ညးယိုက်ဝန်တက္ကသိုလ်မတ်မလီုတအ် ဒးဒုၚ်ကၟာတ်လဒဵုလဝ် အခေါၚ်ဆုဲပြံၚ်မံၚ်မ္ၚးဘာ

မတ်မလီု၊ နဝ်ဝေမ်ဗာ(၂၃)

ကြဴနူတက္ကသိုလ်လွိုၚ်ကဝ်ဒးဒုၚ်ဗတိုက်သီကေတ်တုဲဂှ် ညးယိုက်ဝန်တအ် ပါလုပ်သီု အ္စာအ္စာၝောံ Non CDM မၞုံတက္ကသိုလ်မတ်မလီု ဆုဲပြံၚ်မံၚ်တန်တဴဒၟံၚ်မ္ၚးဘာတအ်ဂှ် ဒးကၟာတ်တာဒၞာလဝ် အခေါၚ်ဆုဲပြံၚ်မံၚ်တန်တဴရဂှ် သြၚ်လောန်တိုၚ်မ် လ္ၚတ်ဂၠိုက်ဂၠာဲဂွံတီကေတ်ရ။

ညးယိုက်ဝန် Non CDM မၞုံတက္ကသိုလ်မတ်မလီုတအ်ဂှ် ကြဴနူဂကောံဇြဟတ်ပၠန်ဂတးတအ် ဗတိုက်သီကေတ်လဝ် တက္ကသိုလ်လွိုၚ်ကဝ် ဒၞာဲဒပ်ကံၚ်ဇြဳပၞာန်ဖျေံလဝ်ဗဒိုပ်တုဲဂှ် ဟိုတ်နူစိုတ်ဒှ်ဓဝိၚ်တုဲ ဆုဲပြံၚ်မံၚ်ကၠုၚ် ပ္ဍဲသ္ၚိမသ ကလောကောဒေံကြပ်ညောန်တအ်ကဵု ပ္ဍဲအရာပ်မ္ၚးတအ်ရ။

ဟိုတ်နူပရေၚ်ဆုဲပြံၚ်မံၚ်မ္ၚးဘာ ဂၠိုၚ်တိုန်ကၠုၚ်တုဲ ပါမောက္ခကံၚ်ဇြဳပၞာန်ခါန်ကၞက် ကော်လဝ်ကောံဓရီု ပ္ဍဲဂိတုနဝ်ဝေမ်ဗာစၟတ်တ္ၚဲ (၁၇) ဂှ် မွဲတန်တုဲ ကၟာတ်တာဒၞာလဝ်အခေါၚ်ဆုဲပြံၚ်မံၚ်မ္ၚးဘာရ။

ပ္ဍဲကဵုကောံဓရီုဂှ် နကဵုညးယိုက်ဝန်တအ် သွက်ဂွံက္လေၚ်မံၚ်ပ္ဍဲဘာညးသ္ကအ်ကီု၊ ညံၚ်ပရိုၚ်ပ္ဍဲဘာ ဟွံဂွံပြးတိတ်အာလ္ပာ်မ္ၚး ဒးသ္ပသတိကီု ယဝ်ရ PDF တအ် လုပ်ကၠုၚ်ဗတိုက်မ္ဂး ညံၚ်ဟွံဂွံဇီုကပိုက်ဒး သွက်ဂွံပလေဝ်ပလေတ်လဝ်ညးသ္ကအ်ကီုဂှ် စၞောန်ပ္ညုၚ်လဝ်ရ။

ပ္ဍဲကဵုတကက္ကသိုလ်ဂှ် ယဝ်ပေါဲဗတိုက်ဒှ်ကၠုၚ်မ္ဂး သွက်ဂွံဆုဲပြံၚ် ပ္ဍဲဒၞာဲဗၠးဘဲ ဗွဲမဂတာပ်အခိၚ်ဂှ် စကာကဵုပလေဝ်ပလေတ်လဝ် ဂၠံၚ်လုပ်တိတ်တအ်တုဲ ယဝ်ရဂၠံၚ်ကၟာတ်ဂွံအာလေဝ် သွက်ဂွံမံၚ်ဒၟံၚ်ကောံကောံကလောံကလောံ စၞောန်ပ္ညုၚ်လဝ်ရဂှ် ဂွံတီကေတ် အတိုၚ်လဟီု ညးယိုက်ဝန် Non CDM ဟွံမိက်ဓမံက်ထ္ၜးယၟုမွဲတၠဂှ်ရ။

အခိၚ်လၟုဟ်ဏံ ပ္ဍဲတက္ကသိုလ်မတ်မလီု ညးယိုက်ဝန် Non CDM တအ်ဂှ် ပလေဝ်ပလေတ်ကၠုၚ် သ္ပတံနူဂၠံၚ်လုပ်တိတ်တအ်ကဵု ဒၞာဲအောပ်ဗ္ဒမာန်တအ်တုဲ ပရေၚ်မၞိဟ်မ္ၚး လုပ်တိတ်နွံဟၟဲ မၚ်ရံၚ်ဒၟံၚ်ရဂှ် ဟီုလဝ်ရ။

ပ္ဍဲတက္ကသိုလ်မတ်မလီုဂှ် ပါဲနူညးယိုက်ဝန် Non CDM တအ်တုဲ ဂကောံသ္ၚိကၟိန်မံၚ်မွဲကရောံ နွံဒၟံၚ်ဂၠိုၚ်ကဵုကၠံတုဲ ဗွဲမဂၠိုၚ်ဂှ် မံၚ်ဒၟံၚ်ပ္ဍဲဗွိုၚ်တက္ကသိုလ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်မ်

ဗီု -CJ