ပ္ဍဲဍုၚ်ဘာအၚ် ကံၚ်ဇြဳပၞာန် သၠုၚ်ပ္တိုန်လဝ် ပရေၚ်ဂီုကၠီု

ဘာအၚ်၊ နဝ်ဝေမ်ဗာ ၂၅

ဟိုတ်နူပေါဲဗ္တိုက် မက္တဵုဒှ်ဒၟံၚ် အလုံဍုၚ်တံဂှ်တုဲ ပ္ဍဲကဵုဍုၚ်ဘာအၚ် တွဵုရးကရေၚ်ဂှ်လေဝ် ဒပ်ကံၚ်ဇြဳပၞာန် ဂလိုၚ်ပ္တိုန်ဂီုကၠီုဖျေံလဝ်တုဲ သာတုဲကၠောန်သ္ပကၠုၚ် ပရေၚ်စၟဳတ်တံ လ္တူနူကဵုကၠာတေံဂှ် ဂွံတီကေတ် အတိုၚ်ဂလာန် ညးဒေသတံရ။

တွဵုရးကရေၚ် ပ္ဍဲပွိုၚ်ဍုၚ်ကအ်ကြိက်၊ ပွိုၚ်ဍုၚ်လှာဒကှ်တံဂှ် ပေါဲဗ္တိုက်အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံမဟာမိတ် ဒပ်ပၞာန်ဗၠးၜးကောန်ဂကူကရေၚ် KNLA တံ က္တဵုဒှ်ဒၟံၚ်ရ။

ပေါဲဗ္တိုက်တံဏံဝွံ ဂွိၚ်ဖေက်ကၠောံထၞာန်ကၠုၚ် စဵုကဵုလ္တူဍုၚ်ဘာအၚ်ဂှ်ရ လ္ပာ်ဒပ်ကံၚ်ဇြဳပၞာန်တံ ဂလိုၚ်ပ္တိုန်ဇြဟတ်ဒပ်ဖျေံလဝ် ပ္ဍဲကဵုပါၚ်ဂၠံၚ်လုပ်တိတ်တံဂှ်တုဲ ပွမဂၠိုက်ဂၠါဲစၟဳတ် ကုညးဍုၚ်ကွာန်အာကၠုၚ်တံဂှ် ကၠောန်ၜိုတ်ဒၟံၚ်ရ။

အတိုၚ်ဂလာန်ညးဒေသလ္တူဍုၚ်တံဂှ်မ္ဂး ဒပ်ကံၚ်ဇြဳပၞာန်ဝွံ စၟဳတ်ဒၟံၚ် ဖုၚ်၊ ကွဳလိုန်ဓာတ်၊ ထိုၚ် ညးမလုပ်စိုပ်ကၠုၚ်အပ္ဍဲဍုၚ်တံဂှ်တုဲ မၞိဟ်ဟွံသၚ်္ကာတံဂှ် ရပ်ဒက်စၟဳတ်ဒၟံၚ်တံ ကၠောန်ၜိုတ်ဒၟံၚ်ရောၚ် သ္ဂးရ။

သ္အာၚ်နူဂှ်ပၠန် မ္ၚးနူကဵုရုၚ်အလဵုအသဳဍုၚ်ဘာအၚ်၊ ကၠတ်ထဝ် ကေုာံ ရုၚ်မဆေၚ်စပ်တံဂှ် ပ္ဍဲကဵုပွဳပွူ ဗ္ဒါဲဌာန်ဂအုပ်ကံၚ်ဇြဳပၞာန် ၝောံဒပ် (၂၂) ဂှ်လေဝ် ဖျေံလဝ်ဇြဟတ်ဒပ် ဗွဲမဂၠိုၚ်ဂၠေၚ်တုဲ ဒစးဒုၚ်ပလေဝ်ပလေတ်လဝ် သွက်ပရေၚ်ပၞာန်တံဂှ် ဂၠိုက်ဂၠါဲဂွံတီကေတ်ရ။

ပ္ဍဲကဵုသၞေဟ်ကၚ်စၟဳတ်ဒဒန်သၚ်လောန် မၞုံလ္တူဂၠံၚ်ကာ မြဝတဳ−ဘာအၚ်−လ္ဂုၚ် မဒှ်ဂၠံၚ်အဓိက ကူသာန်သွံရာန်ဗၞိက်ပယျဵုတံဂှ်လေဝ် ဒပ်ကံၚ်ဇြဳပၞာန် ပတေၚ်ဂြတ်လဝ် ပရေၚ်စၟဳတ်သၟာန်သၟုက်တံရောၚ်ဂှ် ဂွံတီကေတ် ဇရေၚ်ညးအာတရဴတံရ။

ဍုၚ်ဘာအၚ်ဝွံ နွံဒၟံၚ် ပ္ဍဲတိဍာ်ခရိုၚ်ဘာအၚ် ဒပ်မဟာ ၇ တိဍာ်အုပ်ဓုပ် KNU ဂှ်တုဲ ပ္ဍဲခရိုၚ်ဘာအၚ်မွဲရဟေၚ် အကြာဒပ်ကံၚ်ဇြဳပၞာန်ကဵု ဒပ် KNLA တံ က္တဵုဒှ်ပေါဲဗ္တိုက်ဟွံမွဲတုဲ ညိၚ်ဝတ်ဒၟံၚ်ဂှ် ဂွံဆဵုကေတ်ရ။

ပရိုၚ်−သြၚ်လောန်တိုၚ်(မ်)

ဗီု−ချာန်နေဝ်တြးဝါဒကံၚ်ဇြဳပၞာန်