မတူပဳ – နဝ်ဝေမ်ဗ (၂၂)
ဟိုတ်နူဒပ်ကံၚ်ဇြဳပၞာန် ဂြာတ်ထောံဖျေံဗုမ်ကဵုက္ၜၚ်ကျာတုဲ ညးဍုၚ်ကွာန်တအ် ပါလုပ်သီုကောန်ၚာ် ဟိုတ်နူဒးအိုတ်လမျီု ဂၠိုၚ်ကၠုၚ်တုဲ ထပ်သၠုၚ်ပ္တိုန်အာ အသိၚ်ပၞာန်ရောၚ်ဂှ် Chinland Defense Force -Matupi လလောၚ်တြးပ္တိတ်လဝ် ပရိုၚ်ရ။
နကဵုဒပ်ပၞာန်စဵုဒၞာချေၚ်လေဝ်န် မတူပဳ ထပ်သၠုၚ်ပ္တိုန်အာ အသိၚ်ပၞာန်တုဲ စဵုကဵုသၞောတ်တၠအဝဵုပၞာန် ခရိုဟ်လီုအိုတ်အာ လုပ်အာပေါဲဗတိုက်ရောၚ်ဂှ် ကဵုလဝ်သမ္တီရ။
ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၅) တုဲကၠုၚ်တေံ အခိၚ်ဇိုၚ်သဝ်တ္ၚဲဂှ် ဟိုတ်နူက္ၜၚ်ကျာဂျေတ်ဖိုက်တာ ကံၚ်ဇြဳပၞာန် (၂) ဖ္ဍိုက် ပ္တဝ်လဝ်ကဵုညးဍုၚ်ကွာန် ဗတိုက်ပန်လဝ် ပ္ဍဲကွာန်ဝေလူ ပွိုၚ်ဍုၚ်မတူပဳတုဲ ကောန်ၚာ် (၈) တၠ၊ အ္စာဘာ CDM (၁) တၠ၊ ညးဍုၚ်ကွာန် (၂) တၠ အပံၚ်လၟိဟ် (၁၁) တၠ ဒးလဝ်ဘဲဝပ်ရဂှ် ဂွံတီကေတ်ရ။
သ္အာၚ်နူဂှ်ပၠန် ကောန်အရာပ် (၄) တၠ ဒးလဝ်ဘဲဝပ်တုဲ ပါလုပ်သီုသ္ၚိဒၟံၚ် ၂၂ မ၊ ဘာကျာ် (၁) ဘာ ကေုာံ ဘာဗ္တောန်လိက် (၂) ဘာ ဇီုကပိုက်ဒးလီုလာ်လဝ်ရဂှ် ဓမံက်လဝ် ပ္ဍဲတၚ်လလောၚ်တြးရ။
ကွာန်ဝေလူ ဒးဒုၚ်ဂြာတ်ထောံဖျေံလဝ်ဗုမ်ဂှ်ရ သ္ၚောဲခြာနူဒၞာဲဒပ်ကံၚ်ဇြဳပၞာန်ဖျေံလဝ်ဗဒိုပ် ခရာ ၃၅ မိုၚ်တုဲ လၟိဟ်သ္ၚိ နွံ ၆၀ လ္ပာ်လ္တူတုဲ ဒှ်ကွာန်ညးဍုၚ်ကွာန်တအ် မံၚ်ဒၟံၚ်ၜိုဟ်ဟ်သြိုဟ်ဟ်ရဂှ် ကဵုလဝ်သမ္တီရ။
CDF-Matupi ဂှ် ပ္ဍဲကဵုကွာန်ဂှ် ဒှ်ဒၞာဲဖျေံလဝ်သ္ဇိုၚ်ကဵု ဒၞာဲချဳဒရာၚ်ပရေၚ်ပၞာန်ဟၟဲတုဲ စပ်ကဵုကံၚ်ဇြဳပၞာန် ဂြာတ်ထောံဖျေံလဝ်ဗုမ် ဗီုလၟုဟ်ဏံဂှ် ဒစဵုဒစးလဝ်ရ။
ပ္ဍဲကၟိန်ဍုၚ်ဗၟာ ကြဴနူဒပ်ကံၚ်ဇြဳပၞာန် သီကေတ်အဝဵုတုဲ သ္ကုတ်လကြဴဏံ တွဵုရးချေၚ်ဂှ် ဒှ်ဒၞာဲပၠန်ဂတးရပ်လွဟ် ဇြဟတ်ခိုဟ်ဒၟံၚ်တုဲ ဟိုတ်နူလွဟ်ဇၞော်၊ က္ၜၚ်ကျာ ကေုာံ ကံၚ်ဇြဳပၞာန် ထ္ပက်ပၞာန် ပ္ဍဲဗလးမုက်တိတုဲ ကောန်အရာပ် ၁၀၀ တၠ ပြၚ်ဒးချိုတ်လဝ်ရဂှ် ဓမံက်ထ္ၜးလဝ် ပ္ဍဲ AAPP ရ။
ပရိုၚ် – သြၚ်လောန်တိုၚ်မ်
ဗီု – CDF Matupi
sanlontai