ညးပ္တိတ်ကေတ်သြန် နူတိုက်သြန် လ္တူ ၁၀၀၀ ကိုတ်ဒ္ကေဝ်တအ်ဂှ် မၚ်ရံၚ်ခါတ်အာအကာဲရောၚ် တိုက်သြန်ဗဟဵု ဟီု

လဂုၚ်၊ နဝ်ဝေမ်ဗာ(၂၃)

နူတိုက်သြန်ပ္ဍဲဍုၚ် ညးပ္တိတ်ကေတ် သြန် ၁၀၀၀ ကိုတ် ဒ္ကေဝ်လ္ပာ်လ္တူသီုဖအိုတ်တအ်ဂှ် မၚ်ရံၚ် ခါတ်အာအကာဲ ကြပ်ပ်တုဲ ယဝ်ရပါလုပ်ဒၟံၚ် ပ္ဍဲပွဟွံလုပ်သၞောဝ်မ္ဂး ကေတ်အာအရေဝ်လွာဲဂှ်ရောၚ်ဂှ် တိုက်သြန်ဗဟဵု ဟီုဂးလဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၀) ရ။

တိုက်သြန်တအ်ဂှ် ညးပ္တိတ်ကေတ်သြန် လၟိဟ်သြန်ဂၠိုၚ်ကဵုဗၞတ်ဗ္ၜတ်တအ်ဂှ် တိုက်သြန်ဗဟဵု၊ စပိမ ကေုာံ ဂကောံဂၠိုက်ဂၠာဲထံၚ်ပရိုၚ် (FIU) တအ် မင်ရံၚ်ခါတ်အာအကာဲ ကေတ်အာအေရေဝ်ရာင်ဂှ် ဟီုလဝ်ရ။

နကဵုညးဍုၚ်ကွာန်တအ်ဂှ် ပွမပ္တိတ်ကေတ်မသြန် လ္တူနူတၚ်နွံပၟိက်ဂှ် ဟိုတ်နူဒှ်အကာဲအရာ ဒးက္တဵုဒှ်သံသယဂှ်ရ ဒးဒုၚ်မံၚ်ရံၚ်ခါတ်အကာဲကဵု ညးတာလျိုၚ်တအ်မာန်ဒၟံၚ်ရဂှ် ဟီုလဝ်ရ။

“မၞိဟ်ပ္တိတ်ကေတ်သြန် နူကဵုတိုက်သြန် ဂၠိုၚ်ဒၟံၚ်သီုဖအိုတ်တအ်ဂှ် တိုက်သြန်ဗဟဵု၊ စစစ၊ FIU တအ် မၚ်ရံၚ်ခါတ်အကာဲဒၟံၚ် ကြပ်ပ်ဒှ်တုဲ ယဝ်ရပါလုပ်ဆက်စပ်ပါလုပ်ဒၟံၚ် ပ္ဍဲပရေၚ်ဝေၚ်ၚုဟ်ဗွဝ်ဖျာမ္ဂး ကေတ်အာအရေဝ်ရောၚ်” ဂှ် ဥက္ကဋ္ဌတိုက်သြန်ဗဟဵု ဥူလေန်အောၚ် ဟီုလဝ်ရ။

အခိၚ်လၟုဟ်ဏံ တၚ်ဂၞၚ်စရၚ်မၞိဟ်ပ္တိတ်ကေတ်လဝ်သြန် နူတိုက်သြန် ၁၀၀၀ ကိုတ်လ္ပာ်လ္တူတအ် ပလံၚ်ဗစိုပ်ဒၟံၚ် ဇရေၚ်ဂကောံဂၠိုက်ဂၠာဲထံၚ်ပရိုၚ် (FIU)ရဂှ် ဟီုလဝ်ရ။

သ္အာၚ်နူဂှ်ပၠန် ဒုတိယဥက္ကဋ္ဌတိုက်သြန်ဗဟဵုသၟဝ်တဲကံၚ်ဇြဳပၞာန် ဒံက်တာဥူလေန်အောၚ်ဂှ် ပရေၚ်ပ္တိတ်ကေတ်မသြန်တအ်ဂှ် ဟွံဂွံပိုၚ်ခြာလဝ်တုဲ သွက်ဂွံပ္တိတ်ကေတ်သြန်ပ္အပ်စွံလဝ် ဗွဲမပြေပြံၚ်မာန်ဂှ် ကၠောန်ရေၚ်တၠုၚ်ဒၟံၚ်ရဂှ် ဟီုလဝ်ရ။

