ဗော်ဍုၚ်မန်တၟိ ဒက်ဒၟံၚ်ဂကောံစဵုဒၞါ ပ္ဍဲကဵုကွာန်မန်တံဂှ်ယျဟာ

ရေဝ်၊ နဝ်ဝေမ်ဗာ ၂၄

ဗော်ဍုၚ်မန်တၟိ မဒှ်ဂကောံရပ်လွဟ်ကောန်ဍုၚ်အရၚ်ဂှ် သွက်ဂွံဒက်ဂကောံစဵုဒၞါ ပ္ဍဲကဵုကွာန်မန် ပ္ဍဲဒေသသၟဝ်အုပ်ဓုပ်ဗော်ဍုၚ်မန်တၟိတံဂှ် ကံက်ဒၟံၚ်သြန် နူကဵုညးဍုၚ်ကွာန်မန် နူကဵုဒေသတံနွံဒၟံၚ်ရောၚ် ပရိုၚ်မံက်တိတ်ဒၟံၚ်ရ။

ပ္ဍဲကဵုကွာန်မန် မၞုံအပ္ဍဲဒေသထိၚ်ဒက်ဗော်ဍုၚ်မန်တၟိတံဂှ် ဒက်ဂကောံစဵုဒၞါကွာန်တုဲ သွက်ဂွံရာန်ကေတ်လွဟ်တံဂှ် မွဲကွာန် လွဟ်ပိဇကိုအ်ဂှ် ကံက်ဒၟံၚ်နူကဵုညးဒေသတံ နွံဒၟံၚ်ရောၚ် ဂၠိုက်ဂၠါဲဂွံတီကေတ် နူကဵုညးဒေသတံကဵု ညးမစုက်လုက်ကဵုဗော်ဍုၚ်မန်တၟိတံရ။

တွဵုရးကရေၚ် အပ္ဍဲပွိုၚ်ဍုၚ်ကအ်ကြိက် ကွာန်မန်သၟဝ်အုပ်ဓုပ်ဗော်ဍုၚ်မန်တၟိဂမၠိုၚ် မပ္တံကဵုကွာန်ကအ်ဗိန်၊ ကအ်ပံက်၊ ကအ်မိတ်၊ ကွာန်ကျာ်ဇၞော်၊ ကွာန်ခအံၚ်ကြေဟ် ကွာန်ဇၞော်ဇၞော်တံဏံကဵု ကွာန်မၞုံအပ္ဍဲဂကောံကွာန်တံဏံ ဗ္ဒါဲ ၂၀ ကွာန် ပါလုပ်ဂှ် ညးဒေသကအ်ဗိန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အပ္ဍဲကွာန်တံဏံဂမၠိုၚ် ကွာန်သ္ၚိဂၠိုၚ်တံဂှ် မွဲသ္ၚိ ပိဠက် ကေုာံ ကွာန်သ္ၚိအောန်တံဂှ် မွဲသ္ၚိ လ္တူမွဲကိုဋ် သွက်ဂွံကဵုအိုတ်ဂှ် လ္ပာ်ဗော်ဍုၚ်မန်တၟိ ကဵုလဝ်အခိၚ်ၜါသတ္တာဟတုဲ ညးဒေသ ဟွံတုပ်စိုတ်တံလေဝ် နွံဒၟံၚ်ရောၚ် သ္ဂးရ။

“ ရဲကွာန်တံဂှ်တှ်ေ ကရောတ်ဒၟံၚ်ညးသ္ကအ်အိုတ်ရ။ မၞိဟ်ဟွံမွဲတံဂှ်တှ်ေ လၟုဟ်ဂွံကၠောန်စဂှ်လေဝ် ဝါတ်ဒၟံၚ်။ အခိၚ်ကၠောန်လှုဲဝါတ်ဂှ် ညးတံ အာတ်သြန်၊ ဟွံကဵု။ သ္ၚိလ္ၚဵုတံဂှ် စုတ်မွဲဠက်၊ ၜါဠက်။ သ္ၚိစုတ်ကဵုပေၚ်ၚ်ဂှ် အောန်ဒၟံၚ်ဏောၚ်။ ရဲကွာန်တံဂှ် ဟွံတုပ်စိုတ်ပုဟ်။ ဒှ်ဒၟံၚ်သာ်ဏံ” သာ်ဝွံ ညးဒေသကအ်ဗိန် ဟီုရ။

အခိၚ်လၟုဟ်ဂှ် သွက်ဂွံရာန်လွဟ်ဂှ် အပ္ဍဲမွဲၜါတ္ၚဲဏံသၟးဂှ် မၞိဟ်နူကဵုအရာပ် ၃၊ ၄ တၠ ကၠုၚ်ကံက် ဇရေၚ်ညးဍုၚ်ကွာန်ပ္ဍဲကွာန်တံဂှ်တုဲ ၜိုတ်ဗၞတ်ကဵုမာန်ဂှ် ပါ်ကဵုလဝ်ၜါတဲတံ နွံဂှ် သ္ဂးရ။

