ပ္ဍဲပရေၚ်ပန်ပှော်ဍုၚ်ရေဝ်ဂှ် ၜါလ္ပာ်ဇီုကပိုက်ဒးတံနွံ

ရေဝ်၊ နဝ်ဝေမ်ဗာ ၂၅

တွဵုရးဍုၚ်မန်၊ ဍုၚ်ရေဝ် ပ္ဍဲကဵုအရာပ်ယာန်မျဵုအံၚ် ပ္ဍဲကဵုပရေၚ်ပန်ပှော် မက္တဵုဒှ်လဝ် အကြာဒပ်ကံၚ်ဇြဳပၞာန်ကဵု PDF တံဂှ် ၜါလ္ပာ်ဇီုကပိုက်ကလိဂွံဝပ်တံ နွံလဝ်ဂှ် ဂွံတီကေတ် အတိုၚ်ဂလာန်ညးဒေသတံရ။

ပ္ဍဲဂိတုနဝ်ဝေမ်ဗာ ၂၃ အခိၚ်လဒေါဝ်တ္ၚဲ ၜိုတ် ၁၂ နာဍဳ အပ္ဍဲဍုၚ်ရေဝ်ဂှ် PDF ၜါတၠ စိုပ်ဒၟံၚ်ရောၚ် ဂွံပရိုၚ်သာ်ဏံတုဲ ဒပ်ကံၚ်ဇြဳပၞာန် အခိၚ်ကၠုၚ်စိုပ်ရပ်ဒက်ပန်ပှော်ဂှ် ပရေၚ်ပန်ပှော်ၜါလ္ပာ် က္တဵုဒှ်လဝ်ရ။

အပ္ဍဲပရေၚ်ပန်ပှော်ဏံဂှ် အကြာပ်ဒပ် နူကဵုဒပ်ကံၚ်ဇြဳပၞာန်မွဲတၠပါလုပ်ဂှ် ၃ တၠ ကလိဂွံလဝ်ဝပ်တုဲ ကောန်သ္ဂံၚ် PDF မွဲတၠလေဝ် ဒးအာမကမ် ပ္ဍဲတဲတုဲ ကလိဂွံလဝ်ဝပ်ရ။

အပ္ဍဲပရေၚ်ပန်ပှော် ဒပ်ကံၚ်ဇြဳပၞာန်ဂှ် ကောန်သ္ဂံၚ် PDF ၜါတၠ ကေတ်ကွဳလိုန်ဓာတ်ဟွံဂတာပ်မွဲသာ် ဒးဂြိပ်ဒဴပါဲလေတ်လဝ်ဂှ် ဂွံတီကေတ်ရ။

ကြဴနူလၟေၚ်ဒဒှ်ဂှ်တုဲ ဒပ်ကံၚ်ဇြဳပၞာန်ဝွံ လုပ်ဂၠိုက်ဂၠါဲစၟဳတ်လဝ် အပ္ဍဲအရာပ်ယာန်မျဵုအံၚ် နကဵုဇြဟတ်လၟိဟ်မဂၠိုၚ်ဂၠေၚ်တုဲ ကၟာတ်လဝ် သီုကဵုဂၠံၚ်လုပ်တိတ်ဍုၚ်ဂှ်ရ။

အပ္ဍဲပရေၚ်ကၟာတ်လဒဵုရပ်ဒက် ဒပ်ကံၚ်ဇြဳပၞာန်ဂှ် ကောန်သ္ဂံၚ် PDF ၜါတၠ ဒးဒုၚ်ရပ်ဂွံ နွံ၊ ဟွံမွဲဂှ် နကဵုသြၚ်လောန်တိုၚ်(မ်) ဆက်ဂၠိုက်ဂၠါဲဒၟံၚ်ဖိုဟ်ရ။

ကြဴနူပရေၚ်ပန်ပှော်ဂှ်တုဲ ပ္ဍဲဂိတုနဝ်ဝေမ်ဗာ ၂၄ ဂှ် ပွမဂၠိုက်ဂၠါဲကၟာတ်လဒဵုစၟဳတ်အပ္ဍဲကဵုဍုၚ်တံ ဟွံမွဲရကီုလေဝ် မၞိဟ်အာကၠုၚ်အောန်စှ်ေအာဂှ် ဂွံတီကေတ် နူကဵုညးဒေသလ္တူဍုၚ်တံရ။

ဟိုတ်နူပရိုၚ် ထ္မံက်အာပေါဲဗ္တိုက်သီဍုၚ် ကုဍုၚ်ရေဝ် တွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန်ဂှ်တုဲ ဒပ်ကံၚ်ဇြဳပၞာန် သၠုၚ်ပ္တိုန်လဝ် ပရေၚ်ဂၠီုကၠီုရ။

ပရိုၚ်−သြၚ်လောန်တိုၚ်(မ်)

ဗီု−Social Media