သ္ကိုပ်က္ဍိုက်ပ်ဒပ်ကျာသေံ ကေုာံ က္ဍိုပ်သ္ကိုပ်ပၞာန်တံ ဆဵုဂဗညးသ္ကအ်ဂှ် ဒက်ပ္တန်ပရေၚ်ဆက်ဆောံ အကြာကၟိန်ဍုၚ်သၞောတ်တုပ်တံရောၚ်ဂှ် ပါ်ပါဲ

နေဗျဳဒဝ်၊ နဝ်ဝေမ်ဗာ ၂၅

သ္ကိုပ်က္ဍိုက်ပ်ဒပ်ကျာဨကရာဇ်သေံ ကေုာံ က္ဍိုပ်သ္ကိုပ်ပၞာန်တံဝွံ သဳကၠဳလဝ် အကာဲအရာသ္ဂောံရေၚ်တၠုၚ်သၠုၚ်ပ္တိုန်အာ ပရေၚ်ပံၚ်တောဲ ကေုာံ ပရေၚ်ဍုက်ကေဝ်မၞုံဒၟံၚ် အကြာဒပ်ပၞာန်ၜါဍုၚ်တံဂှ် နူကဵုပလက်ဝှမ် တြးဝါဒဒပ်ပၞာန်တံ လလောၚ်ပ္တိတ်လဝ်ရ။

က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် ပ္ဍဲဂိတုနဝ်ဝေမ်ဗာ ၂၃ တေံ ဒုၚ်တဲဆဵုဂဗလဝ် ကုဂကောံညးစၞး သ္ကိုပ်က္ဍိုက်ပ်ဒပ်ကျာဨကရာဇ်သေံ Air Chief Marshal Punpakdee Pattanakul သ္ကိုပ်သ္ကဂှ်ရ။

ပ္ဍဲကဵုပရေၚ်ဆဵုဂဗဏံဂှ် အဖဝ်က္ဍိုပ်သ္ကိုပ်ပၞာန်ဂှ် နူကဵုရုၚ်သ္ကိုပ်က္ဍိုက်ပ်ကာစဵုဒၞါ ဒုသ္ကိုပ်ဗိုလ်ဇၞော် ယျေဝ်ဝေန်ဥူ၊ သ္ကိုပ်က္ဍိုက်ပ်ဒပ်ကျာ သ္ကိုပ်ဗိုလ်ဇၞော် ထောန်အံၚ် ကေုာံ သၞာဲဒဴဒပ်ပၞာန်ဂမၠိုၚ် တိုန်စိုပ်လဝ်တုဲ လ္ပာ်သေံဂှ်တှ်ေ ပါလုပ်သီုကဵုသ္ကိုပ်က္ဍိုက်ပ်ဒပ်ကျာဨကရာဇ်သေံဂှ် သၞာဲဒဴဒပ်ပၞာန်ဂမၠိုၚ် ကေုာံ ဇမၞော်ကလုတ်ပၞာန် ဒပ်ကျာဨကရာဇ်သေံ စပ်ကဵုဍုၚ်ဗၟာတံ တိုန်စိုပ်လဝ်အိုတ်ရ။

နကဵုကံၚ်ဇြဳပၞာန် ပ္ဍဲကဵုအကာဲအရာ ဟွံကလိဂွံဒၟံၚ်ပရေၚ်ထံက်ဂလာန် ဍုၚ်သ္အာၚ်တံဂှ် ဒက်ပ္တန်ဒၟံၚ် ပရေၚ်ဆက်ဆောံညံၚ်သ္ဂောံခိုဟ် ကုဍုၚ်သေံ ဒပ်ပၞာန်ထ္ၜးစဒဳမဝ်ကရေဇြဳတုဲ မပါလုပ်ဒၟံၚ် ပ္ဍဲကဵုပရေၚ်ဍုၚ်ကွာန် သၞောတ်တုပ်ရောၚ်ဂှ် ညးချဳဒရာၚ်ကတိုၚ်ကၟဟ် ပရေၚ်ဒဳမဝ်ကရေဇြဳတံ ထံက်ထ္ၜးလဝ်အိုတ်ရ။

ကိုဝ်မေန်လွေန်ဥူ နူကဵုကမ္မတဳဗကပ်ဗဗေၚ် ချဳဒရာၚ်ပရေၚ်ဒဳမဝ်ကရေဇြဳ ခရိုၚ်ထဝါဲဂှ် နကဵုကံၚ်ဇြဳပၞာန် အခိၚ်ကာလကၠၚ်ဟဳဒၟံၚ် အကြာဗွိုၚ်ဍုၚ်သ္အာၚ်တံဂှ် နူကဵုလ္ပာ်က္ဍစိုပ်ဂှ် ကၠောန်ဒၟံၚ် နကဵုဗီုပြၚ် သ္ဂောံဂွံပရေၚ်ဆက်ဆောံတံရောၚ် သ္ၚဳဂၠိပ်လဝ်ရ။

