ပ္ဍဲရခေၚ် ပ္ဍဲပရေၚ်ချဳဒရာၚ်ပၞာန် ပွိုၚ် (၁၀) တ္ၚဲ ဗဒိုပ်ကံၚ်ဇြဳပၞာန် အပံၚ်လၟိဟ် (၄၀) ပြၚ် ဒးဒုၚ်သီလဝ်

ရခေၚ်၊ နဝ်ဝေမ်ဗာ (၂၃)

ပ္ဍဲတွဵုရးရခေၚ်ဂှ် ပ္ဍဲကဵု “ပရေၚ်ချဳဒရာၚ်ပၞာန် ၁၀၂၇” စချဳဒရာၚ်လဝ် ပ္ဍဲပွိုၚ် (၁၀) တ္ၚဲဂှ် ဗဒိုပ်ကံၚ်ဇြဳပၞာန်ပန်ဗဒိုပ်ကဵု အပံၚ်လၟိဟ်ဗဒိုပ် ဒးသၠးထောံလဝ်တၞဟ် (၄၀) ဗဒိုပ်ပြၚ် ဒပ်ပၞာန်ရခေၚ် (AA) သီဂွံလဝ်ရဂှ် လလောၚ်တြးလဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၂) ရ။

ပ္ဍဲကဵုတ္ၚဲစချဳဒရာၚ်ပၞာန် ဂိတုနဝ်ဝေမ်ဗာ စၟတ်တ္ၚဲ (၁၃) ကဵု စၟတ်တ္ၚဲ (၁၄) ဂှ် ဗဒိုပ်ပၞာန်မၚ်ပယျဵုဒုမ်ပိုက်ကဵု ဗဒိုပ်မၚ်ပယျဵုချုန်ခါလဳ ပွိုၚ်ဍုၚ်ယျတေံတံၚ်တအ်ဂှ် ဒပ်ပၞာန်ရခေၚ် (AA) သီကေတ်မာန်လဝ်ရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၆) အခိၚ်နူဂယး ၜိုတ် (၁၀) နာဍဳဂှ် စချဳဒရာၚ်ထ္ပက်ပၞာန် ဗတိုက်လဝ် ပ္ဍဲဗဒိုပ်မၚ်ပယျဵုဒုမ်ညော ဖျေံသ္ဇိုၚ်မောၚ်တဝ်ဂှ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၇) အခိၚ်ဒေါဝ်တ္ၚဲ ၜိုတ် (၁) နာဍဳဂှ် ဒပ်ပၞာန်ရခေၚ် သီကေတ်မာန်လဝ်ပေၚ်ၚ်ရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၈) ဂှ်လေဝ် ဗဒိုပ်ကံၚ်ဇြဳပၞာန် ဒပ်ပၞာန်ခထဳလှ ဖျေံသ္ဇိုၚ်ဘူဒဳတောၚ်ဂှ် စထ္ပက်ပၞာန်ဗတိုက်လဝ် အခိၚ်နူဂယးၜိုတ် (၈) နာဍဳဂှ် ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၂၁) ဂှ် သီကေတ်လဝ်မာန် ပေၚ်ၚ်ရ။

သ္အာၚ်နူဂှ်ပၠန် ဗျူဟာထရောန်အိုၚ် ကဵု ဗျူဟာနှုန်ဗူ ကံၚ်ဇြဳပၞာန်ကေတ်လဝ်ဒၞာဲခိုၚ်ၚ် မၞုံပွိုၚ်ဍုၚ်ပလေတ်ဝ ၜါဌာနဂှ် စဗတိုက်ထ္ပက်လဝ်ပၞာန် ် နူကဵုဂိတုနဝ်ဝေမ်ဗာစၟတ်တ္ၚဲ (၁၄) တေံဂှ် စဵုကဵုလၟုဟ်ဏံ ပေါဲဗတိုက်ၜါလ္ပာ်သ္ကာတ်မြဟ်ဒၟံၚ်ရ။

