နေဗျဳဒဝ်၊ နဝ်ဝေမ်ဗာ ၂၄
သွက်ဂွံယိုက်ဂၠေၚ် ပ္ဍဲကဵုဒၞါဲကဆံၚ်ဌာနန္တရသၠးဒၟံၚ် ပ္ဍဲဌာနက္ဍိုက်ပ်ပရေၚ်ထတ်ယုက်ညးဍုၚ်ကွာန်တံဂှ်တုဲ ခါန်ကၞက်လဝ် သ္ကိုပ်ဗိုလ် ကေုာံ သၞာဲဒဴဒပ်ပၞာန် ၂၄ တၠ ပါလုပ်သီုကဵု ဒုသ္ကိုပ်ဗိုလ်ဇၞော် ဒပ်ကံၚ်ဇြဳပၞာန်မွဲတၠဂှ် ဂွံတီကေတ် အတိုၚ်ဂလာန်ကံၚ်ဇြဳပၞာန်တံရ။
လ္ဂောံကဵုတၚ်လလောၚ်တြးဍုၚ်ဗၟာ ပ္ဍဲဂိတုနဝ်ဝေမ်ဗာ ၁၇ ဂှ်မ္ဂး ဒုသ္ကိုပ်ဗိုလ်ဇၞော် ထူအံၚ်ဝေန်ဂှ် ခါန်ကၞက်လဝ် ကဆံၚ်သ္ကိုပ်စၞောန်ပ္ညုၚ် ပ္ဍဲကဵုရုၚ်ဂဥုဲညးဍုၚ်ကွာန်နေဗျဳဒဝ်၊ သ္ကိုပ်ဗိုလ်သှ်ေတံကဵု ဗိုလ်ဇၞော်တံဂှ် ခါန်ကၞက်လဝ် အထံက်သ္ကိုပ်စၞောန်ပ္ညုၚ်၊ အ္စာဂဥုဲလွဳယဲဗွဲတၟေၚ် ကေုာံ ကဆံၚ်သၞာဲဒဴက္ဍိုက်ပ် ဌာနက္ဍိုက်ပ်ပရေၚ်ထတ်ယုက်တံရ။
တုဲကၠုၚ် ပ္ဍဲဂိတုသေပ်တေမ်ဗာတေံဂှ်လေဝ် ပြံၚ်လှာဲပအပ်ကဵုလဝ်တာလျိုၚ် ကုသၞာဲဒဴ နူကဵုဒပ်ပၞာန် ၁၀ တၠ ပ္ဍဲကဵုဌာနဝန်ဇၞော်လ္ပာ်အရာပ်ပိ နဒဒှ်ကဆံၚ်အထံက်မာန်နေဂျာ ကေုာံ သၞာဲဒဴက္ဍိုက်ပ်တံ နွံလဝ်ရ။
သၞာဲဒဴနူကဵုလ္ပာ်ဒပ်ပၞာန်တံ ဆုဲပြံၚ်ကၠုၚ် လ္ပာ်ဌာနဆေၚ်စပ်လ္ပာ်အရာပ်တံဂှ်ဝွံ ထ္မံက်ရုပ်ရဴ သၞောတ်ဗျူရိုဝ်ကရေဇြဳပၞာန် တၠအဝဵုပၞာန်တံတုဲ ဒှ်အစဳဇန်သ္ဂောံအုပ်ဓုပ်အာ ညးဒုၚ်ကာတံ နကဵုအသံအမိၚ်တံရောၚ်ဂှ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ် ပါ်ပါဲလဝ်ရ။
“ပ္ဍဲဒၞါဲထ္မံက်ရုပ်ရဴ မူဝါဒပဝ်လဇြဳ တၠအဝဵုပၞာန်တံဂှ် ညံၚ်ရုပ်ရဴဂွံမံက်ကၠုၚ် ဍေံတံ (သၞာဲဒဴပၞာန် မပြံၚ်ကၠုၚ်ကဆံၚ်ဂမၠိုၚ်) ဂှ် ဒှ်ဂကောံဇြဟတ် ဘိုၚ်ထ္မံက်ကဵုရုပ်ရဴတံရ။ ဗျူရိုဝ်ကရေဇြဳ မၞုံဒၟံၚ်တုဲတုဲတံဂှ် စုတ်ကၠေံပၞာန်တုဲ ပၠောပ်ကၠုၚ်သၞောတ်ဗျူရိုဝ်ကရေဇြဳပၞာန်ရ။ မိက်ဂွံသ္ဂးဂှ် အပ္ဍဲကဵုဌာနမဆေၚ်စပ်တံဂှ် အုပ်ဓုပ် နကဵုအသံအမိၚ်တံတုဲ ဍေံတံ ဍဵုဍိုက်အာ ညးဒုၚ်ကာတံ နကဵုအမိၚ်တံဏံရောၚ်” ဂှ် သ္ဂးရ။