“အဓိကဂှ်တှ်ေ က္ဍိုပ်သ္ကိုပ်ပၞာန်ဍုၚ်ဗမာတံ အခိၚ်ကၠၚ်ဟဳဒၟံၚ်ဂှ် လ္ပာ်ဍေံတံ ညးဂှ်ပါမာန်ရော၊ ကုဍုၚ် မပါလုပ်လ္ပာ်ဍေံတံမာန်တံဂှ် ၜိုတ်လ္ပာ်သ္ပမာန်ဂှ် လုပ်ၜေတ်တုဲ ဗီုပြၚ်ပရေၚ်ဆက်ဆောံနွံဂှ် ကၠောန်ဒၟံၚ်ရောၚ် ညာတ်ရ။ ဍုၚ်သေံဂှ်ဟီုတှ်ေ ထံက်ပၚ်ဒၟံၚ် ဍုၚ်ဗၟာ နကဵုဂၠံၚ်ဍာန်လုပ်သၞောဝ်ဂှ်မွဲဗီု၊ ဟွံလုပ်သၞောဝ်ဂှ်မွဲဗီု နူကဵုလက္ကရဴဂှ်တုဲ သွက်ဂကောံဇြဟတ်ဒဳမဝ်ကရေဇြဳ ပၠန်ဂတးပိုယ်တံဂှ်တှ်ေ သ္ကဵုဒှ်တဴ အခက်အခုဲရ“ သာ်ဝွံ သ္ဂးရ။

ပ္ဍဲကဵုပရေၚ်သဳကၠဳ ကံၚ်ဇြဳပၞာန်ကဵု ဒပ်ကျာသေံတံဂှ် အကာဲအရာ သ္ဂောံပံၚ်တောဲရေၚ်တၠုၚ်အာ အကြာဒပ်ပၞာန်ၜါဍုၚ်ဂှ်ကီု အစဳဇန်ဗလးအာ ဂကောံယန်သၞာၚ် ကေုာံ ဂကောံဝေၚ်ဇြဟတ်ဆာန်ကၟိန်ဒပ်ပၞာန်တံလေဝ် ပါလုပ်ရ။

သ္အာၚ်နူဂှ်ပၠန် သၞာဲဒဴကဆံၚ်သၠုၚ်လ္ပာ်ဒပ်ပၞာန်တံကဵု ကောန်ပၞာန်ဂမၠိုၚ်၊ ဂြောဝ်ဂတာညးတံဂမၠိုၚ် အာစိုပ်လၟေၚ်တရဴဆာန်ကၟိန်ညးသ္ကအ်တုဲ စပ်ကဵုကိစ္စ သ္ဂောံသၠုၚ်ပ္တိုန် ပရေၚ်ဆာန်ကၟိန်ဍုက်ကေဝ်တံဂှ်တုဲ သဳကၠဳသၠာဲဂတးလဝ်လညာတ်တံရောၚ်ဂှ် ကံၚ်ဇြဳပၞာန် လလောၚ်ပ္တိတ်လဝ်ရ။

ကြဴနူဒပ်ပၞာန်သီအဝဵုတုဲ ပ္ဍဲကဵုဍုၚ် မဆက်ဆောံဒၟံၚ် ကုကံၚ်ဇြဳပၞာန် လ္ဂောံကဵုပရေၚ်ကလုတ်တမာန်တံဂှ် ဍုၚ်သေံ၊ အိန္ဒိယ၊ ရုယှာ ကေုာံ ဍုၚ်ကြုက်တံရ နွံလဝ်တုဲ ကၟိန်ဍုၚ်တံဏံဂမၠိုၚ်ဝွံ ရန်ကဵုဒတုဲဖဵုဇကုတုဲ ရေၚ်တၠုၚ်ဒၟံၚ်ပရေၚ်ကလုတ်တမာန်တံရောၚ်ဂှ် ညးခါတ်အကာဲပရေၚ်ဍုၚ်ကွာန်တံ ထံက်ထ္ၜးလဝ်ရ။

အတိုၚ်လိက်ဒုၚ်စဳရေၚ် ဂကောံသုတေသန ဂကောံညာန်လေန်တေတ်ဂှ်မ္ဂး အလုံဍုၚ်မွဲ ပ္ဍဲသၞာံဏံ နူကဵုဂိတုဂျာန္နဝါရဳ စဵုကဵုဂိတုအဝ်ဂါတ် အပ္ဍဲပွိုၚ်ဒ္စါံဂိတုဂှ် ဟိုတ်နူပရေၚ်ဗ္တိုက်တရဴကျာ ဒပ်ကံၚ်ဇြဳပၞာန်တံတုဲ ညးဍုၚ်ကွာန်ကောန်အရာပ် ဗ္ဒါဲ ၃၇၀ ချိုတ်အာလဝ်ရောၚ် လလောၚ်ပ္တိတ်လဝ်ရ။

အပ္ဍဲပွိုၚ်ဒ္စါံဂိတုဂှ် ဒပ်ကံၚ်ဇြဳပၞာန်ဝွံ ကလိလောန်လဝ် ပရေၚ်ဗ္တိုက်တရဴကျာ ၄၇၈ ဝါတုဲ ဗွဲသရောပ်ဆောံကေတ်မ္ဂး မွဲတ္ၚဲ ကၠောန်သ္ပလဝ်ပရေၚ်ဗ္တိုက်တရဴကျာ ဗ္ဒါဲ ၂ ဝါတုဲ စမြိုၚ်ဘာသာ ၅၈ ၊ ဘာဗ္တောန်လိက် ၃၃ မ၊ ရုၚ်ဂဥုဲဗ္ဒမ်ဂဥုဲ ၁၃ မ ဇီုကပိုက်လီုလာ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−MOI