။
မွဲကရောံကဵုပေါဲဗတိုက်တအ်ဂှ် ဟိုတ်နူလွဟ်ဇၞော်စှ်ေပါ်ခတိုဟ်လဝ်တုဲ ညးဒေသတအ် ထောံဍုၚ်တုဲ ဆုဲပြံၚ်မံၚ်တန်တဴဒၟံၚ် ပ္ဍဲဒေသတၞဟ်သ္အာၚ် ဒၞာဲဗၠးဘဲ ပါလုပ်သီုလ္တူဍုၚ်ဘာအၚ် တွဵုရးကရေၚ် နွံရ။
ဗော်သွးကောန်ဂကူကရေၚ် KNU လေဝ် နကဵုညးပါလုပ်ဒၟံၚ် ပ္ဍဲယန္တရာပရေၚ်အုပ်ဓုပ်ကံၚ်ဇြဳပၞာန် မၞုံပွိုၚ်ဍုၚ်ကအ်ကြိက်တအ်ဂှ် ပ္ဍဲပွိုၚ်မွဲသတ္တာဟ ညံၚ်ဂွံစ္ဍးတိတ်အာညးသ္ကအ် ဗွဲမပြဟ်ဂှ် လလောၚ်တြးလဝ် လိက်ကဵုသတိ အလန်လကြဴအိုတ် ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၁၇) ဂှ်ရ။
ပရိုၚ် – သြၚ်လောန်တိုၚ်မ်
ဗီု – SBM
sanlontai