ဗ္ဒိုပ်ဒပ်ကံၚ်ဇြဳပၞာန်လ္ၚဵု မၞုံတွဵုရးကချေၚ်တံ စရုပ်သီ

အေန်ဂျာန်ယာန်၊ နဝ်ဝေမ်ဗာ ၂၃

အလုံမွဲကၟိန်ဍုၚ် အခိၚ်ဘိုၚ်ဗ္တိုက်ဒၟံၚ် ကုဒပ်ကံၚ်ဇြဳပၞာန် သွက်ဂွံထပိုတ်ထောံရိုဟ်ကၞက် နကဵုပၞာန်ထ္ပက်ဂှ် ရုပ်သီဏာလဝ် ဗ္ဒိုပ်ဒပ် ပ္ဍဲတွဵုရးကချေၚ် ပိကဵု ဗ္ဒိုပ်ဗၠာဲသၟိၚ်မွဲဂှ် ဂွံတီကေတ် ဇရေၚ်ဂကောံဗၠးၜးကချၚ် KIO ရ။

ဗ္ဒိုပ်ဒပ် မရုပ်သီအာဂမၠိုၚ်ဂှ်ဝွံ ဒှ်ဗ္ဒိုပ်ဒပ်ကံၚ်ဇြဳပၞာန် ခလရ ၄၀ မဖျေံလဝ်သ္ဇိုၚ် အပ္ဍဲပွိုၚ်ဍုၚ်အေန်ဂျာန်ယာန် မၞုံပ္ဍဲသ္ကုတ်လ္တူ (မြစ်ဆုံ) ခရိုၚ်မျေတ်ကျဳနာ လလအ်ပွိုၚ်စှ်သၞာံပြၚ်ဂှ်ကီု၊ ဗ္ဒိုပ်ဒပ်မၞုံ ၁၆ မိုၚ်၊ ဗ္ဒိုပ်ဒပ်ဂွဵုထံၚ် ကေုာံ ဗ္ဒိုပ်ဗၠာဲသၟိၚ်မွဲတံ ပါလုပ်ရ။

ဗ္ဒိုပ်ဒပ် ပိ ကေုာံ ဗ္ဒိုပ်ဗၠာဲသၟိၚ်တံဂှ်ဝွံ ပ္ဍဲဂိတုနဝ်ဝေမ်ဗာ ၂၁ တေံ ဆုတ်စ္ဍးအာ လ္ပာ်ဍုၚ်မျေတ်ကျဳနာ မၞုံပ္ဍဲဌာန်ဂအုပ်ပၞာန်ရးသ္ကုတ်သၟဝ်ကျာတံဂှ်တုဲ ဟိုတ်ဍေံဂှ်တှ်ေ ဂၠိုက်ဂၠါဲဒၟံၚ်ဖိုဟ်ရောၚ် သ္ကိုပ်ဗိုလ်ဇၞော်နဝ်ဘူ ညးဒုၚ်တာလျိုၚ်လလောၚ်ပရိုၚ် KIO ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ဗ္ဒိုပ်ဒပ် ၃ ဏံ အေန်ဂျာန်ယာန်၊ ဗ္ဒိုပ်ဒပ် ၁၆ မိုၚ်၊ ဗ္ဒါဲ(မြစ်ဆုံ) ကော်ဗတ်ကချေၚ်ပိုယ်တံ ဗ္ဒိုပ်ဒပ်ဂွဵုထံၚ် ပိဏံဂှ် နူဏေံတေံ နအစဳဇန်ညးတံညးတံဂှ် ပြံၚ်အာ လ္ပာ်ဍုၚ်မျေတ်ကျဳနာရ။ မူဟိုတ်ဂွံပြံၚ်အာ၊ အကာဲအရာဗျူဟာပၞာန်သာ်လဵုတံ ဒှ်ကၠုၚ်ရောဟီုဂှ် ပိုယ်တံလေဝ် ဂၠိုက်ဂၠါဲဒၟံၚ်ဖိုဟ် လ္ၚတ်ဒၟံၚ်ဖိုဟ်ရ“ သာ်ဝွံ သ္ဂးရ။