သၞာဲဒဴလ္ပာ်ဒပ်ပၞာန်တံဂှ်ဝွံ အပ္ဍဲကာလသီအဝဵုဏံ ပြံၚ်လှာဲကၠုၚ်လွေဟ် ကေတ်ကၠုၚ်ဒၞါဲ ပ္ဍဲဌာနလ္ပာ်အရာပ်တံဂှ် သၠုၚ်တိုန်ကၠုၚ်ဒၟံၚ်ဂှ် ညးလ္ၚတ်သ္ၚဳဂၠိပ်တံ သ္ဂးအိုတ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ၜိုတ်က္ဍစိုပ် ပ္ကောံပ္ကေဝ်ဂွံလဝ်တံဂှ်မ္ဂး အပ္ဍဲကာလသီအဝဵုပွိုၚ်ၜါသၞာံပြၚ်ဏံ သၞာဲဒဴဒပ်ပၞာန် ဟွံအောန်နူကဵု ၁၆၀ ဆုဲပြံၚ်ကၠုၚ် ဇရေၚ်ဒၞါဲဇၞော်သ္ကိုပ် ဌာနလ္ပာ်အရာပ်မဆေၚ်စပ်တံရ။
ပ္ဍဲအရာဆုဲပြံၚ် ဌာနလ္ပာ်အရာပ် ကံၚ်ဇြဳပၞာန်တံဂှ် ကဵုကၠုၚ်ဒၞါဲ ကုကဆံၚ်သ္ကိုပ်ဗိုလ်ဇၞော်တံ စဵုကဵုသ္ကိုပ်စၞောန်ပ္ညုၚ်ဂှ်ကီု၊ ဒုသ္ကိုပ်ဗိုလ်ဇၞော်ဂှ် ဒုသ္ကိုပ်စၞောန်ပ္ညုၚ်၊ ကဆံၚ်သ္ကိုပ်ဗိုလ်ဂှ် အထံက်သ္ကိုပ်စၞောန်ပ္ညုၚ်၊ ကဆံၚ်ဗိုလ်ဇၞော်ဂှ် ကဵုကၠုၚ်ဒၞါဲ ဒဵုကဵုကဆံၚ်သၞာဲဒဴက္ဍိုက်ပ်တံဂှ် နွံဒၟံၚ်ရ။
အတိုၚ်တၚ်ထ္မံက်ထ္ၜး တၚ်လလောၚ်တြးဍုၚ်ဗၟာတံဂှ်မ္ဂး သၞာဲဒဴဒပ်ပၞာန်တံ ဆုဲပြံၚ်ကၠုၚ် လ္ပာ်အရာပ်တံဂှ် စနူကဵုကဝ်မယှေန်ပေါဲရုဲမာဲကၟိန်ဍုၚ်၊ ဌာနဝန်ဇၞော်ပရေၚ်ပညာ၊ ပရေၚ်ထတ်ယက်၊ ပရေၚ်သၠာဲဂတးဗၞိက်၊ တိုက်သြန်ပရေၚ်ပိုန်ဒြပ်ဍုၚ်ဗၟာတံသၟးဟွံက ဆုဲပြံၚ်ခါန်ကၞက်လဝ် သီုကဵုဌာနဝန်ဇၞော်ပၟိက်ဇၞော်တံရ။
ပြံၚ်လှာဲကဵုကၠုၚ်တာလျိုၚ် ကုသၞာဲဒဴဒပ်ပၞာန်တံ ပ္ဍဲကဵုဌာနလ္ပာ်အရာပ်တံဂှ်ဝွံ ထ္မံက်ဒၟံၚ်ရုပ်ရဴ ညံၚ်သၞောတ်အုပ်ဓုပ် ဒပ်ပၞာန်အုပ်ဓလီု ဂွံခိုၚ်ကၠိုက်ကၠုၚ်ဏောၚ်ဂှ် ညးခါတ်အကာဲတံ သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI
sanlontai