နတဲဂှ် အခိၚ်ပ္တိတ်ကေတ်သြန် ၜိုတ်မိက်ဂွံပ္တိတ် ပ္တိတ်ကေတ်ဟွံဂွံကီု၊ ဒးရေၚ်ဒၟံၚ်အခိၚ်ဗွဲမလအ်လကီု၊ အကံက်မွဲအကံက်မ္ဂး ပ္တိတ်ကဵုဒၟံၚ်သြန် ၜါစှ်ောကိုတ်ဟေၚ်တုဲ ပါဲနူဂှ် ၜိုတ်မိက်ဂွံပ္တိတ်ပ္တိတ်ဟွံဂွံရဂှ် ကောန်ဍုၚ်လဂုၚ်မွဲတၠဂှ် ဟီုလဝ်ရ။

သ္အာၚ်နူဂှ်ပၠန် ညးတြးဒၟံၚ်ဝါဒ ချူပ္တိုန်ဒၟံၚ် ပရေၚ်ဆဝ်ပ္ၚုဟ် သွက်ဂွံပ္တိတ်ကေတ်မသြန် နူကဵုတိုက်သြန်တအ်ဂှ်လေဝ် သွက်ဂွံဖျေံအာဒုဟ်ဒဏ် နကဵုတၚ်ပျးဌာန်သၞောဝ်ဥပဒေနွံတန်တဴဴဒၟံၚ်လၟုဟ်မာန်ဂှ် ပံၚ်တောဲရေၚ်တၠုၚ်ဒၟံၚ်ကဵု ဂကောံအုပ်ဓုပ်သၞောဝ်ဓဝ်တအ်ရဂှ် တိုက်သြန်ဗဟဵု ဟီုလဝ်ရ။

အခိၚ်လၟုဟ်ဏံ ပ္ဍဲကဵုတိုက်သြန်ပုဂ္ဂလိက ပ္ဍဲဍုၚ်တအ်ဂှ် ပ္ဍဲအရာ ညးဍုၚ်ကွာန်တအ် ပ္တိတ်ကေတ်မသြန်ဂှ် လ္တူနူတၚ်နွံပၟိက် ပ္တိတ်ကေတ်ဒၟံၚ်ညးသ္ကအ်ရဂှ် ဟီုလဝ်ရ။

သီုဟၟဲပၟိက်မွဲသာ် ဟိုတ်နူပရေၚ်ပ္တိတ်ကေတ်ဒၟံၚ်မသြန်နူကဵုတိုက်သြန်ဗီုလၟုဟ်ဏံတုဲ ဗီုအတိုၚ် ပ္ဍဲကဵုသၞာံ ၂၀၂၂ တုဲကၠုၚ်တေံ ညးဍုၚ်ကွာန်တအ်ဂှ် နူကဵုသြန်ဇကုဇကုဂှ် ကဵုထောံတၟံကၠံမွဲတုဲ ဒှ်ညံၚ်က္လေၚ်ကော်ဘိက်ဒၟံၚ် ပရေၚ်သၠာဲကေတ်တအ် ဒှ်ကၠုၚ်ရောၚ်ဂှ် တိုက်သြန်ဗဟဵု ဟီုလဝ်ရ။

အခိၚ်လၟုဟ်ဏံ ပ္ဍဲကဵုတိုက်သြန်ပုဂ္ဂလိက၊ တိုက်သြန်မျာန်မဇြဳပွာယျေ မၞုံတွဵုရးသေံသၟဝ်ကျာ၊ ရးသက်ကိုၚ်၊ ဍုၚ်ကဝ်လေန်ကဵု ဍုၚ်ခါမ်ပါတ်တအ်ဂှ် ဗ္ဂေတ်ကမၠောန်ဟွံမာန်တုဲ ဒးဆက်ကၟာတ်ဒၟံၚ်ရဂှ် ဂွံတီကေတ်ရ။

ကြဴနူဒပ်ပၞာန်သီအဝဵုတုဲ ဟိုတ်နူၚုဟ်သြန်စှ်ေကၠုၚ်၊ ဓဝ်ပတှ်ေလ္တူတိုက်သြန်တအ် အောန်ယအ်စှ်ေကၠုၚ်တအ်တုဲ ပ္ဍဲဗွိုၚ်သၞာံ ၂၀၂၁ ဂှ်လေဝ် မၞိဟ်ပ္တိ​တ်ကေတ်သြန်နူတိုက်သြန်တအ် နွံကၠုၚ်လဝ်ဗွဲမဂၠိုၚ်ရ။

ပရိုၚ် – သြၚ်လောန်တိုၚ်မ်

ဗီု – Social Media