မတ်မလီု၊ နဝ်ဝေမ်ဗာ ၂၅
ၜဵုစဲတ္ၚဲ တိတ်နူတွဵုရးဍုၚ်မန်တံဂှ် သွက်ဂွံပလံၚ်ပ္တိုန်သွံတြး ဍုၚ်ကိုဝ်ရဳယျာသၠုၚ်ကျာကဵု ဂျပါန်တံဂှ် ဗွဲကိုပ်ကၠာဏံ ပလံၚ်လဝ် ဗီုပြၚ်ၜဵုဂမျိုၚ်တံကၠာဂှ် တၠကမၠောန်ၜဵုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၜဵုဂမျိုၚ် မပလံၚ်လဝ်တံဂှ် ဍုၚ်မဆေၚ်စပ်ဂမၠိုၚ် မ္ၚးနူကဵုစၟဳတ်ဍာ်ဒကေဝ်ကီု၊ တော်လၟိဟ်ပမာဏ နွံပၟိက်တံဂှ်ကီုဂှ် ဒုၚ်သ္ဇိုၚ်ကဵု လ္တူခရိတ်အိုတ် ကေုာံ ဂၠံၚ်တရဴသ္ဂောံပလံၚ်ပ္တိုန်တံဂှ်တုဲ သွက်ဂွံပၠောပ်ပ္တိုန်ၜဵုဂမျိုၚ်မာန်ဂှ် သဳကၠဳဒၟံၚ်ရ။
တၠပညာၜဵုမွဲတၠဂှ် တၚ်နွံပၟိက်ၜဵု ကိုဝ်ရဳယျာသၠုၚ်ကျာဂှ် ၜိုန်ရပလံၚ်ကဵုပေၚ်ၚ်ဟွံမာန်ကီုလေဝ် လၟုဟ်ဂှ် ဒှ်သဘဴဆၜိုတ်စမ်ရံၚ်ညိညရနွံတုဲ ဍုၚ်ဂျပါန်ဂှ်လေဝ် သ္ဂောံစမ်ၜတ်ဍာ်ဒကေဝ်တုဲ ပလံၚ်ကဵုလဝ်ရောၚ် ဟီုရ။
“ဍုၚ်ကိုဝ်ရဳယျာဂှ်တှ်ေ ဍုၚ်ညးတံနွံပၟိက်ဂှ် လျိုၚ်တာန် ၜိုတ် ၇ ပြကောဋိကိုဋ် နွံဏောၚ်။ ဍုၚ်သ္အာၚ်တံ ပၠောပ်ပ္တိုန်ဂှ်တှ်ေ လျိုၚ်တာန် ၜိုတ် ၃ ပြကောဋိကိုဋ်ပြၚ် နွံဏောၚ်။ ပမာဏဏံဂှ်တှ်ေ ပ္ဍဲကဵုဍုၚ်ဗၟာဂှ် ဇြဟတ်ပ္တိတ် အလုံဍုၚ်မွဲရဂှ် မတ္ထရေတ်တာန် ၄ ကိုဋ်ဟွံပေၚ်ပုဟ်။ ဆ္ဂး ဒၞါဲဏံဂှ်တှ်ေ တၚ်နွံပၟိက်ညးတံကဵု ၚုဟ်ပ္တိုန်က္ၜၚ်တံဂှ် နွံဒၟံၚ်ဏီဏောၚ်။ ၄၀ တာန်ဂှ်တှ်ေ ထ္ပက် (MOU) တုဲ ဖန်ဇန်ဒၟံၚ် ကဆံၚ်သ္ဂောံပလံၚ်ဂှ်ယျ။ ဂျပါန်ဂှ်လေဝ် ပလံၚ်ဒၟံၚ်ညိညိ။ ၂၀ တာန် ပိုယ်တံ ပလံၚ်စမ်ရံၚ် ဂျပါန်ဂှ်ဟီုဂှ် တော်ကဵုလျိုၚ်ပသာၜဵုဂှ်တှ်ေ နွံစ ၁၂၀၀၀ ရဏောၚ်။ ညအ်ဂှ် ပိုယ်တံ ပလံၚ်စမ်လဝ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ၜဵုဂမျိုၚ် ပလံၚ်စမ်လဝ်တံဂှ် ဍုၚ်လ္ပာ်တေံ ဒုၚ်တဲမှဟေၚ် ဆက်တုဲသ္ဂောံပလံၚ်အာဂှ် ဒးသဳကၠဳအာဏောၚ်မဒှ်တုဲ တန်တဴကဵု လ္တူၜဵုဂမျိုၚ်တိတ်ဂှ်တုဲ သွက်ဂွံပလံၚ်ပ္တိုန်မာန်ဂှ် သ္ဂောံသဳကၠဳနွံဒၟံၚ်ရောၚ် ညးဆက်ဟီုရ။
တၠကမၠောန်ၜဵုမွဲတၠဂှ် ယဝ်ရကိုဝ်ရဳယျာသၠုၚ်ကျာ ကေုာံ ဍုၚ်ဂျပါန်တံ ဒှ်ရာန်ၜဵုဂမျိုၚ်တံဂှ်မ္ဂး ဗွဝ်ဖျာခိုၚ်ၚ်ကၠိုက်က်မွဲ မံက်ကၠုၚ်မာန်ရောၚ် ဟီုဂးလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
တွဵုရးဍုၚ်မန်ဝွံ ၜဵုစဲတ္ၚဲတံဂှ် ကၠောန်ပ္တိတ်ဒၟံၚ်အဓိက ပ္ဍဲကဵုပွိုၚ်ဍုၚ်ဇြပ်ဗုကဵု ပွိုၚ်ဍုၚ်ရေဝ်တံတုဲ လၟေၚ်သၞာံ လျိုၚ်တာန်ၜဵု တိတ်ဒၟံၚ် ၄၀၀၀၀ ပြၚ်တုဲ ၜဵုတိတ်ကၠုၚ်တံဂှ် မ္ဒးရပ်စပ်ဒၟံၚ် ပ္ဍဲကဵုဗွဝ်ဖျာအပ္ဍဲဍုၚ်တံသၟးရ။
ကမၠောန်ၜဵုတံဝွံ အပ္ဍဲကာလသီအဝဵုဏံ ဟိုတ်နူကမၠောန်ကွတ်စက်မၞုံအပ္ဍဲဍုၚ်ဗွဲမဂၠိုၚ် ဒေါအ်ဇူကၠုၚ်ကီု၊ ကၠေၚ်စက်တံကီု ဟိုတ်နူခရိတ်အိုတ်နာနာ ၚုဟ်သၠုၚ်တိုန်ကၠုၚ် ဂၠိုၚ်ကဵုဆကီု၊ သီုကဵုရာသဳဥတုဖံက်ပၠန် မွဲဏှမွဲဏှတံဂှ်တုဲ ပ္ဍဲကဵုသၞာံတုဲတုဲကၠုၚ်တံဂှ် ဒးဆေၚ်လဝ်မုက် ကုကျဟောံဗြံတံရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai