ပ္ဍဲဍုၚ်ဏာမ်သာန် ဟိုတ်နူကံၚ်ဇြဳပၞာန် ပန်ဖျေံလွဟ်ဇၞော်တုဲ ကောန်ၚာ် (၁) တၠ ဒးချိုတ်၊ ဒးလဝ်ဘဲဝပ် (၄) တၠ

ဏာမ်သာန်၊ နဝ်ဝေမ်ဗာ (၂၂)

တွဵုရးတအာၚ်၊ ဒေသပၞာန် ဒပ်မဟာ (၂)၊ နူကဵုဒပ်ကံၚ်ဇြဳပၞာန်ဍုၚ်ဏာမ်သာန် ဟိုတ်နူပရေၚ်ပန်ဖျေံလွဟ်ဇၞော်တုဲ ကောန်ၚာ် (၁)တၠ ဒးချိုတ်တုဲ ဒးလဝ်ဘဲဝပ် (၄) တၠရဂှ် TNLA လလောၚ်တြးလဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၁)ဂှ်ရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၀) အခိၚ်ဗ္တံ ၜိုတ် (၁၂) နာဍဳဂှ် နူဒပ်ကံၚ်ဇြဳပၞာန်ဍုၚ်ဏာမ်သာန် သီုပေါဲဗတိုက်ဟၟဲမွဲသာ် ဟိုတ်နူပန်ဖျေံလဝ်လွဟ်ဇၞော်တုဲ ပါဲနူကဵုကောန်ၚာ် နူကွာန်အုမ်သောန် (၁) တၠ ဒးချိုတ်လဝ်တုဲ ကောန်အရာပ် (၄) တၠ ဒးလဝ်ဘဲဝပ်ရဂှ် ဓမံက်လဝ် ပ္ဍဲတၚ်လလောၚ်တြးရ။

ဟိုတ်နူလွဟ်ဇၞော်ဒတုံစှ်ေပါ်ခတိုအ်လဝ်တုဲ ပါဲနူမလွေမျသန္တာလေန် အယုက် (၁၄) သၞာံ နူကွာန်အုမ်သောန် ဒးလွဟ်မကမ် ဒးချိုတ်လဝ်တုဲ လွေမဝ်မဝ်သာန် အယုက် (၁၄)သၞာံ၊ မိုၚ်ယျေဝ်လေန်နောၚ် အယုက် (၁၈)သၞာံ၊ ယာမျညောအ် အယုက် (၄၈)သၞာံ ကေုာံ တာထောန်လှ အယုက် (၅၀)သၞာံတအ် ဒးလဝ်ဘဲဝပ်ညးသ္ကအ်ရဂှ် ဓမံက်လဝ် ပ္ဍဲတၚ်လလောၚ်တြးရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၉) တုဲကၠုၚ်တေံ အခိၚ်ဒေါဝ်တ္ၚဲဂှ်လေဝ် နူကဵုဒပ်ကံၚ်ဇြဳပၞာန် ဗဒိုပ်ဍုၚ်ဏာမ်သာန်၊ ဗဒိုပ်မိုၚ်ၚအ်ကဵု ဗဒိုပ်ဍုၚ်ကျောက်မေဝ်တအ် ပန်ဖျေံဗတိုက်လဝ်ကဵုလွဟ်ဇၞော် ပ္ဍဲကဵုကွာန်မျိုအ်တေတ် ဟွံအောန်နူ (၃၂) ဝါဏီရ။

ဒၞာဲပန်ဖျေံဗတိုက်လဝ်လွဟ်ဇၞော်တအ်ဂှ် ဒှ်ဒၞာဲပရေၚ်ချဳဒရာၚ်ပၞာန် သီုပေါဲဗတိုက်မမိက်ကဵုမွဲမွဲ ဟၟဲမွဲသာ်တုဲ နူဒပ်ကံၚ်ဇြဳပၞာန် ပန်ပှော်ဗတိုက်လဝ်ကဵုလွဟ်ဇၞော် လ္တူကောန်အရာပ်ညးဍုၚ်ကွာန် မၞုံကွာန်ဏာမ်သာန်တအ် သီုရန်တၟံနွံနွံရဂှ် TNLA လလောၚ်တြးလဝ်ရ။

ပရိုၚ် – သြၚ်လောန်တိုၚ်မ်

ဗီု -TNLA