အပ္ဍဲကွာန်မန်တံဂှ် ယဝ်ရကံၚ်ဇြဳပၞာန်ကဵု ဒပ်ပံၚ်ကောံပၠန်ဂတးတံ ဒှ်ပေါဲဗ္တိုက်မ္ဂး ဟိုတ်နူဂွိၚ်ဖေက်ဒြပ်ရတ်ပိုန်ဟာန်လမျီုညးဍုၚ်ကွာန်ဒေသတံ ဇီုကပိုက်ဂှ်ရ ဒက်လဝ်ဂကောံစဵုဒၞါတံရောၚ်ဂှ် ညးမစုက်လုက်ကဵု ဗော်ဍုၚ်မန်တၟိမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

သ္အာၚ်နူဂှ်ပၠန် ပ္ဍဲကဵုသၞာံဏံမံက်တေံဂှ်လေဝ် ပ္ဍဲကဵုကွာန်ကအ်ဗိုတ် ဒေသထိၚ်ဒက်ဗော်ဍုၚ်မန်တၟိဂှ် ဟိုတ်နူပေါဲဗ္တိုက် မက္တဵုဒှ်လဝ် အကြာကံၚ်ဇြဳပၞာန်ကဵု ဂကောံဒပ်ပၠန်ဂတးတံဂှ်တုဲ နကဵုဗော်ဍုၚ်မန်တၟိ ဒက်လဝ်ဂကောံပျဳတုသေတ် အပ္ဍဲခရိုၚ်သဓီုနွံဒၟံၚ်ရောၚ် သ္ဂးရ။

မွဲလ္ပာ်ဂှ်ပၠန် ဟိုတ်နူဒပ်ကံၚ်ဇြဳပၞာန် ကျဗြံကၠုၚ်ဒၟံၚ်ဂှ်ရ ယဝ်ရယန္တယာဒပ်ပၞာန် သရိုဟ်အာမ္ဂး ကွာန်မန်ဂမၠိုၚ် ညံၚ်ဂွိုအ်စိုပ်အာ သၟဝ်တဲဂကောံရပ်လွဟ်မွဲမွဲဂှ် နကဵုဗော်ဍုၚ်မန်တၟိ ဒးပခိုၚ်ကၠိုက်လဝ် ပရေၚ်အုပ်ဓုပ် ပ္ဍဲကဵုကွာန်တံဏံဏောၚ်ဂှ် ညးချဳဒရာၚ်ပရေၚ်မန်တံ ထံက်ထ္ၜးလဝ်တံလဝ် နွံဒၟံၚ်ပၠန်ရ။

အခိၚ်လၟုဟ်ဂှ်လေဝ် ဟိုတ်နူပရေၚ်ပၞာန် ၁၀၂၇ ဂကောံမဟာမိတ်ကောဒေံသ္ကုတ်သၟဝ်ကျာပိဂကောံ မစကၠုၚ်လဝ်ဂှ်တုဲ ပ္ဍဲကဵုချေၚ်၊ ကရေၚ်ဍာဲ၊ သက်ကိုၚ် ကေုာံ ရခေၚ်တံဂှ်လေဝ် ကံၚ်ဇြဳပၞာန် ဒးဂိဒၟံၚ်တုဲ ဗွိုၚ်ပၞာန်ဂှ်ဝွံ သၠဲတြးကၠုၚ်ဒၟံၚ် သီုကဵုလ္ပာ်မန်၊ ကရေၚ်တံ သိုက်က်ရ။

ညးမရေၚ်တၠုၚ်ဒၟံၚ်ပရေၚ်မန်မွဲတၠဂှ် ဟိုတ်နူအကာဲအရာတံဏံတုဲ ပ္ဍဲကဵုကွာန်မန်တံဂှ် ဒၟါနူပရေၚ်ဂီုကၠီုတုဲ နူကဵုသၟဝ်ပၠတရဴဗော်ဍုၚ်မန်တၟိဒှ်ဒှ် ဂကောံရပ်လွဟ်ကောန်ဍုၚ်အရၚ်တၞဟ်သ္အာၚ်မွဲမွဲဂကောံတံဒှ်ဒှ် သွက်ဂွံသၠဲပ္တိတ်ဇြဟတ်ဒပ်ဂှ် ဒှ်ကိစ္စထေက်ကဵုဒးကၠောန်ရောၚ် သ္ၚဳဂၠိပ်လဝ်ရ။

“ပရေၚ်ဗ္တိုက်ဂြာတ်ဗုမ်တံ ပတေၚ်ဂြတ်ပရေၚ်ဂီုကၠီုတံ နွံဒၟံၚ်တၟာဂလိုၚ်ဂှ် ပ္ဍဲကဵုကွာန်မန်တံဂှ်လေဝ် လ္ဂောံကဵုပရေၚ်ဂီုကၠီုတုဲ နူကဵုဗော်ဍုၚ်မန်တၟိ သ္ကိုပ်သ္ကတုဲဒှ်ဒှ် ဂကောံရပ်လွဟ်ကောန်ဍုၚ်အရၚ်တၞဟ်ဟ်တံ မွဲမွဲဂကောံ က္ဍိုက်ပ်တုဲဒှ်ဒှ် ညအ်ဂှ် သွက်ဂွံသၠဲပ္တိုန်ဇြဟတ်ဒပ်ညးတံ ဟွံသေၚ်မ္ဂး ပရေၚ်ဂီုကၠီုတံဂှ် ထေက်ကဵုဒးကၠောန်ရောၚ် ညာတ်သာ်ဏံတုဲ ညးတံကၠောန်လဝ်ဏောၚ် ထေၚ်ကေတ်ရ။ နွံမွဲဂှ်တှ်ေ ရေၚ်တၠုၚ်သာ်ဏံမ္ဂး အဓိကဂှ် ဒဒှ်မစိုတ်လုပ်စ ညးဍုၚ်ကွာန်တံရဏောၚ်“ သာ်ဝွံ သ္ဂးရ။

