ပ္ဍဲကဵုဍုၚ်ကျာ်ပိ ဒုသ္ကိုပ်တမ်ဒပ်ကံၚ်ဇြဳပၞာန်မွဲတၠ ဒးဒုၚ်ပန်ဂစိုတ်

ကျာ်ပိ၊ နဝ်ဝေမ်ဗာ ၂၃

ပ္ဍဲကဵုဍုၚ်ကျာ်ပိ တွဵုရးကရေၚ် မဒှ်ဍုၚ်ပယျဵုသေံ−ဗၟာဂှ် ပ္ဍဲဂိတုနဝ်ဝေမ်ဗာ ၂၃ အခိၚ်နူဂယး ၜိုတ် ၉ နာဍဳဂှ် ဒုသ္ကိုပ်တမ်ဒပ်ကံၚ်ဇြဳပၞာန်မွဲတၠ ဒးဒုၚ်ပန်ဂစိုတ်လဝ် ကဵုသနာ်ပါတုဲ ချိုတ်အာလဝ်ဂှ် ဂွံတီကေတ် အတိုၚ်ဂလာန်ညးဒေသတံရ။

ဒုသ္ကိုပ်တမ်ဒပ် သ္ကိုပ်ဗိုလ်အေဆာန် နူကဵုတမ်ဒပ်ကံၚ်ဇြဳပၞာန် ခလရ စၟတ် (၉၇) ဖျေံသ္ဇိုၚ်ကအ်ကြိက်ဂှ်ဝွံ ကြဴနူခေပ်သော် ပ္ဍဲဆေၚ် Beauty Parlor လ္တူဍုၚ်ကျာ်ပိတုဲ အခိၚ်ပလေဝ်ဒၟံၚ်သ္ဂောံစဴဂှ် ဒးဒုၚ်ပန်ဂစိုတ်လဝ် နကဵုသနာ်ပါရ။

ဟိုတ်နူဒးဒုၚ်ပန်ဂစိုတ်လဝ် ကဵုသနာ်ပါဂှ်ရ သ္ကိုပ်ဗိုလ်အေဆာန်ဝွံ ကလိဂွံအာလဝ်ဝပ် မကမ်ကၠိုဟ်အာက္ဍိုပ်ဂှ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ်ရ။

ကြဴနူသ္ကိုပ်ဗိုလ်အေဆာန် ဒးဒုၚ်ပန်ဂစိုတ်တုဲဂှ် ဂကောံဟံၚ်ပြာ်မှာဇန်တံ ပလံၚ်ဗစိုပ်ကဵုလဝ် ရုၚ်ဂဥုဲညးဍုၚ်ကွာန်ကျာ်ပိရောၚ် ညးဒေသတံ ဟီုရ။

ဒုသ္ကိုပ်တမ်ဒပ်ကံၚ်ဇြဳပၞာန် ဒးဒုၚ်ပန်ဂစိုတ်လတ်ကီုလေဝ် အပ္ဍဲဍုၚ်ကျာ်ပိဂှ် ကၟာတ်လဒဵုဂၠိုက်ဂၠါဲစၟဳတ်တံ ဟွံမွဲတုဲ ကံၚ်ဇြဳပၞာန် မံၚ်ဒၟံၚ် အပ္ဍဲကဵုဒပ်တံသၟးဂှ် ဂွံတီကေတ် နူကဵုညးဒေသတံရ။

ပရေၚ်ပန်ပှော်ဏံဂှ် ဂကောံလဵုကၠောန်သ္ပလဝ်ရောဟီုဂှ် ဒဵုကဵုအခိၚ်လၟုဟ် လလောၚ်ပ္တိတ်လဝ်မွဲမွဲဂှ် ဟွံဂွံဆဵုကေတ်ဏီရ။

ပ္ဍဲကဵုဍုၚ်ကျာ်ပိဂှ် မ္ၚးနူကဵုဒပ်ကံၚ်ဇြဳပၞာန်ဂှ် ဒပ်ပၞာန်ဗၠးၜးကောန်ဂကူကရေၚ် KNLA, ကံၚ်ဇြဳၜိုဟ်လလမ်ကရေၚ် PC, ဒပ်မၚ်ပယျဵု BGF ၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် DKBA ကေုာံ ဗော်ဍုၚ်မန်တၟိတံ ပါလုပ်ဂှ် သီုကဵုဒှ်ဒေသ ဂကောံရပ်လွဟ်ကောန်ဍုၚ်အရၚ်မန်တံ ချဳဒရာၚ်ဒၟံၚ်မွဲကီုရ။

တမ်ဒပ်ကံၚ်ဇြဳပၞာန် ခလရ စၟတ် (၉၇) ဖျေံသ္ဇိုၚ်ကအ်ကြိက်ဂှ်ဝွံ လ္ဂောံကဵုဂီုကၠီုတိဍာ်တုဲ ဒှ်တမ်ဒပ် ကၠုၚ်စိုပ်ဖျေံလဝ်သ္ဇိုၚ် ပ္ဍဲကဵုဍုၚ်ကျာ်ပိဂှ် ဂွံတီကေတ် နူကဵုပရိုၚ်တမ်ရိုဟ်ဒပ်ပၞာန်တံရ။

ပရိုၚ်−သြၚ်လောန်တိုၚ်(မ်)

ဗီု−CJ