ရေး၊ နိုဝင်ဘာ (၂၃)
ဟိုတ်နူပရိုၚ်ဂကောံဇြဟတ်ပၠန်ဂတးတအ် ချဳဒရာၚ်ပေါဲဗတိုက်သီဍုၚ် ပ္ဍဲဍုၚ်ရေဝ် တွဵုရးဍုၚ်မန်တုဲ နူလ္ပာ်ကံၚ်ဇြဳပၞာန် ပလေဝ်ပလေတ်ဒၟံၚ် သွက်ပၞာန်ဒုၚ်ခိုၚ်ၚ်ကၠိုက်က်ရဂှ် ဂွံတီကေတ် နူညးဒေသတအ်ကီု သီုကဵုတံရိုဟ်တၚ်ဂၞၚ်ပရိုၚ်ပ္ဍဲဒပ်ပၞာန်ရ။
ဟိုတ်နူပရိုၚ်ပေါဲဗတိုက်သီဍုၚ်တုဲ သ္ပတံနူဂိတုနဝ်ဝေမ်ဗာမံက်တုဲကၠုၚ်ဏံတုဲ ပ္ဍဲကဵုတံဒပ်၊ ဗဒိုပ်ဒပ်ပၞာန်၊ ဗဒိုပ်ဗၠာဲသၟိၚ်ကဵု ပ္ဍဲရုၚ်ဌာနမဆေၚ်စပ် မၞုံဍုၚ်ရေဝ်တအ်ဂှ် ကံၚ်ဇြဳပၞာန် ထပ်ပလေဝ်ပလေတ်ဒၟံၚ်ဥမၚ်၊ ဗာန်ကာခိုၚ်ၚ်ဗိုန်န်ရ။
တံရိုဟ်တၚ်ဂၞၚ်ပရိုၚ် ပ္ဍဲဒပ်ပၞာန်တအ်ဂှ် ပ္ဍဲကဵုဗဒိုပ်ဒပ်ပၞာန် ဂကောံဇြဟတ်ပၠန်ဂတးတအ် လုပ်စိုပ်ဗတိုက်မာန်တအ်ဂှ် ဒပ်ကံၚ်ဇြဳပၞာန် သၠုၚ်ပ္တိုန်လဝ် ပရေၚ်ဂီုကၠီုကီု၊ သွက်ဂွံပန်ရီုကဵုလွဟ်ဇၞော် နူကဵုကုန်ဗျူဟာတအ်ဂှ် ဗ္ဂပ်လဝ်လွဟ်ဇၞော် ဗွဲမဂၠိုၚ်ရဂှ် ဟီုလဝ်ရ။
သ္အာၚ်နူဂှ်ပၠန် ပ္ဍဲရုၚ်ဌာနမဆေၚ်စပ် မၞုံပ္ဍဲဍုၚ်တအ်ဂှ်လေဝ် ပဆုဲပြံၚ်လဝ် ပ္ဍဲဒပ်ပၞာန်တုဲ နကဵုညညးယိုက်ဝန်တအ် ညံၚ်သတိပရေၚ်ဂီုကၠီုဂွံနွံ၊ ဂကောံအိန်ထံၚ်ဒပ်ပၞာန်တအ်လေဝ် သီုတ္ၚဲ သီုဗ္တံ အလုံပွိုၚ် (၂၄) နာဍဳ စကာကဵုမၚ်ဒၟံၚ်ကၚ် နကဵုအလန်ရဂှ် ဂွံတီကေတ်ရ။
အတိုၚ်ညးဒေသတအ်ဟီုလဝ်မ္ဂး ဟိုတ်နူပရိုၚ်ပေါဲဗတိုက်သီဍုၚ်တုဲ ပရေၚ်ကောန်ဒပ်ကံၚ်ဇြဳပၞာန်တအ် ကၟာတ်လဒဵုစၟဳစၟတ် ဒၞာဲပ္ဍဲဍုၚ်ကဵု မ္ၚးဍုၚ်တအ်ဂှ် ဟၟဲတုဲ ပ္ဍဲကောန်အရာပ်ညးဍုၚ်ကွာန်တအ်ဂှ် ဟိုတ်နူစိုတ်ဒှ်ဓဝိၚ်ဂွိၚ်ဂွာဲတုဲ ပရေၚ်တိတ်မ္ၚးအာကၠုၚ် အောန်စှ်ေရဂှ် ဟီုလဝ်ရ။
ဟိုတ်နူပရိုၚ်ပေါဲဗတိုက်သီဗဒိုပ်တအ်တုဲ ပ္ဍဲဍုၚ်ရေဝ်ဂှ် ဟိုတ်နူပရေၚ်ရာန်ပကောံပကေဝ် ဗၞိက်စၞစသုၚ်သ္ဇိုၚ် ပါလုပ်သီုသ္ၚုတအ်တုဲ ၚုဟ်ဖျာက္ဍၚ်တိုန်ကၠုၚ် ဂၠိုၚ်ကဵုဆတုဲ သ္ပတံနူကၠေၚ်စက်ဒှ်တံ သွက်ဂွံရာန်ကေတ် ဝါတ်ဂါတ်ခက်ခုဲဒၟံၚ်ရဂှ် ဂွံတီကေတ် အတိုၚ်ညးဒေသတအ် ဟီုလဝ်ရ။
မွဲလ္ပာ်ဂှ်မ္ဂး ညးဒေသတအ်ဂှ် ဟိုတ်နူပရိုၚ် နူကဵုဒပ်ကံၚ်ဇြဳပၞာန် တံၚ်ရပ်ကေတ် ပဝ်တာကောန်အရာပ်ညးဍုၚ်ကွာန်တအ် ပ္ဍဲကဵုပေါဲဗတိုက်တအ်တုဲ ပရေၚ်ဒှ်ဓဝိၚ် ဂၠိုၚ်တိုန်ဒၟံၚ်ရ။
ပွိုၚ်ဍုၚ်ရေဝ် တွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် ပ္ဍဲမွဲကာလဒပ်ပၞာန်သီအဝဵုဏံ တံဒပ်ကံၚ်ဇြဳပၞာန်၊ ဗဒိုပ်ဒပ်ပၞာန်ကဵု ရုၚ်ဌာနမဆေၚ်စပ်တအ်ဂှ် ဒးဒုၚ်ဗတိုက်ဒၟံၚ်ကဵု ဂကောံဇြဟတ်ပၠန်ဂတးတအ် ခြာဟွံလအ်ဟွံလအ်တုဲ တိဍာ်လ္ၚဵုဂှ် လ္ပာ်ကံၚ်ဇြဳပၞာန် ဒးဗလးလဝ်တဲရ။
ပရိုၚ် – သြၚ်လောန်တိုၚ်မ်
ဗီု -CJ
sanlontai