ပေါဲပၞာန် ကုကြုက်ဂှ်ဝွံ သ္ဇက်ဒးရုဲစှ်ဟွံသေၚ်ပုဟ်ဂှ် လၟောဝ်ဒုသမ္မတထိုၚ်ဝါန် ဟီု

တိုၚ်ပေ၊ နဝ်ဝေမ်ဗာ ၂၄

လၟောဝ်ဒုသမ္မတ ဗော်ဂွံအဝဵုထိုၚ်ဝါန်ဂှ် ကောန်ဍေၚ်အဓိက သ္ဂောံဖအောန်ဖျေံ ပရေၚ်ကြံၚ်မ္ၚိုဟ်အပ္ဍဲဒေသဂှ်ဝွံ ဒှ်ပရေၚ်ဆက်စၠောံ တတ်ကၠောံကလိုဟ်ၜဳတံတုဲ ဒှ်ပၞာန်ကုကြုက်ဂှ်ဝွံ ဒဒှ်ရသ္ဇက်ဒးရုဲစှ်ဟွံသေၚ်ပုဟ်ဂှ် ပ္ဍဲဂိတုနဝ်ဝေမ်ဗာ ၂၃ တေံ ဟီုဂးလဝ်ရ။

ဍုၚ်ကြုက် မညာတ်မံၚ် ထိုၚ်ဝါန် နဒဒှ်တွဵုဒၞက်ညးတံဂှ်ဝွံ ဗွဲတၟေၚ် သွက်ဂွံပိုၚ်ပြဳ အဝဵုအပိုၚ်အခြာတုဲ လ္ဂောံကဵုပရေၚ်ပၞာန်ဂှ် သၠုၚ်ပ္တိုန်လဝ်ဇြဟတ်ဂရိုဟ်တံရ။

အပ္ဍဲသတ္တာဟဏံ နူကဵုဗော်တောတက်ဒဳမဝ်ကရေတ်တေတ် DPP လလောၚ်တြးလဝ် လၟောဝ်သမ္မတ လိုၚ်ချေန်တဳ မဂြိပ်ဒၟံၚ်ဂတ သ္ဂောံဒှ်က္ဍိုပ်သ္ကိုပ်တၟိ ကေုာံ ယှံၚ်ဘဳခေန် ကလုတ်အမေရိကာန်ဒယှ် ဍုၚ်ထိုၚ်ဝါန် နဒဒှ်ဒုသမ္မတရ။

ဍုၚ်ကြုက်ဂှ် ညာတ်ကေတ် လိုၚ် ကေုာံ ယှံၚ်တံ နဒဒှ်သၟာပါ်တိတ်တုဲ ပ္ဍဲဂိတုဨပရဴတုဲကၠုၚ်တေံ ကၠောန်သ္ပကၟာတ်လဒဵုကေတ်လဝ်အရေဝ် စဵုကဵုၜါဝါရ။

ညံၚ်ရဴညးတံကီု မိဿဟာဲဍုၚ်သ္အာၚ်တၞဟ်ဟ်တံဂှ်လေဝ် ဍုၚ်ကြုက် ကၟာတ်လဒဵုကေတ်လဝ်အရေဝ်ကီုဂှ် ယှံၚ် ဟီုဂးလဝ်တုဲ ညးဝွံ ဆက်ရေၚ်တၠုၚ်အာ အတိုၚ်ကတိကဝတ် စဵုဒၞါဒစဵုဒစးအာ ဒဳမဝ်ကရေဇြဳထိုၚ်ဝါန်ဏောၚ်ဂှ် ဟီုလဝ်ကဵု အ္စာပရိုၚ်ဂမၠိုၚ်ရ။

“သွက်ဂွံထ္မံက်ရုပ်ရဴ အကာဲအရာလၟုဟ်ဂှ် ကဵုလဝ်ကတိကဝတ်ဂှ်ရ ထပ်ဟီုတဴလဝ် တၚ်ဒတူလိုၚ်ပိုယ်တံ သ္ဂောံသဳကၠဳဆဵုဂဗ ကေုာံ သ္ဂောံနွံကဵုပွမကၠးမှးတံဂှ်ရ” သာ်ဝွံ ညးဟီုဂးလဝ်ရ။

ထိုၚ်ဝါန်ဂှ် သ္ဒးပ္တောံဗက် ဗီုပြၚ်ထံက်ဂလာန်ၜါဗော်အမေရိကာန် မညဳသာသၟဟ်န်တံဂှ်တုဲ သွက်ဂွံဂွံပရေၚ်ထံက်ဂလာန်အမေရိကာန်တံ သၠုၚ်တိုန်ကၠုၚ်ဂှ် ပၟိက်ဇၞော်ရောၚ် ညးဆက်ဟီုလဝ်ဏီရ။

အမေရိကာန်ဝွံ ၜိုန်ရပရေၚ်ဆက်ဆောံ ကုထိုၚ်ဝါန် ဗွဲမလုပ်သၞောဝ်ဟွံမွဲကီုလေဝ် သီုကဵုဒှ်ဍုၚ်ကဵုဇြဟတ်ဂၠိုၚ်အိုတ် မစၞောန်ပျးလဝ်သၞောဝ် သ္ဂောံကဵုနဲကဲ သွက်ဂွံစဵုဒၞါတ္ကအ်ဂှ်မွဲရ။

တၚ်ရေၚ်တၠုၚ် DPP ပ္ဍဲအရာစန်ဒက်မာဲ ပေါဲရုဲမာဲသမ္မတထိုၚ်ဝါန်ဂှ်ဝွံ ဒစဵုဒစးဒၟံၚ်ကဵု ဗော်ကူမေန်တာန် KMT၊ ဗော်ညးဍုၚ်ကွာန်ထိုၚ်ဝါန် TPP မဒှ်ဗော်ဒစဵုဒစးအဓိကၜါဏံဂှ်ရ။

Ref: CNA