ပ္ဍဲကျာ်ထဝ် ဟိုတ်နူဘဲလွဟ်ဇၞော်တုဲ ညးဒေသ ၃၀၀၀ ပြၚ် ဒးပါဲဒလေတ်ဒၟံၚ်

ကျာ်ထဝ်၊ နဝ်ဝေမ်ဗာ ၂၂

ဒပ်ကံၚ်ဇြဳပၞာန် ဟိုတ်နူပန်ပှော်ဒၟံၚ် လွဟ်ဇၞော် အပ္ဍဲပွိုၚ်ဍုၚ်ကျာ်ထဝ်၊ တွဵုရးဍုၚ်မန် အရိုဟ်ဒဒှ်တ္ၚဲဂှ်ရ ညးဒေသ ၃၀၀၀ ပြၚ် နူကဵုကွာန် ၇ ကွာန် ဒးဂြိပ်ဒဴပါဲဒလေတ်ဒၟံၚ်ရောၚ် ပ္ဍဲဂိတုနဝ်ဝေမ်ဗာ ၂၁ တေံ ခရိုၚ်သဓီု KNU လလောၚ်ပ္တိတ်လဝ်ရ။

စနူဂိတုနဝ်ဝေမ်ဗာ ၁၀ တုဲကၠုၚ်တေံတုဲ နူကဵုဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲပွိုၚ်ဍုၚ်ကျာ်ထဝ် တွဵုရးဍုၚ်မန် ကေုာံ ပ္ဍဲပွိုၚ်ဍုၚ်ယှိုဲကျေန် ရးဗဂေါဂှ် ပန်ပှော်ဒၟံၚ်လွဟ်ဇၞော် အပ္ဍဲကွာန် ညးဍုၚ်ကွာန်ကောန်အရာပ်ဂမၠိုၚ် မသ္ပဒတဴဒၟံၚ်ဂှ် အရိုဟ်ဒဒှ်တ္ၚဲရောၚ် ဂွံတီကေတ် အတိုၚ်တၚ်လလောၚ်တြးဂှ်ရ။

ဟိုတ်နူပရေၚ်ပန်ပှော်လွဟ်ဇၞော်ဂှ်တုဲ ညးဒေသ ၃၀၀၀ ပြၚ် နူကဵုဒေသ ဂကောံကွာန်ပျေန်ကတိုဝ်ကုန်၊ ဇြဳပျံၚ်၊ ဝေန်ကာန်၊ ဝေန်ကဠဝ်၊ အာဠူ၊ ငှက်ပျဝ်တဝ် ကေုာံ ဂကောံကွာန်ကျံက်ဖျာတံဝွံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရ။

အပ္ဍဲပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်ဂှ် ဂၠဴ ညးဒေသ ဥူနဝ်တူမလွဳလဝ်မွဲ ချိုတ်အာလဝ်တုဲ ပိ ဒးအာလဝ်ဝပ်ဇီုကပိုက်ဒးလဝ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ခရိုၚ်သဓီု ဗော်သွးကောန်ဂကူကရေၚ် KNU ရ။

အပ္ဍဲကာလသီအဝဵုဏံ ဟိုတ်နူပရေၚ်ပန်ပှော်လွဟ်ဇၞော် ဒပ်ပၞာန် အပ္ဍဲကွာန် ညးဍုၚ်ကွာန်ကောန်အရာပ် မၞုံပွိုၚ်ဍုၚ်ကျာ်ထဝ်တံကဵု အပ္ဍဲဒၞါဲကမၠောန်တံဂှ်တုဲ ညးဒေသတံ ဇီုကပိုက်ချိုတ်၊ သ္ၚိဒၟံၚ်လီုလာ်တံ က္တဵုဒှ်ဒၟံၚ် မွဲဏှမွဲဏှရောၚ်ဂှ် ညးဒေသတံ ဟီုရ။

ပ္ဍဲပွိုၚ်ဍုၚ်ကျာ်ထဝ်ဂှ် ဒပ်ကံၚ်ဇြဳပၞာန်ဝွံ ဂွိၚ်ဖေက် ဂကောံဇြဟတ်ပၠန်ဂတးတံ ကၠုၚ်စိုပ်ဗ္တိုက်ဂှ်ရ ကြပ်အရိုဟ်ဗ္တံ ပန်ပှော်ဒၟံၚ် လွဟ်ဇၞော် ဟွံအောန်နူကဵု ၂၀ မဂှ် နွံဒၟံၚ်ရ။

သ္အာၚ်နူဂှ်ပၠန် ဒပ်ကံၚ်ဇြဳပၞာန်ဝွံ ညံၚ်ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ ကၠုၚ်စိုပ်ဗ္တိုက် ဇရေၚ်ဗ္ဒိုပ်ဒပ်ဍေံတံ ဟွံဂွံဂှ် ပွမထပိုတ်ထောံဂၠံၚ် မဆက်လဝ်ကွာန်မွဲကုမွဲတံဂှ်ကဵု ပလေဝ်ပလေတ်ဒၟံၚ် သွက်ပၞာန်ဒုၚ်တံ နွံဒၟံၚ်ဂှ် ဂွံတီကေတ် နူကဵုပရိုၚ်တမ်ရိုဟ်ဗလးတိတံရ။

ပရိုၚ်−သြၚ်လောန်တိုၚ်(မ်)

ဗီု−KNU