ကျာ်မြဟ်၊ နဝ်ဝေမ်ဗာ ၂၂
ပ္ဍဲတွဵုရးဍုၚ်မန်၊ ပွိုၚ်ဍုၚ်ကျာ်မြဟ်ဂှ် ကြဴနူပေါဲဗ္တိုက်ၜါလ္ပာ်တံ သ္ကာတ်မြဟ်လဝ်တုဲဂှ် ၂၀ ကွာန်ပြၚ် လာၚ်အေန်တာနိတ်ပိုတ်ဒၟံၚ်တုဲ ပ္ဍဲကဵုကွာန်လ္ၚဵုတံဂှ် ပိုတ်ဒၟံၚ်သီုကဵုလာၚ်ဖုၚ်တံဏောၚ်ဂှ် ဂွံတီကေတ် အတိုၚ်ဂလာန်ညးဒေသတံရ။
စနူဂိတုနဝ်ဝေမ်ဗာ ၁၀ တုဲကၠုၚ်တေံတုဲ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ပ္ဍဲကဵုဒေသၜါသွာၚ် ပွိုၚ်ဍုၚ်ကျာ်မြဟ်ဂှ် ပေါဲဗ္တိုက်တံ သ္ကာတ်မြဟ်လဝ်တုဲ ညးဒေသဂၠိုၚ်ကဵုလ္ၚီ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရ။
အခိၚ်လၟုဟ်ဂှ် ဟိုတ်နူပေါဲဗ္တိုက်ၜါလ္ပာ် ကလေၚ်ညိၚ်ဝတ်ကၠုၚ် ညိညကီုလေဝ် မ္ၚးနူကဵုလာၚ်မိုဝ်ဗိုၚ်အေန်တာနိတ်တံဂှ် ပိုတ်ဒၟံၚ် သီုကဵုလာၚ်ဝိုၚ်ဖိုၚ်အေန်တာနိတ်ရ။
ဒဒှ်မအေန်တာနိတ်ပိုတ်ဒၟံၚ်ဂှ် ဟွံအောန်နူကဵု ၂၀ ကွာန် ပါလုပ်သီုကဵုၜါသွာၚ်၊ မေဝ်ကရိုဝ်၊ ကျံက်ကွေဝ်၊ မယာန်ကုန်၊ တၟံဗြဴ၊ ကၞာလဵု၊ (ဖာသိမ်) ၊ ကအ်သက်တံဂှ် ဒးဂဗဒၟံၚ်ရ။
အတိုၚ်ဂလာန် ညးဒေသ ၅ တၠဂှ်မ္ဂး လာၚ်အေန်တာနိတ်ပိုတ်ဂှ်ဝွံ ပေါဲဗ္တိုက်ဒှ်တုဲ ဂွံမွဲသတ္တာဟဂှ် စက္တဵုဒှ်လဝ်တုဲ ပ္ဍဲဂိတုနဝ်ဝေမ်ဗာ ၂၁ ဏံဂှ် ပိုတ်အာလဝ်ဖအိုတ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အတိုၚ်သြၚ်လောန်တိုၚ်(မ်) ဂၠိုက်ဂၠါဲသၟာန်သၟုက်ဂှ်မ္ဂး လာၚ်အေန်တာနိတ်ပိုတ်ဂှ်ဝွံ သွက်ဂွံအာစုတ်ကၠေၚ် ပ္ဍဲကဵုတိုၚ်တာဝါပရေၚ်ဆက်စၠောံ မၞုံအပ္ဍဲပွိုၚ်ဍုၚ်ကျာ်မြဟ်တံဂှ် ဒးဒုၚ်ကၟာတ်လဝ်အခေါၚ်အာကၠုၚ်ဂှ်ကီု၊ လ္ပာ်ကံၚ်ဇြဳပၞာန် ကဵုပရေၚ်ဂီုကၠီုဟွံမာန်တံဂှ်တုဲ ဆက်စပ်ဒၟံၚ်အဓိကရောၚ်ဂှ် ဂွံတီကေတ်ရ။
သ္အာၚ်နူဂှ်ပၠန် ဟိုတ်နူဒဒန်ၜါသွာၚ် ဒးဒုၚ်ဖံက်ဗ္တိုဟ်လဝ်မာၚ်ဂှ်ရ လာၚ်ဖုၚ် MPT ဒပ်ပၞာန်မထိၚ်ဒက်လဝ်ဂှ်ကဵု လာၚ်အေန်တာနိတ်တံလေဝ် ပိုတ်အာလဝ်ကီုရ။
ပ္ဍဲကဵုပွိုၚ်ဍုၚ်ကျာ်မြဟ်ဂှ် ကမၠောန်ပရေၚ်ဆက်စၠောံထလဳကောန်ဂမၠိုၚ် အက်တာမ်၊ မိုၚ်တေဝ်၊ အဝ်ရဳတူ ကေုာံ MPT တံ နွံဒၟံၚ်တုဲ ပ္ဍဲကဵုကွာန် ဒၞါဲပေါဲဗ္တိုက်က္တဵုဒှ်တံကဵု ကွာန်မဆက်ဒၟံၚ်တံဂှ် အေန်တာနိတ်ပိုတ်အာလဝ်ဟဂှ်ရ။
ပ္ဍဲကဵုဒေသၜါသွာၚ်ဂှ် ပရေၚ်ပၞာန် အကြာဂကောံဇြဟတ်ပၠန်ဂတးတံကဵု ဒပ်ကံၚ်ဇြဳပၞာန်တံၜါလ္ပာ် ဆက်ကြံၚ်မ္ၚိုဟ်ဒၟံၚ်ဂှ်ရ ဒပ်အမၠံက်ကံၚ်ဇြဳပၞာန် ဖျေံသ္ဇိုၚ်မုဟ်ဍုၚ်ဂှ်လေဝ် ပန်ပှော်ဒၟံၚ်လွဟ်ဇၞော် သီုဗ္တံသီုတ္ၚဲရ။
ဟိုတ်နူပေါဲဗ္တိုက်တုဲ ညးဒေသကျာ်မြဟ် ၄၀၀၀ ပြၚ်ဝွံ ဒးဂြိပ်ဒဴဒၟံၚ် ဒၞါဲဗၠးဘဲတံဂှ်တုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် ဂွံတီကေတ် ဇရေၚ်ညးမရီုဗၚ်ကဵုဒၟံၚ်ပရေၚ်ပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai