အကြာပ်ဒပ်ဇၞော်မွဲတၠ နူကဵုဌာန်ဂအုပ်ဒပ်ဍာ် လုပ်ဖျေံလွဟ် ဇရေၚ်တမ်ဒပ် (၁) ခရိုၚ်ဗိက်

ဗိက်၊ နဝ်ဝေမ်ဗာ ၂၃

အကြာပ်ဒပ်ဇၞော်မွဲတၠ နူကဵုဌာန်ဂအုပ်ပလေဝ်က္ၜၚ် ဒပ်ဍာ်ကံၚ်ဇြဳပၞာန် (သီလဝါ) ဖျေံသ္ဇိုၚ်ဍုၚ်တာန်လျေန် ရးဒေသဇၞော်လ္ဂုၚ်ဂှ် သ္ပ CDM တုဲ လုပ်စ္ၜုဲစ္ၜော်ကၠုၚ် ဂၠံသြိုဟ်ညးဍုၚ်ကွာန်တံဂှ် တမ်ဒပ် (၁) ခရိုၚ်ဗိက် လလောၚ်ပ္တိတ်လဝ် ပ္ဍဲဂိတုနဝ်ဝေမ်ဗာ ၂၂ တေံရ။

အကြာပ်ဒပ်ဇၞော် အံၚ်ကျဝ်မျဵုဝွံ တုဲကၠုၚ် ပ္ဍဲဂိတုနဝ်ဝေမ်ဗာ ၂၀ တေံ ဆက်စၠောံဇရေၚ်တမ်ဒပ် စၟတ်−၁ ခရိုၚ်ဗိက်၊ ဂကောံဒပ်စဵုဒၞါညးဍုၚ်ကွာန်ပဠဝ် နူကဵုဌာန်ဂအုပ်ပလေဝ်က္ၜၚ် ဒပ်ဍာ် (သီလဝါ) ဂှ်တုဲ လုပ်စိုပ်စ္ၜုဲစ္ၜော်ကၠုၚ်ရ။

ညးဝွံ စနူအခိၚ်ဒပ်ပၞာန်သီအဝဵုတုဲ ဟိုတ်နူပြဝပကီုပရာပ် ဒပ်ကံၚ်ဇြဳပၞာန် လ္တူညးဍုၚ်ကွာန်ကောန်အရာပ်တံဂှ်ကီု၊ ပ္ဍဲကဵုဒပ်ပၞာန် ဟိုတ်နူဍဵုဍိုက်ဒၟံၚ်ညးသ္ကအ်တံဂှ်တုဲ ဟွံမိက်မံၚ်ရတုဲ တိတ်ကၠုၚ်လဝ်ဂှ် ညးဒုၚ်တာလျိုၚ် လလောၚ်ပရိုၚ် ခရိုၚ်ဗိက် ကလေၚ်လဴထ္ၜးလဝ်ရ။

အကြာပ်ဒပ်ဇၞော် အံၚ်ကျဝ်မျဵု မလုပ်စိုပ်ကၠုၚ်ဂှ် ၜိုန်ရကပေါတ်လွဟ်လက်နက်ပၞာန် မုမွဲမှဟွံပါကီုလေဝ် ထိၚ်ဒဝ်လဝ်ကဵု ဒၞါဲဂီုကၠီုတံ ခိုဟ်ဟ်ဂေါဝ်ဝ်တုဲ ဆက်ကၠောန်ၜိုတ်အာ အတိုၚ်မူဝါဒ CDM သၞာဲဒဴကၟိန်ဍုၚ် ကံၚ်ဇြဳကဵုကသပ်ပရေၚ်ညဳသၟဟ်ဂကူ NUCC တံဏောၚ်ဂှ် သ္ဂးရ။

ကောန်ဒပ်ကံၚ်ဇြဳပၞာန် ကေုာံ ကောန်ဒပ်ဗၠာဲသၟိၚ် မသှ်ေဒၟံၚ် နူကဵုဂကောံဒပ်တိုက်၊ ဒပ်ဍာ်၊ ဒပ်ကျာ ကံၚ်ဇြဳပၞာန်တံဂှ်လေဝ် ရံၚ်မုက်ညးဍုၚ်ကွာန်တံတုဲ ညံၚ်ဂွံရုန်တိတ် နူကဵုသၟဝ်တဲဂကောံတၠအဝဵုမွဲဂကောံ ဗွဲမပြဟ်ဂှ်လေဝ် ဖ္တိုက်ဖ္အောဝ်လဝ်ရ။

အကြာပ်ဒပ်ဇၞော် CDM မဒှ်ညးဒေသ ပွိုၚ်ဍုၚ်ပဠဝ်ဂှ်ဝွံ ဒှ်အကြာပ်ဒပ်ဇၞော် အာယုက်ယိုက်ဂၠေၚ်တာလျိုၚ်ပၞာန် ပ္ဍဲကဵုဒပ်ကံၚ်ဇြဳပၞာန် မၞုံ ၁၄ သၞာံမွဲတၠဂှ် ဂွံတီကေတ်ရ။

အတိုၚ်ဂလာန် အလဵုအသဳညဳသၟဟ်ဂကူ NUG တံဂှ်မ္ဂး အပ္ဍဲကာလသီအဝဵုဏံ ဇြဟတ်ဒပ်ကံၚ်ဇြဳပၞာန် ကေုာံ ကောန်ဒပ်ဗၠာဲသၟိၚ်တံ ၁၄၀၀၀ ပြၚ် သ္ပလဝ် CDM ဂှ် ပ္ဍဲသၞာံဏံမံက်တေံ လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−တမ်ဒပ် စၟတ် (၁) ခရိုၚ်ဗိက်