သ္ကိုပ်ဝန်ဇၞော်သေံ ကဵုအမိၚ် သွက်ဂွံလၞိန်ဗပိန် ပွမပၠောပ်ပ္တိုန် ဖျုန်ကၠိက်ဂံက်က် ဟွံလုပ်သၞောဝ်တံ

ၜၚ်ကံက်၊ နဝ်ဝေမ်ဗာ ၂၂

ကိစ္စမပၠောပ်ပ္တိုန်ဒၟံၚ် ဖျုန်ကၠိက်ဂံက်က် ဟွံလုပ်သၞောဝ် အပ္ဍဲဍုၚ်သေံတံ ဂွံအိုတ်အးအာဂှ် သ္ကိုပ်ဝန်ဇၞော်သေံ ကဵုလဝ်အမိၚ် ကုအေဂျေန်ဇြဳ အလဵုအသဳမဆေၚ်စပ်တံရ။

ပ္ဍဲအရာဖအိုတ်ကၠေံသာ်ဏံဂှ် စၞးနူရပ်ဒက် ရဲသွံအဇာဍောတ်တံဂှ် သွက်ဂွံစွံအာရီု ကုဒေၚ်ဇၞော်ဇၞော်တံဂှ် သ္ကိုပ်ဝန်ဇၞော်သေံ သရဳထာတာဗဳဇြေန် ကဵုက္ဍိုပ်ဟီုဂးလဝ်ရ။

ဌာနက္ဍိုက်ပ် ပရေၚ်တဵုလွဳ မၞုံသၟဝ်ဌာနဝန်ဇၞော် ပရေၚ်တဵုလွဳ၊ ကမၠောန်တမ္ၚာ ကေုာံ ပရေၚ်လွဳတိရစ္ဆာန်တံဂှ်ဝွံ သွက်ကိစ္စပၠောပ်ပ္တိုန်ဖျုန်ကၠိက်ဟွံလုပ်သၞောဝ်ဂှ် ကေတ်တာလျိုၚ်တိုက်ရိုက်တုဲ ပ္ဍဲအရာရေၚ်တၠုၚ်ကမၠောန်တံဂှ် ဟိုတ်နူအရာမတေၚ်ဂြတ်တံဟွံမွဲဂှ်ရ ဒးဒုၚ်ပါ်ပါဲဒၟံၚ်ရ။

ဗွဲတၟေၚ် အပ္ဍဲသၞာံဏံမံက် အခိၚ်ၚုဟ်ဖျုန်ကၠိက်အပ္ဍဲဍုၚ် သၠုၚ်တိုန်ကၠုၚ်ဂှ် ဗွဝ်ဖျာဖျုန်ကၠိက်ဒမၠုက်တံ မံက်တိတ်ကၠုၚ်လဝ်ရ။

သ္ကိုပ်ဝန်ဇၞော်သေံဂှ် နကဵုသၟိၚ်တၠအဝဵုဂမၠိုၚ် ယဝ်ရရေၚ်တၠုၚ်ကေတ်အရေဝ် အတိုၚ်သၞောဝ် ဗွဲမပြဟ်ဟွံမာန်မ္ဂး ဒေၚ်မပၠောပ်ဒၟံၚ် ဖျုန်ကၠိက်အဓိကတံ ညံၚ်ဟွံဂွံသီကေတ်ပိုန်ဒြပ်ညးတံမာန်ဂှ် ဂွိၚ်ဖေက်ပၞုက်ထောံဂှ်လေဝ် ဟီုဂးလဝ်ရ။

ဟိုတ်နူခရိတ်အိုတ်သၠုၚ်တိုန်ကၠုၚ်တုဲ သွက်ဂွံရီုဗၚ် ကုရဲလွဳကၠိက် အဇာဒေါဝ်ကဵု အဇာဍောတ် မ္ဒးကၟာတ်လဝ် ကမၠောန်တံမာန်ဂှ် ဒုဝန်ဇၞော်ပရေၚ်ဘဏ္ဍာ ရေၚ်တၠုၚ်ကဵုဒၟံၚ်ရောၚ်ဂှ်လေဝ် သ္ကိုပ်ဝန်ဇၞော် ဟီုဂးလဝ်ရ။

နကဵုသၟိၚ်တၠအဝဵုအကံက်ခေါန်သေံတံ သီဂွံလဝ် ကောန်တိန်နာ ၁၆၁ မ မစုတ်နၚ်ဖျုန်ကၠိက် သ္ဂောံပၠောပ်ပ္တိုန် ဗွဲမလုပ်သၞောဝ်ဟွံသေၚ် ပ္ဍဲကဵုခရိုၚ်ချောန်ဘူရဳ၊ သၞေဟ်က္ၜၚ်လာန်ချၜါန်ဂှ်တုဲ စောဲစပ်လဝ်ဂဗုတ် ကုညးကေၚ်ကာ နူကဵု ၅ ကမ္ပဏဳ မဒးဒုၚ်စောဲစပ်လဝ် ပါလုပ်ဆက်စပ်ဒၟံၚ် ပ္ဍဲကဵုပရေၚ်ပၠောပ်ပ္တိုန်ဗၞိက်ဟွံလုပ်သၞောဝ်တံဂှ်လေဝ် ဂွံတီကေတ်ရ။

ကမ္ပဏဳသွံရာန်ဗၞိက်တၞဟ်ဟ် ၃ ပၠန် မဒးဒုၚ်စောတ်စောဲလဝ် ဒဒှ်ရရေၚ်တၠုၚ်လဝ်လၟေၚ်ကမၠောန် ပရေၚ်ပလံၚ်ဗစိုပ် သ္ဂောံသွံရာန်ဗၞိက် ဖျုန်ကၠိက်ဂံက်က် အပ္ဍဲကဵုဍုၚ်သေံ ဟွံလုပ်ကဵုသၞောဝ်ဂှ် ကၠောန်သ္ပလဝ် ပရေၚ်စၟဳတ်စဳရေၚ်သၞောဝ်ဓဝ်တံရောၚ်ဂှ် ဂွံတီကေတ်ရ။

Ref: Thai PBS World