ပေကျေန်၊ နဝ်ဝေမ်ဗာ(၂၆)
ဟိုတ်နူပေါဲဗတိုက် ဒှ်ဒၟံၚ် ပ္ဍဲတွဵုရးသေံ သ္ကုတ်သၟဝ်ကျာတုဲ သ္ပတံနူဂိတုနဝ်ဝေမ်ဗာ စၟတ်တ္ၚဲ (၂၅) တေံ ကြုက်ပ္ကတ်ပ္ကေၚ်ဒၟံၚ်ပၞာန် ပ္ဍဲပယျဵုကၟိန်ဍုၚ်ဗၟာရဂှ် လ္ပာ်ကြုက် ကဵုကၠုၚ်လဝ်သမ္တီရ။
ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၂၄) တုဲကၠုၚ်တေံဂှ် ပ္ဍဲကဵုပယျဵု ကြုက်-ဗၟာ ကြဴနူကွဳစက်ပ္ဍိုက်ဗၞိက် ဂၠိုၚ်ကဵုကၠံ ဒးတူပၟတ် လီုလာ်လဝ်တုဲဂှ် လ္ပာ်ဒပ်ပၞာန်ကြုက် ဒဒှ်ရပ္ကတ်ပ္ကေၚ်ပၞာန်ဂှ် လလောၚ်တြးကၠုၚ်လဝ်ရ။
လ္ပာ်ဒပ်ပၞာန်ဗၟာဂှ်မ္ဂး ပရေၚ်ကွဳစက်ပ္ဍိုက်ဗၞိက် တူလဝ်ပၟတ်ဏံ ဂကောံဇြဟတ်ပၠန်ဂတးတအ် လုတ်လောန်လဝ်ရဂှ် စောတ်စောဲလဝ်တုဲ ပရေၚ်ဒဒှ်ဏံ အာစိုပ်ဒၟံၚ် အကာဲအရာဟွံဂီုကၠီု ပ္ဍဲဍုၚ်ကြုက်တုဲ အကာဲအရာကြံၚ်မ္ၚိုဟ် အကြာဒပ်ပၞာန်ဗၟာကဵု ကြုက်တအ် နွံကၠုၚ်ရ။
ပရေၚ်ကြုက်ပ္ကတ်ပ္ကေၚ်ပၞာန်ဏံ ရန်လဝ် သွက်ဂွံပ္ကတ်ပ္ကေၚ် အစောန်စရာဲဍာ်ဒကေဝ် ပရေၚ်ထိၚ်ဒဝ် ပြဟ်ပြေဟ်မြက်စာ၊ ပရေၚ်ကၟာတ်လဒဵုပယျဵုဒၞက် ကေုာံ ဍာ်ဒကေဝ်ဗတိုက်တအ်ရဂှ် ဒပ်ပၞာန်ဗၠးၜးညးဍုၚ်ကွာန်ကြုက် ဌာနကောပ်ကာဲပၠဒပ်ပၞာန်သ္ကုတ်သၠုၚ်ကျာ လလောၚ်တြးလဝ်ရ။
လ္ပာ်ကြုက်ဂှ်မ္ဂး ပရေၚ်ပ္ကတ်ပ္ကေၚ်ပၞာန်ဏံ ၜိုန်ရကဵုလဝ်သမ္တီ ပရေၚ်ပ္ကတ်ပ္ကေၚ်ပၞာန် အတိုၚ်ပကတိကီုလေဝ် လ္တူကၠောန်ရေၚ်တၠုၚ်လဝ် ပ္ဍဲအခိၚ်ပေါဲဗတိုက်သ္ကာတ်မြဟ်ကၠုၚ်ဒၟံၚ် ဗီုအခိၚ်လၟုဟ်ဏံဂှ် ညးခါတ်အကာဲတအ် မၚ်စၟဳရံၚ်ဒၟံၚ် သီုစိုတ်မလုပ်စညးသ္ကအ်ရ။
ပ္ဍဲကဵုပရေၚ်ပ္ကတ်ပ္ကေၚ်ပၞာန် ဒေသပၞာန်သ္ကုတ်သၠုၚ်ကျာကၟိန်ဍုၚ်ကြုက်ဏံဂှ် လၟိဟ်ကောန်ဒပ် ချိုတ်တ်ပၠိုတ်တ်ဂှ် ဓမံက်ထ္ၜးဟီုပ္တိတ်လဝ် ဟၟဲရ။
သ္ပတံနူဂိတုအံက်တဝ်ဗာ သတ္တာဟလကြဴအိုတ်တုဲကၠုၚ်တေံတုဲ ဟိုတ်နူဂကောံဇြဟတ်ပၠန်ဂတးတအ်ထ္ပက်ပၞာန်တုဲ ဗဒိုပ်ကံၚ်ဇြဳပၞာန် ဂၠိုၚ်ကဵုကၠံ ဒးဆောံလေၚ်လဝ်တုဲ ဍုၚ် (၈) ဍုၚ်လေဝ် ဒးဗလးလဝ်တဲရ။
ပ္ဍဲမွဲကာလသီအဝဵုဏံ ဟိုတ်နူပေါဲဗတိုက်ဒှ်ဒၟံၚ် အလုံမွဲကၟိန်ဍုၚ်တုဲ အပံၚ်မၞိဟ် (၂) ပြကောဋိကိုတ်ပြၚ် ထောံသ္ၚိဌာန်တုဲ ဒးဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ် အတိုၚ်လလောၚ်တြး ကုလသမဂ္ဂရ။
Ref – Reuters
sanlontai