ရေဝ်၊ နဝ်ဝေမ်ဗာ (၂၆)
အကြာပ်ဒပ်ဗၠာဲသၟိၚ် နူဗဒိုပ်လ္ပာ် ဗၠာဲသၟိၚ် ဍုၚ်ခေါဇာ ပွိုၚ်ဍုၚ်ရေဝ်မွဲတၠဂှ် သီုကဵုလွဟ်လက်နက်မကမ် လုပ်ကၠုၚ်စိုပ်ဗ္ဒဗ္ဒာဲလဝ်ရဂှ် ဒပ်ဒမၠုက်ဍုၚ်ရေဝ် YGF လလောၚ်တြးလဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၅) ရ။
အကြာပ်ဒပ်ဗၠာဲသၟိၚ် မေန်နောၚ်ဂှ် တ္ၚဲဏံ ပ္ဍဲအခိၚ်နူဂယးဏံ မွဲကရောံကဵု လွဟ် G3 မွဲဒကိုအ်၊ ဖျေဲမကမ် ၜါမ၊ မကမ် ၁၀၀ မ လုပ်ကၠုၚ်စိုပ်ဗ္ဒဗ္ဒာဲလဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
အတိုၚ်အကြာပ်ဒပ်ဗၠာဲသၟိၚ်မေန်နောၚ် ဟီုထ္ၜးလဝ်မ္ဂး ဟိုတ်နူဟွံမိက်ဆက်ယိုက်ဂၠေၚ်တာလျိုၚ် သၟဝ်တဲကံၚ်ဇြဳပၞာန်တုဲ သ္ပကၠုၚ်CDM သီုလွဟ်လက်နက်ရဂှ် ကောန်ဒပ်ဒပ်ဒမၠုက်ဍုၚ်ရေဝ်မွဲတၠဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
သွက်အကြာပ်ဒပ်ဗၠာဲသၟိၚ် လုပ်ကၠုၚ်သ္ပလဝ် CDM ဂှ် အကာဲအရာပရေၚ်စသုၚ်မံၚ်စံၚ် ကေုာံ ပရေၚ်ဂီုကၠီုတအ်ဂှ် နူလ္ပာ်ဒပ် YGF ကေတ်တာလျိုၚ် ရေၚ်တၠုၚ်ကဵုအာရောၚ်ဂှ်ဟီုလဝ်ရ။
ပရေၚ်အကြာပ်ဒပ်ဗၠာဲသၟိၚ်မေန်နောၚ် လုပ်ကၠုၚ်ဖျေံလဝ်လွဟ်ဏံ ပ္ဍဲမွဲကာလဒပ်ပၞာန်သီအဝဵုဏံ ကောန်ဒပ်ဗၠာဲသၟိၚ် မၞုံပွိုၚ်ဍုၚ်ရေဝ်မွဲတၠ လုပ်ကၠုၚ်ဖျေံလဝ်လွဟ် သီုလွဟ်လက်နက်မွဲစွံ ဒှ်အလန်ကိုပ်ကၠာအိုတ်ရ။
ဒပ်ဒမၠုက်ဍုၚ်ရေဝ် YGF ဂှ်မ္ဂး ကောန်ဒပ်ကံၚ်ဇြဳပၞာန်၊ ဗၠာဲသၟိၚ် ကေုာံ ကောန်ဒပ်ပၞာန်ညးဍုၚ်ကွာန် ထပ်ကၠုၚ်လုပ်စိုပ်ဖျေံလွဟ်တအ်ဂှ် ဒဒှ်ရဒုၚ်တဲ မၚ်ဒုၚ်တၠုၚ်ဒၟံၚ်ကီု သ္ပတံနူပရေၚ်ဂီုကၠီုဒှ်တံ ကေတ်အာတာလျိုၚ်ရောၚ်ဂှ် လလောၚ်တြးလဝ်ရ။
ပ္ဍဲဍုၚ်ရေဝ် လလောၚ်တြးလဝ်ပရေၚ်အုပ်ဓုပ်ပၞာန်ဂှ် ဟိုတ်နူပရိုၚ်ဂကောံဇြဟတ်ပၠန်ဂတးတအ် ချဳဒရာၚ်ပေါဲဗတိုက်သီဍုၚ်တုဲ ကံၚ်ဇြဳပၞာန် သၠုၚ်ပ္တိုန်လဝ်အသိၚ် ပရေၚ်ဂီုကၠီုတုဲ ပလေဝ်ပလေတ်လဝ် သွက်ပၞာန်ဒုၚ်ခိုၚ်ၚ်ရဂှ် ဂွံတီကေတ် အတိုၚ်ကောန်ဍုၚ်ရေဝ်တအ် ဟီုထ္ၜးလဝ်ရ။
အတိုၚ်တၚ်အလဵုအသဳညဳသၟဟ်ကောန်ဂကူ NUG ဓမံက်ထ္ၜးလဝ်မ္ဂး ပ္ဍဲမွဲကာလဒပ်ပၞာန်သီအဝဵုဏံ ကောန်ဒပ်ကံၚ်ဇြဳပၞာန် ဗ္ဒာဲ ၁၄၀၀၀ လုပ်ဗ္ဒဗ္ဒာဲလဝ် ဇရေၚ်ဂၠံသြိုဟ်ညးဍုၚ်ကွာန်ရဂှ် လလောၚ်တြးလဝ် လိက်ဒုၚ်စဳရေၚ် ပ္ဍဲဂိတုအံက်တဝ်ဗာစၟတ်တ္ၚဲ (၇) တုဲကၠုၚ်တေံရ။
ပရိုၚ် – သြၚ်လောန်တိုမ်
ဗီု -YGF
sanlontai