အခိၚ်လၟုဟ် နကဵုဗ္ၜတ်အလုံဍုၚ်မွဲ အခိၚ်ပေါဲဗ္တိုက်ပရေၚ်ပၞာန် အပ္ဍဲဒေသတံ က္တဵုဒှ်ဒၟံၚ်ဂှ် ပ္ဍဲကဵုဍုၚ်အေန်ဂျာန်ယာန်ဂှ်လေဝ် ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်တုဲ မွဲဒမြိပ်ဂၠံၚ်ကာ မျေတ်ကျဳနာ−ဗာန်မဝ်ဂှ် ဒှ်အကာဲအရာ မၚ်ရံၚ်ဒၟံၚ်ညးသ္ကအ်အိုတ်ရောၚ်ဂှ် ညးဟီုရ။

ဗ္ဒိုပ်ဒပ်လ္ၚဵု ရုပ်သီအာဂှ်ဝွံ လ္ဂောံကဵုဗျူဟာပရေၚ်ပၞာန်မ္ဂး ကလေၚ်ပံၚ်ကောံလဝ် ကုအကာဲအရာ မထ္ပက်ကၠုၚ်ပၞာန် နကဵုဇြဟတ်ဗွဲမဂၠိုၚ်ဂှ်ရောၚ်ဂှ် ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ဗိုလ်ဇၞော်ဇြဝ်မေန်ထောန် ဟီုဂးလဝ် ပ္ဍဲကဵုလိက်ပရိုၚ်ကၟိန်ဍုၚ်ပိုၚ် ဒပ်ပၞာန်ထိၚ်ဒက် မပ္တိတ်တြးကၠုၚ် ပ္ဍဲဂိတုနဝ်ဝေမ်ဗာ ၂၀ တေံရ။

နကဵုဒပ်ပၞာန်ဗၠးၜးကချေၚ် KIA ပ္ဍဲဂိတုအံက်တဝ်ဗာ သတ္တာဟတတိယတုဲကၠုၚ်တေံဂှ် ဗ္တိုက်သီဂွံလဝ် ဗ္ဒိုပ်နကောတ် ကံၚ်ဇြဳပၞာန် မၞုံဍုၚ်မုၚ်ကိုဝ် နူကဵုရးသေံသၟဝ်ကျာတေံဂှ်ကဵု ဗ္ဒိုပ်ဒပ် (လဲလုံ) နူကဵုဍုၚ်ဝိုၚ်မဝ်တံဂှ်ရ။

ပ္ဍဲဂိတုအံက်တဝ်ဗာ ၃၁ ဂှ်လေဝ် ကဵုဂကောံပံၚ်ကောံတံဂှ် ဗ္တိုက်သီဂွံလဝ် ဗ္ဒိုပ်ဂါန်ဒံၚ်ယာန် ကံၚ်ဇြဳပၞာန် မဖျေံလဝ်ဒပ် လလအ်ပွိုၚ်စှ်သၞာံပြၚ် လ္တူဂၠံၚ်ကာ မျေတ်ကျဳနာ−ဗာန်မဝ် တွဵုရးကချေၚ်ဂှ်ရ။

အခိၚ်လၟုဟ်ဂှ်လေဝ် နကဵု KIA ပံၚ်တောဲပါလုပ်ဒၟံၚ် ပ္ဍဲကဵုပရေၚ်ပၞာန် ၁၀၂၇ ဂှ်တုဲ ပ္ဍဲကဵုရးသက်ကိုၚ်ဂှ်လေဝ် ဗ္တိုက်ဒၟံၚ် ကံၚ်ဇြဳပၞာန်တံ ကရောံဂကောံဒပ်ပံၚ်ကောံ PDF တံမွဲစွံရ။

ကံၚ်ဇြဳပၞာန်ဝွံ ဟိုတ်နူပရေၚ်ပၞာန် ၁၀၂၇ တုဲ ဒဵုကဵုတ္ၚဲဏံ ပ္ဍဲကဵုရးသက်ကိုၚ်ဂှ် ဍုၚ်ဇၞော်ၜါဍုၚ်၊ ပ္ဍဲကဵုရးသေံသၟဝ်ကျာဂှ် ဍုၚ်ဇၞော် ၆ ဍုၚ် ကေုာံ ပ္ဍဲကဵုတွဵုရးရခေၚ်၊ ချေၚ်၊ ကရေၚ်တံဂှ်လေဝ် ဒးဆေၚ်ဒၟံၚ်မုက် ကုပၞာန်ထ္ပက် ဂကောံဒပ်ပံၚ်ကောံတုဲ ဒးဆောံလေၚ်လဝ် ဗ္ဒိုပ်ဒပ်ကၠံပြၚ်ရ။

ပရိုၚ်−သြၚ်လောန်တိုၚ်(မ်)

ဗီု−Twitter