ဗျူဟာၜါဌာနဏံဂှ် နူကဵုကံၚ်ဇြဳပၞာန် ဒးထောံဖျေံကဵုဒၟံၚ် လွဟ်လက်နက်မက်ဇွောံမတအ် နူကဵုက္ၜၚ်ကျာတုဲ ကပေါတ်ဖျေံလဝ် နူကဵုက္ၜၚ်ကျာ ပ္ဍဲကဵုတ္ၚဲတုဲကၠုၚ်တေံလ္ၚဵုဂှ် ဒပ်ပၞာန်ရခေၚ် သီဂွံလဝ်ရဂှ် လလောၚ်တြးလဝ်ရ။

သ္အာၚ်နူဂှ်ပၠန် ပ္ဍဲဍုၚ်ပေါက်တဝ် ကံၚ်ဇြဳပၞာန်ရပ်ကေတ်လဝ် ကောန်အရာပ်ညးဍုၚ်ကွာန် နဒဒှ်ဒေၚ်ဒုၚ်ဒၞာမၞိဟ် ပါလုပ်သီုခမဳသၚ်၊ ညးအယုက်ဇၞော်၊ ညးဗြဴနွံကဵုယဲဒိုက် ကေုာံကောန်ၚာ်သၟတ်တအ် ဗ္ဒာဲ (၁၀၀) တၠဂှ် ဒပ်ပၞာန်ရခေၚ် ရီုပ္တိတ်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၁) မာန်လဝ်ရဂှ် လလောၚ်တြးလဝ်ရ။

တ္ၚဲဏံ အခိၚ်နူဂယး ၜိုတ် (၇) နာဍဳဂှ် သွက်ဂွံရီုပ္တိတ် ကောန်အရာပ်ညးဍုၚ်ကွာန် သှ်ေဒၟံၚ် ပ္ဍဲပွိုၚ်ဍုၚ်ပေါက်တဝ်မာန်ဂှ် ပေါဲဗတိုက်ဆက်ဒှ်ဒၟံၚ်တုဲ နူကဵုလ္ပာ်ကံၚ်ဇြဳပၞာန် ဟိုတ်နူပန်ရီုဒၟံၚ်ကဵု လွဟ်ဇၞော် နူဍာန်ကျာ ဍာန်ဍာ်တုဲ ပေါဲဗတိုက်ၜါလ္ပာ် သ္ကာတ်မြဟ်ဒၟံၚ်ဖိုဟ်ရ။

နူလ္ပာ်ကံၚ်ဇြဳပၞာန် အကြာပန်ရီုကဵုဒၟံၚ်လွဟ်ဇၞော် နူကဵုဍာန်ကျာ ဍာန်ဍာ်ဂှ် ဒပ်ပၞာန်ရခေၚ် ထပ်ရီုပ္တိတ်ဏာလဝ် ကောန်အရာပ်ညးဍုၚ်ကွာန်လ္ၚဵု နူပွိုၚ်ဍုၚ်ပေါက်တဝ်မာန်လဝ်ရဂှ် လလောၚ်တြးလဝ်ရ။

ဗဒိုပ်ဒပ်ပၞာန်ကဵု ကောန်ဒပ်ကံၚ်ဇြဳပၞာန်တအ် ဆက်ကလိလောန်ဒၟံၚ် ဂဗုတ်ရာဇဝတ်ဍဵုဍိုက်သ္ပမာန် ဘပဠ ပြိုက်ဂစိုတ်ဒၟံၚ် ညးဍုၚ်ကွာန်တအ် သီုတၚ်ရန်တၟံနွံနွံ ဗီုလၟုဟ်ဏံဂှ် ဒပ်ပၞာန်ရခေၚ် (AA) ဆက်ဗတိုက်အာရောၚ်ဂှ် လလောၚ်တြးလဝ်ရ။

ပရိုၚ် – သြၚ်လောန်တိုၚ်မ်

ဗီု – AA Info Desk