သလေန် – နဝ်ဝေမ် (၂၂)
ဒပ်စဵုဒၞာညးဍုၚ်ကွာန် PDF တအ် သွက်ဂွံကၠုၚ်ဗတိုက် နွံဒၟံၚ်ဟီုဂှ် ဗက်ဗာန်ဒၟံၚ်လိက်တၞး ပ္ဍဲကဵုဘာဗ္တောန်လိက် ပွိုၚ်ဍုၚ်သလေန်ကဵု ပွိုၚ်ဍုၚ်ပွိဖျူ၊ ရးဒေသမဂွေတအ်ဂှ်တုဲ ဒပ်ပၞာန်ပ္ဍဲဒေသဂှ် တြးဒၟံၚ်ပရိုၚ် ဗၠေတ်မှာရဂှ် ညးဒေသတအ်ဟီုရ။
သ္ပတံနူဂိတုနဝ်ဝေမ်ဗာ စၟတ်တ္ၚဲ (၁၉) တုဲကၠုၚ်တေံ ဟိုတ်နူဗက်ဗာန်ဒၟံၚ်တၞးလိက် ပ္ဍဲကဵုဘာဗ္တောန်လိက်တအ်တုဲ ကောန်အရာပ်ညးဒေသတအ် ပရေၚ်ဒှ်ဓဝိၚ် နွံကၠုၚ်ဒၟံၚ်ရ။
ညးတာလျိုၚ်ပကဖမေန်ဗူမွဲတၠဂှ်မ္ဂး ဒပ်ပၞာန်ဒေသ ကၠောန်သ္ပဒၟံၚ် ဗီုလၟုဟ်ဏံဂှ် ဟိုတ်နူဟွံမိက်အာ ပ္ဍဲတွဵုရးသေမ်သၟဝ်ကျာ ပေါဲဗတိုက်သ္ကာတ်မြဟ်ဒၟံၚ်တေံတုဲ ကၠောန်သ္ပဒၟံၚ်ရဂှ် သ္ၚဳဂၠိပ်လဝ်ရ။
“ပၟိက်ဍေံတအ်ဂှ်တှ်ေ ဟိုတ်နူဟွံမိက်အာ ဒေသဂကောံကောဒေံပိဂကောံ ဒှ်ဒၟံၚ်ပေါဲဗတိုက်လၟုဟ်ဂှ်တုဲ ကၠောန်သ္ပဒၟံၚ် ဗီုဏံရ။ ပ္ဍဲကဵုပယျဵုသလေန် ပွိဖျူဏံလေဝ် နကဵုဍေံတအ် ပရေၚ်ချဳဒရာၚ်ပၞာန်တၟေၚ်ဟီုတုဲ ကၠောန်ကၠုၚ်ဏောၚ် ဂွံတီလဝ်ရ” ဂှ် ညးတာလျိုၚ်ပကဖမေန်ဗူမွဲတၠဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
သ္အာၚ်နူဂှ်ပၠန် ပ္ဍဲကဵုပွိုၚ်ဍုၚ်ပွိဖျူကဵု ပွိုၚ်ဍုၚ်သလေန်တအ်ဂှ်လေဝ် ဒပ်ကံၚ်ဇြဳပၞာန်တအ် ဗျာံလဝ်လွဟ် လ္ပာ်ဂၠံၚ်ဇၞော်တုဲ ဟိုတ်နူမၚ်ဒၟံၚ်ကၚ်နွံဒၟံၚ်တုဲ ညးဒေသတအ် ဒးဒှ်ဒၟံၚ်ဓဝိၚ်ရဂှ် ဂွံတီကေတ်ရ။
ညးဒေပွိဖျူမွဲတၠဂှ်မ္ဂး အတိုၚ်အကာဲအရာပြဟ်ဟ်ဏံ ဒးဒေါံဇူလဝ်သွံဖျာတုဲ ကောန်ၚာ်တအ်ဂှ်လေဝ် ဒးဆေၚ်ဒၟံၚ်မုက်ကဵု အကာဲအရာဟွံဂံၚ်ပလံၚ်ဏာဘာရဂှ် ဟီုလဝ်ရ။
“နူတ္ၚဲကၠာတေံလေဝ် ကၠုၚ်ဗတိုက်လ္တူဍုၚ်ဏောၚ် ဒၟာနူဂကောံအိန်ထံၚ်ကၠုၚ်ဟီုတုဲ ဟွံဂွံအာသွံဖျာ လ္တူဍုၚ်ပုဟ်။ လၟုဟ်လေဝ် ဗက်ဗာန်ဒၟံၚ်တၞးလိက်ဟီုတှ်ေ ဟွံပလံၚ်ဏာ ကောန်ၚာ်တအ်ဘာတုဲ စွံလဝ်အတိုၚ်ဂှ်ရ။ မုဒှ်ဂွံသ္ပဗီုဏံရော ဟွံတီပုဟ်” ဂှ် ဟီုလဝ်ရ။
အခိၚ်လၟုဟ်ဏံ ကောန်ဒပ်ကံၚ်ဇြဳပၞာန်တအ်ဂှ် ကၠောန်ရေၚ်တၠုၚ်ဒၟံၚ် ပရေၚ်စၟဳစၟတ်ညးဍုၚ်ကွာန် ပါလုပ်သီုညးအာတရဴတအ် ဆက်ဆက် ပ္တဝ်လဝ်ကဵုသၟတ်တအ်တုဲ ဟိုတ်နူဂၠိုက်ဂၠာဲဒၟံၚ်ဂှ်ရ ညးဒေသတအ် ဒးဆဵုဂဗဒၟံၚ်ကဵုတၚ်ခက်ခုဲရဂှ် ဂွံတီကေတ်ရ။
ပ္ဍဲကဵုတုဲကၠုၚ် မွဲၜါတ္ၚဲတေံဂှ်လေဝ် ပ္ဍဲကဵုဒၞာဲဆက်စပ်ဒၟံၚ်ကဵု ပယျဵုတွဵုရးရခေၚ်တအ်ဂှ် နကဵုတၚ်ထ္ၜးဟိုတ် ပရေၚ်ဂီုကၠီု ကၟာတ်တာဒၞာဒၟံၚ်နွံတုဲ ဖျေံလဝ်ဒပ်ကၚ်လေဝ် နွံရဂှ် ညးဒေသတအ် ဟီုလဝ်ရ။
ပရိုၚ် – သြၚ်လောန်တိုၚ်မ်
ဗီု – Social Media
sanlontai