ဂကောံဒပ်ရပ်လွဟ်ကောန်ဍုၚ်အရၚ်ဗွဲမဂၠိုၚ်ဝွံ ပွမပ္ကောံပ္ကေဝ်ကောန်ဒပ်တံကီု ဂလိုၚ်ပ္တိုန်ကောန်ဒပ်တံကီု ကိစ္စတံဏံဂှ် ဒှ်လၟေၚ်ဒဒှ် ကၠောန်ဒၟံၚ်ဇၟာပ်ပ်ဂကောံရတုဲ ကံၚ်ဇြဳပၞာန်ဂှ်လေဝ် ဟိုတ်နူပကောံပကေဝ်ဒၟံၚ် ညးဍုၚ်ကွာန်တံ နွံဒၟံၚ်ဂှ်ရ နကဵုဗော်ဍုၚ်မန်တၟိ ကၠောန်လဝ် နကဵုတၚ်ရန်တၟံ မိက်ဂွံသၠဲပ္တိုန်ဇြဟတ်ဒပ် လအာတုပ်သာ်ဏံကီုဂှ် ညးဟီုတဴလဝ် လညာတ်ညးရ။

နကဵုသြၚ်လောန်တိုၚ်(မ်) သွက်ဂွံဒက်ဂကောံစဵုဒၞါ ပ္ဍဲကဵုကွာန် မၞုံအပ္ဍဲသၟဝ်အုပ်ဓုပ်ဗော်ဍုၚ်မန်တၟိတံဂှ် ကိစ္စကံက်သြန် သွက်ဂွံရာန်လွဟ်တံပါလုပ်ဂှ် စပ်ကဵုဒက်ဂကောံပျဳတုသေတ်ဂှ်တုဲ ဆက်လဝ်ဖုၚ် ဇရေၚ်ညးမၞုံတာလျိုၚ် ကေၚ်ကာအပ္ဍဲဍုၚ်ဗော် နာဲဗညာလဴ ဟွံအောန်နူကဵု ၅ ဝါကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။

ဗော်ဍုၚ်မန်တၟိဝွံ ပ္ဍဲကဵုလက်ထက် ဒဝ်အံၚ်သာန်သုကျဳ က္ဍိုက်ပ်ဂှ် မွဲစွံကဵုဗော်သွးဒဳမဝ်ကရေတ်တေတ်လာဟူ (LDU) ဂှ် ဒှ်ဂကောံရပ်လွဟ်ကောန်ဍုၚ်အရၚ် မပါလုပ်ထ္ပက်လဝ်စၟတ်တဲ ပ္ဍဲကဵုလိက်ကသုက်ဒေါအ်ပန်ပှော်အလုံဍုၚ် NCA မွဲရ။

ဆ္ဂး အပ္ဍဲကာလသီအဝဵုဏံ ဗော်ဍုၚ်မန်တၟိ မသောၚ်ကလးအာ ပြသၞာပရေၚ်ဍုၚ်ကွာန် နကဵုနဲကဲပရေၚ်ဍုၚ်ကွာန်ဂှ်ဝွံ အကြာညးဍုၚ်ကွာန်မန်တံ မဒစဵုဒစးဒၟံၚ်ဂှ် အာစိုပ်သဳကၠဳလဝ် ပရေၚ်ၜိုဟ်လလမ် ကုကံၚ်ဇြဳပၞာန် စဵုကဵု ၆ ဝါရ။

ဥက္ကဌဗော်ဍုၚ်မန်တၟိ နာဲဟံသာဂှ် ပ္ဍဲကဵုပေါဲဗ္တိုက်ထပိုတ်ရိုဟ်ကၞက် သၞောတ်တၠအဝဵုပၞာန်ဂှ် ယဝ်ရဂကောံရပ်လွဟ်ကောန်ဍုၚ်အရၚ် EAO တံ ပါလုပ်သီုဖအိုတ်မ္ဂး ညးတံလေဝ် ပါလုပ်ဗ္တိုက်အာဏောၚ်ဂှ် ပ္ဍဲကဵုဂိတုဂျောန် တုဲကၠုၚ်တေံ သှ်ကဵုလဝ်ကဏ္ဍသၟာန်သၟုက် ကုဌာန်ပရိုၚ်မန်ဗၠးၜးရ။

ပရိုၚ်−သြၚ်လောန်တိုၚ်(မ်)

ဗီု−Social Media